Muswaangano Wacooko wa Bakamboni ba Jehova Wamu 2001 wa “Bamayi ba Jwi lya Leza”
1 Imusinsimi Isaya wakapandulula Jehova kuba Mwiiyi Mupati, ukulwaizya kali wisi kuti: “Njeeyi inzila, amweende mulinjiyo.” (Is. 30:20, 21) Pele ino mbuti mbotumvwa ijwi lya Jehova kalikananwa kububotu bwesu? Jehova ulakanana kubantu bakwe kwiinda mu Bbaibbele kubikkilizyaa mabbuku aabandika makani aamu Bbaibbele, mumiswaangano, milimo yamubbazu alimwi amiswaangano yacooko iibambwaa “muzike musyomesi uucenjede.” (Mt. 24:45) Tulakonzya kumulumba Jehova akaambo kakuzumanana kutweenzya munzila njotweelede kweendela.
2 Mwakaa mwaka, muswaangano wacooko utupa coolwe cakuswaangana antoomwe abasyomima alimwi akuswiililisya malailile kuzwa kuli Jehova. Mwakali, ibantu bali 326,888 bakajanika kumiswaangano yacooko iikatalusya munzila yakumuuya ya “Basikucita Zyaambwa mu Jwi lya Leza.” Mwaka uuno wa 2001, Muswaangano Wacooko wamazuba otatwe wa “Bamayi ba Jwi lya Leza” uyoocitwa mu Zambia mbwiizulwa. Tulizi kuti mulikanzide kulibambila kutegwa mukajanike, aboobo twamupa malailile aya atobela aakumugwasya.
3 Bubambe Bwamasena Aakoona: Kanjikanji bakwesu balacita bubambe bwabo beni bwakuyookkala kubasazinyina naa kubeenzinyina bali mumadolopo mucitilwa miswaangano. Muminzi ibakwesu balayaka zivwuka naa koona muzilabba zipati iziyakwaa bakwesu balisungula ibajanika kumuswaangano. Mumiswaangano imwi babelesya maanda awona abasicikolo kutegwa bajane kwakoona aabo baboola kumuswaangano. Notupegwaa koona kubakwesu naa basazima, taceelede kuti basimuswaangano bakutolele mumbi kusamausya kwabakwesu kwiinda mukuzumanana kukkala kwamazuba aayindilila wamana muswaangano kutegwa balyookezye. Aaya maanda ngaciindi buyo camuswaangano. Aabo ibapegwa aakoona munzila eeyi, beelede kubona kuti balo abana babo balilemeka kuli balaaŋanda alimwi akutajaya cili coonse naa kulanga-langa mpasya naa mumasenaa ŋanda mobateelede kunjila. Ikuti naa uulaaŋanda wabaa buyumuyumu kumakani aaya, ulakonzya kubazibya cakufwambaana baku Cibeela Cilanga Aakoona kumuswaangano, eelyo ibakwesu aaba banoolibambilide kugwasya.
4 Ikulanganya Baabo Ibayandika Lugwasyo Lwaalubazu: Ibacembeede, ibalema, aabo bali mumulimo waciindi coonse abamwi buyo balakonzya kuyanda lugwasyo ikutegwa bakajanike kumuswaangano. Ibanamukwasyi, baalu alimwi abamwi buyo mumbungano ibabuzyi bukkale bulibedelede bwabaabo ibayandika lugwasyo lwaalubazu balakonzya kucita bubambe buyandika caluyando. Imukuli wabanamukwasyi alimwi ambungano taweelede kulonzyegwa kucibeela cilanga zyabweendelezi bwamuswaangano pe. (1 Tim. 5:4) Afoomu ya Sosaiti Yakulombela Kwakoona kulilembedwe zyeelelo zibelesegwa kulemba akwiitumina foomu eeyi. Ikkomitii Yamulimo Yambungano yeelede kulanga-langa umwi aumwi uulomba busena bwakoona naa uleelela kaitana kutuminwa foomu ku Cibeela Cilanga Aakoona. Imulembi wa Mbungano weelede kubikkilizyaa kkeyala izwide alimwi anamba yaluwaile afoomu kutegwa Cibeela Cilanga Aakoona cikakonzye kumutumina kuti naa kwaba mibuzyo.
5 Ikulikwabilila Kumulilo Antenda Zimwi: Cakutadooneka, icipa kuti kakujanika ntenda yamulilo kumiswaangano takuli kuti nkujikila munsi aazilabba pe, pele mbana ibateendelezyegwi basobanya naa basosela nkuni. Aboobo, ikutegwa mukwabilile bakwesu anywebo lwenu, mutalekeli bana banu kweendeenda kakunyina uubalanga; mutalekeli bana baniini kulanga maanzi aabilauka naa kuwalauka nokuba ikubalekela kuti kabasosela nkuni. Balakonzya kabacizi kabotu kuzicita ezi kumunzi, pele busena bwamuswaangano mbumbi alimwi tweelede kucenjela kutegwa tweelebe ntenda izikonzya kuletwaa mulilo. Bantu banji bakkede antoomwe alimwi bana balayanda kusobana zisobano nobali abananyina. Balanyonganizigwa alimwi tababoni kuti kulakonzya kuba ntenda, aboobo tatweelede kubasiila nkandela, mancisi naa malampi. Penzi limwi ndyakuti ibazyali bamwi basiya bana basyoonto muzivwuka kakunyina aubalanga eelyo nobaunka mukati kuyakuswiilila makani noyatalika pulogilamu. Ibana beelede kukkala antoomwe abazyali babo ciindi camapulogilamu. Basikugwasilizya nobabona kuti kuli bana baile kweendeendaa busena acitilwa muswaangano kakunyina aubalanga, beelede kubajosya bana aabo kubazyali babo. Nobazyali, mwalombwa kuti mubelekele antoomwe ababelesi bamuswaangano eelyo munzila eeyi muyootondezya kuti ‘mulabayanda babunyina.’—1 Pet. 2:17.
6 Imbunga ya Jehova caluyando ilapa malailile aagwasya kujatikizya miswaangano. Pele cilausisya kujana kuti mumiswaangano iilimbwiibede mumyaka yainda, basimiswaangano bamwi bakasweekelwa mpasya zyabo mumulilo wakali kunga weelebwa. Aabo ibakwesu balaa muswaangano, ikapati bazyali, balombwa kuti batubikkile maanu kapati twaambo ootu tuyandika loko ikutegwa tukayanzane munzila iikulwaizya alimwi iikkomanisya kumiswaangano yesu, ikutali kuti ikabe yamapenzi abuumba akaambo kantenda ziletwa abuyamba bwesu.
7 Zyakweendela: Talili lyoonse nocuuba-uba kujana zyakweendela. Pele mutalekeli zintu ezi kumutyompya kuyakujanika kumuswaangano. Imbungano zimwi zibbaddela myootokala kutola basimuswaangano kumasena aaswaanganinwa. Kufwumbwa naa myootokala ili buti ibelesegwa kutola basimuswaangano, yeelede kuti kiili kabotu alimwi yeelela kweenda mumugwagwa. Tamweelede kwiindilila amweele puunyamunda mootokala pe. Cilayandika kapati kuti mukwesu uusimide wapegwa mukuli wakulanga-langa bubambe oobu. Uyooizibya nkamu kujatikizya bubambe boonse, ciindi cakunyamuka alimwi abusena nkubayootantila. Kufwumbwa buyumuyumu bukonzya kubuka kunkamu eeyi, bweelede kuyoozibisigwa kumukwesu oyu walo uyoopa malailile. Muciindi nokuyandika kupa lugwasyo, lulayo naa kubamba penzi limwi, ibakwesu bapakamene amubazibye alimwi balakonzya kucita boobo.
8 Ikujanika Kumuswaangano Umbi: Imbungano yomwe-yomwe yaambilwa kuyoojanika kumuswaangano uuyoocitilwa munsi-munsi acilawo nkoibede. Iba Sosaiti baleezyeezya mweelwe wabaabo ibayoojanika kumuswaangano kweelanaa mweelwe wabasikumwaya ibaabilidwe kumuswaangano omwe-omwe ikutegwa balibambile kabotu busena bwakukkala, abwakoona kubikkilizyaa mabbuku alimwi azimwi-zimwi. Pele, ikuti kakuli kaambo kalimvwisya ncomuyandila kuti mukajanike kumuswaangano umbi kuleka kooko nkomwaabilidwe elyo muyandaa kwakoona, mulembi wambungano weelede kulomba foomu Yakulombela Kwakoona kuzwa ku Sosaiti yalo njomweelede kulemba cakumaninina akwiisaina. Mpoonya amwiitumye kubusena bwamuswaangano nkomuyooswaanganina.
9 Tatukasowi Ciindi Kujanika: Ibunji bwabakwesu bajana buyumuyumu kutegwa bajanike kumuswaangano. Imiswaangano yabantu ba Jehova baibona kuti njiijisi maumi aabo. Kutegwa bajanike amuswaangano, ibamwi baleenda misinzo milamfwu, pele kwiina nobalombozya kutajanika amuswaangano nouba omwe. Imukwesu ulaamyaka yakuzyalwa iili 73 wakeenda makkilomita aasika ku 450 kutegwa akajanike aamuswaangano. Wakaakusika kubusena obo nokwakainda mazuba aali 16, nkujana zituta zyakwe zyazimba kapati, pele wakali kkomene kuti wakasika kubusena oobo. Nowakamana muswaangano, kakkomene cini-cini akuyumizigwa munzila yakumuuya, wakalutalika lweendo lwakwe lwakupilukila kumunzi wakwe amaulu. Oobu mbwacita lyoonse kwamyaka iili mbwiibede!
10 Ibacizi bobile bakeenda musinzo uulampa makkilomita aasika ku 160 kutegwa bakajanike kumuswaangano. Imulumi waumwi akati kabacizi aba bobile wakaambila mukaintu wakwe kuti tabakooyoojanika kumuswaangano akaambo kakuti tanaakajisi mali aakukweezya. Aumwi mucizi wakali mubukkale bukozyenye. Ibacizi aba bobile bakayumizyanya akusola kuti beende buyo amaulu. Akaambo kakuti bacita obo antoomwe abana babo bakabotelwa kapati kuti bajanika kumuswaangano.
11 Tacilangilwi kuti muyooyenda misinzo milamfwu kapati, pele muyooyandika kusoleka canguzu alimwi akulisungula kutegwa nywebo alimwi amukwasyi wanu mukajanike. Ikutegwa mupegwe ciindi kuzwa kumilimo yanu yakumubili ciyandika kuzyandamana buya. Sena mwakabasikila kale bapati bamulimo kuti mulombe mazuba? Uuno mwaka, miswaangano imwi iyooba ciindi zikolo kazijaludwe kale. Ikuti kamujisi bana baunka kuzikolo, amubazibye bamayi baabo kuti bana banu tabakajaniki kucikolo akaambo kacibeela eci ciyandika kapati cakuyiisigwa kwabukombi bwesu.—Dt. 31:12.
12 Mbuli bakwesu baambidwe mumincali iili atalaawa, andiswe tujana buyumuyumu. Pele cakutadooneka tulakonzya kwiiya lusyomo lwabo alimwi akuba bakanzide kuyoojanika azibeela zyoonse zyamuswaangano wacooko. Ikuti kwayandika kubambulula kumwi, atusyome muli Jehova kuti atusololele katuzi kuti uyootulongezya mukusola-sola kwesu nkotucita kwakuti tukajanike kupulogilamu yoonse.
13 Atugwasigwe Azilongezyo: Tulaliyandisya kapati Jwi lya Leza nkaambo tulizi kuti tulakonzya kukomena andilyo mulufwutuko. (1 Pet. 2:2) Kwiinda mukujanika kumuswaangano alimwi akuswiilila kupulogilamu tuyoogwasigwa ikuyumya lusyomo lwesu mu Jwi elyo, alimwi eci ciyootupa kuti tucikonzye kuliyumya mumapenzi aaletwaa Saatani. Kwiinda mukucita boobo, tuyootondezya Jehova alimwi abaabo boonse ibalangilila kuti tulaziyandisisya zintu zyakumuuya alimwi akuti “swebo tatuli baabo bapilukila musule . . . pele tuli baabo basyoma alimwi bayoofutulwa.”—Bahi. 10:39; 12:16, Ci; Tus. 27:11.
14 Muswaangano Wamumwaambo Wakutambaika: Kusandulula Mumwaambo Wakutambaika kuyoocitwa lyamuswaangano wamu Cingisi uyoocitilwa ku Lusaka. Ipulogilamu yoonse yamuswaangano iyoosandululwa Mumwaambo Wakutambaika waku Amelika kuli baabo bayoojanika, alimwi bayoobotelwaa kuyumizigwa akuyanzana kubotu. Akaambo kaceeci, KUNYINA BUBAMBE bwamumwaambo wakutambaika buyoocitwa kumuswaangano umbi. Cilayandika kapati kuti boonse basicuulutwi batalike LINO kucita bubambe bwakuyoojanika kumuswaangano wamumwaambo wakutambaika. Ibaalu beelede kulanga-langa cabunkutwe omwe omwe wabasicuulutwi bali mumbungano zyabo kutegwa basinizye kuti balibuzyi bubambe obu alimwi akubona naa kuli lugwasyo ndobakonzya kubapa kutegwa bakajanike. Kuli baabo bakonzya kuyanda kwakoona, amubone mincali 3 alimwi a 4.
15 Majwi Aamamanino: Mbociyaabuswena afwaafwi ciindi cakuti mukajanike kumuswaangano wacooko, amucibikke mumupailo kuli Jehova kutegwa mukajanike azibeela zyoonse kwamazuba oonse otatwe alimwi akujana mpindu ziinda kuzwa kupulogilamu. Sena mwakalomba kale mazuba akutajanika kuncito kwamazuba otatwe aamuswaangano ngomukanza kuyoojanika? Ikuti kamutana kucita boobo, amucite lino cakufwambaana. Kulindila mane kusikila kumamanino nomuya mulombe mazuba kanjikanji tabakozyi kumupa pe. Imuzike musyomesi uucenjede mwaka uuno wabamba Muswaangano Wacooko waba “Bamayi ba Jwi lya Leza” kuti tupegwe malailile akumuuya alimwi akutuyumya mulusyomo. Aboobo amutalike kucita makanze lino kutegwa mukajanike, ikutobela lulayo lwasintembauzyo lwakuti: “Amulumbe Leza mumbungano”!—Int. 68:26.
MALAILILE: Mumbungano imwi aimwi, mulembi nguuyoolanganya zyoonse zijatikizya muswaangano wacooko alimwi uyoobona kuti wabakulwaizya boonse cabusungu kujatikizya nguwo. Ikuti naa mulembi katako, mwaalu umbi weelela weelede kwiilanganya milimo eeyi. Mulembi weelede kwaatobelezya kabotu malailile oonse ngatambula kuzwa kubusena buyoocitilwa muswaangano aajatikizya kwakoona, mulimo wakulisungula alimwi abubambe bwamulimo bwamuswaangano bumwi bwamusule naa kumbele. Weelede kubaa ciindi cili kabotu amiswaangano kutegwa abale (KUTALI kwaamba buyo mubufwaafwi ) akupandulula magwalo oonse aakumuswaangano. Ibaalu boonse, kwaambisya mulembi, beelede kubuziba kabotu-kabotu bubambe bwamuswaangano bumwaigwa mumagwalo alimwi a Mulimo Wesu Wabwami.