Muswaangano Wacooko wa Bakamboni ba Jehova Wamu 2000 wa ‘Basikucita Zyaambwa mu Jwi lya Leza’
1 “Lino njookulumba mumbungano impati, njookutembaula akati kabantu banji.” (Int. 35:18) Amuciyeeyele buyo mbwanga wakondwa Davida sunu ikubona bantu banji babungene antoomwe caluumuno kumiswaangano yesu kutegwa balaigwe a Leza! Sena mwakali umwi wabaabo ibali 321,545 ibakajanika ku Miswaangano Yacooko ya “Ijwi lya Leza Lyabusinsimi” imwakali? Kuzwa mu August 13 kusikila mu September 12, 1999 kwakacitwa miswaangano iili 55 omuno mu Zambia mbwiizulwa. Twaakubungana antoomwe kumiswaangano yesu yacooko yamu 2000, tuyoobaa coolwe cimbi cakuswaangana abasyomima “bacete mumuuya” ibakkomene alimwi ibayandisisya ‘ikuswiilila muuya ncowaambila imbungano,’ mukutembaula Jehova.—Mt. 5:3; Ciy. 2:29.
2 Bubambe Bwamasena Aakoona: Kanjikanji bakwesu balalibambila beni kwakuyookkala kubasazinyina naa kubeenzinyina bali mumadolopo mucitilwa miswaangano. Muminzi ibakwesu balayaka zivwuka naa koona muzilabba zipati iziyakwaa bakwesu balisungula ibajanika kumuswaangano. Mumiswaangano imwi babelesya zikolo kutegwa bajane kwakoona aabo baboola kumuswaangano. Notupegwaa koona kubakwesu naa basazima, taceelede kuti basimuswaangano bakutolele mumbi kusamausya kwabakwesu kwiinda mukulangila kuti balazumizigwa kukkala kwamazuba aaindilila kutegwa balyookezye wamana muswaangano. Aaya maanda ngaciindi buyo camuswaangano. Aabo ibapegwa aakoona munzila eeyi beelede kubona kuti balo abana babo balilemeka kuli balaaŋanda alimwi akutajaya cili coonse naa kulanga-langa mpasya naa mumasena mobateelede kunjila muŋanda. Ikuti naa uulaaŋanda wabaa buyumuyumu kumakani aaya, ulakonzya kubazibya cakufwambaana baku Cibeela Cilanga Aakoona kumuswaangano, eelyo ibakwesu ooko banoolibambilide kugwasya.
3 Ikulanganya Baabo Ibayandika Lugwasyo Lwaalubazu: Ibanamukwasyi, abaalu alimwi abamwi buyo mumbungano ibabuzyi bukkale bulibedelede bwabaabo bacembeede, ibalema abaabo bali mumulimo waciindi coonse naa ibamwi bayandika lugwasyo lwaalubazu, balakonzya kubagwasya bantu aabo ikutegwa abalo bakajanike kumuswaangano. (Amweezyanisye 1 Timoteo 5:4.) Afoomu ya Sosaiti Yakulombela Kwakoona kulilembedwe zyeelelo zibelesyegwa kulemba akutuma foomu eeyi. Ibubambe obu bujatikizya buyo basikumwaya ibalaa ciimo cibotu, kubikkilizya abaabo ibalaa bana balilemeka, balo bazumizidwe a Kkomitii Yamulimo Yambungano. Ikulomba ooku kweelede kutuminwa cakufwambaana ku Cibeela Cilanga Aakoona.
4 Ikulikwabilila Kumulilo Antenda Zimwi: Cakutadooneka, icipa kuti kakujanika ntenda yamulilo kumiswaangano takuli kuti nkujikila munsi aazilabba pe, pele mbana ibateendelezyegwi basobanya naa basosela mulilo. Aboobo, ikutegwa mulikwabilile bakwesu anywebo lwenu, mutalekeli bana banu kweendeenda kakunyina uubalanga; mutalekeli bana baniini kulanga maanzi aabilauka naa ikubalekela kuti kabasosela mulilo. Balakonzya kabacizi kabotu kuzicita ezi kumunzi, pele busena bwamuswaangano mbumbi alimwi tweelede kucenjela kutegwa tweelebe ntenda izikonzya kuletwa amulilo. Bantu banji bakkede antoomwe alimwi bana balayanda kusobana zisobano nobali abananyina. Balanyonganizigwa alimwi tababoni kuti kulakonzya kuba ntenda, aboobo tatweelede kubasiila nkandela, mancisi naa malampi. Penzi limwi ndyakuti ibazyali bamwi basiya bana basyoonto muzivwuka kakunyina aubalanga eelyo nobaunka mukati kuyakuswiilila makani noyatalika pulogilamu. Ibana beelede kukkala antoomwe abazyali babo ciindi camapulogilamu. Basikugwasilizya nobabona kuti kuli bana baile kweendeendaa busena acitilwa muswaangano kakunyina aubalanga, beelede kubajosya bana aabo kubazyali babo. Nobazyali, mwalombwa kuti mubelekele antoomwe ababelesi bamuswaangano elyo munzila eeyi muyootondezya kuti ‘mulabayanda babunyina.’−1 Pet. 2:17.
5 Imbunga ya Jehova caluyando ilapa malailile aagwasya kujatikizya miswaangano. Pele cilausisya kujana kuti mumiswaangano iilimbwiibede mumyaka yainda, basimiswaangano bamwi bakasweekelwa mpasya zyabo mumulilo wakali kunga weelebwa. Aabo ibakwesu balaa muswaangano, ikapati bazyali, balombwa kuti batubikkile maanu kapati twaambo ootu tuyandika loko ikutegwa tukayanzane munzila iikulwaizya alimwi iikkomanisya kumiswaangano yesu, ikutali kuti ikabe yamapenzi abuumba akaambo kantenda ziletwa abuyamba.
6 Ikujanika Kumuswaangano Umbi: Imbungano yomwe-yomwe yaambilwa kuyoojanika kumuswaangano uuyoocitilwa munsi-munsi acilawo nkoibede. Iba Sosaiti baleezyeezya mweelwe wabaabo ibayoojanika kumuswaangano kweelana amweelwe wabasikumwaya ibaabilidwe kumuswaangano omwe-omwe ikutegwa balibambile kabotu busena bwakukkala, abwakoona kubikkilizya amabbuku alimwi azimwi-zimwi. Pele, ikuti kakuli kaambo kalimvwisya ncomuyandila kuti mukajanike kumuswaangano umbi kuleka kooko nkomwaabilidwe elyo muyanda kwakoona, mulembi wambungano weelede kulomba foomu Yakulombela Kwakoona kuzwa ku Sosaiti yalo njomweelede kulemba cakumaninina akwiisaina. Mpoonya amwiitume kubusena bwamuswaangano nkomuyooswaanganina.
7 Amulibambile Kuyoojanika Mazuba Oonse Otatwe: Sena Saatani kuli naakasolede kumunyonganya kutegwa mutabikkili maanu kuzintu zyakumuuya? Mukubula coolwe, ibunji bwabakwesu abacizi kubikkilizya amikwasyi yabo balaindwa cakulya cakumuuya iciyandika kapati. Munzila nzi? Mukuti tabajaniki muzibeela zyabuzuba bwakusaanguna bwamuswaangano wacooko. Muziindi zimwi kwajanwa kuti ibunji bwabakwesu balaindwa malailile aakumuuya alimwi akuyanzana kubotu nkotubaako muzibeela zyabuzuba bwakusaanguna.
8 Cilakonzya kacili boobo akaambo kakuti ibakwesu bamwi baleenkeenka kusikila basikubalemba milimo akulomba ciindi cakuti bakajanike kumuswaangano. Sena mbocibede oobo kulindinywe? Ino nkaambo nzi ncomutamwaambili Jehova mumupailo kutegwa mube aabusicamba bwakwaambaula abasikumulemba milimo kujatikizya makani ayo? Amuyeeye mbozyakazwidilila zintu kuli Nehemiya walo wakali muciimo mbuli bwaceeco. (Neh. 2:1-6) Amube alusyomo mukulisungula kwa Taateesu wakujulu kwakuti ulakonzya kumugwasya, kamuzi kuti ikuti naa mwabikka zintu zyakumuuya mubusena bwakusaanguna, uyoomupa nzyomuyandika mubuumi.−Mt. 6:32b, 33.
9 Ino Mulimvwa Buti Kujatikizya Miswaangano Yesu? Mucizi umwi wakalemba kuti: “Ndamulumba kapati akaambo kamuswaangano wacooko wamu 1999. Cindipa kukondwa kapati nondiyanzanaa bakwesu mbondibona komwe buyo amwaka. Ndaakajana kasimpe ciindi kandicili mukubusi nondakali ada, alimwi ndilayeeya kabotu-kabotu ciindi cakusaanguna aabo bakali kucitya ciiyo ca Bbaibbele kulindime nobakanditola kumuswaangano ciindi cakusaanguna. Ndakalanga mujulu notwakali mubbuwa lisobaninwa zisobano motwaali kucitila muswaangano eelyo notwakali kwiimba nyimbo ya Bwami ‘Myaanda-myaanda ya Bakwesu,’ mpoonya ndakalila. Ndakalibuzya ndemwini kuti, ‘Akati kabantu boonse aaba baluleme, mbuti Jehova mbwanga wandiyanda mebo?’ Mubuzuba oobo ndakasala kubelekela Jehova lyoonse munzila njayanda.” Cilakatalusya kaka! Ncintu cikondelezya kapati kuyanzanaa bantu ba Jehova basalala, tabulimbubo na?
10 Tulayandika kubaa muswaangano wacooko mwaka amwaka kwiinda lyoonse, ikapati mazubaano aakumamanino. Ncipego kuzwa kuli Jehova kutegwa tuzumanane kupona kabotu munzila yakumuuya. Aboobo, amukanze kuyoojanika ku Muswaangano Wacooko wa ‘Basikucita Zyaambwa mu Jwi lya Leza’ kwamazuba oonse otatwe. Ino mbuti mbomukonzya kwaazuzikizya makanze aanu aakuyoojanika kumuswaangano? Amubaambile limwi ciindi kaciciliko basikumulemba milimo kuti bakamupe ciindi cakutaunka kumilimo kutegwa mukajanike kumuswaangano mazuba oonse. Ikuti kamujisi penzi lyamali, amutalikile limwi ono ikuyobola mali bucebuce kutegwa mukacikonzye kujanika kumuswaangano. Amupaile kuli Jehova mumulombe kuti amugwasye kuzunda penzi lili lyoonse. Ikuti mwacita oobo, mulakonzya kubaa bulangizi bwakuyookkomana aluyanzano lwaluyando lwabakwesu abacizi akuyoomvwa majwi aabuumi ubutamani aazwa kuli Taateesu wakujulu siluyando, Jehova.−Amweezyanisye Johane 6:68.
MALAILILE: Mumbungano imwi aimwi, mulembi nguuyoolanganya zyoonse zijatikizya muswaangano wacooko alimwi uyoobona kuti wabakulwaizya boonse cabusungu kujatikizya nguwo. Ikuti naa mulembi katako, mwaalu umbi weelela weelede kwiilanganya milimo eyi. Mulembi weelede kwaatobelezya kabotu malailile oonse ngatambula kuzwa kubusena buyoocitilwa muswaangano aajatikizya kwakoona alimwi aamulimo wakulisungula kubikkilizya azimbi buyo. Weelede kubaa ciindi cili kabotu amiswaangano kutegwa abale (IKUTALI kwaamba buyo mumajwi aakwe) akupandulula magwalo oonse aakumuswaangano.