Amubatambe Boonse Ibalaanyota
1 Mbubwena mbokwakasinsimwa amusinsimi Amosi, ibantu mazubaano balimukufwa ‘nyota iitali yamaanzi pe, pele yakuswiilila majwi aa-Jehova.’ (Am. 8:11) Ikutegwa tugwasye bantu bali muciimo cacimpayuma eci munzila yakumuuya, tubaambila zyalugwasyo lwa Leza lwakusilika bantu bateelela kuzwa kucibi alufwu, zyalo mumutwe wamakani wamamanino wa Ciyubunuzyo, mozyaimininwaa “mulonga wamaanzi aabuumi.” Ee, tulaacoolwe cakutamba bantu boonse ibalaanyota yabululami kuti ‘banywe cabuyo maanzi aabuumi.’ (Ciy. 22:1, 17) Mbuti mbotunga twacicita eci mu February? Nkwiinda mukumwaya bbuku lili lyoonse lilaa mapeeji aali 192 ndyomujisi. Inga ndiza mwayanda kubelesya inzila ezi zitobela:
2 Mbwaanga banji balalibilika akaambo kabuumi, ndiza makani aaya aatobela inga abeleka:
◼ “Ibunji bwabantu balakatazigwa nobayeeya ikudula kwamisamu mibotu yakusilisya. Ndiza andinywe cilamukatazya eci. [Amulindile bwiinguzi.] Sena ipenzi eli kuli mbolinga lyamaninwa limwi? [Amulindile bwiinguzi.] Mboobu bulangizi bukkomanisya.” Amubale Ciyubunuzyo 21:4. Ibbuku eli [amwaambe mutwe walyo] lipa bupanduluzi bunji bujatikizya inyika iilengulwidwe aa Leza, imutakabi kupenga.” Naa kacikonzeka amujalule kucifwanikiso citondezya paradaiso akucibandika. Amulisiye bbuku akumvwana nomutikapilukile.
3 Ciindi nomupilukila, mulakonzya kutalisya mubandi wanu alimwi kwiinda mukwaamba kuti:
◼ “Iciindi cakamana neekali waano, twakabandika makani aajatikizya mbwaayakumanina limwi mapenzi aajatikizya buumi. Sena muyeeya kuti kuli ciindi nokutakabi muntu uuciswa? [Amulindile bwiinguzi.] Amubone kaambo aka kakkomanisya cini-cini.” Amubale Isaya 33:24. Mpoonya amujalule kuciiyo 5 ca broshuwa ya Ncayanda, akubandika mincali 5-6, kamubuzya mibuzyo yeendelana amincali eyo ili kumatalikilo kwaciiyo akubala magwalo amwi aali mumincali. Amubaambile kuti kugusigwa kwamalwazi alimwi alufwu kunooli akati kazintu ziyakuzuzikizya cisyomezyo ca Leza cakumatalikilo cijatikizya nyika. Amumvwane buzuba nomuya kupilukila kuzikuzumanana amincali 1-4 alimwi a 7 muciiyo ncimunya.
4 Ikuti imakani amwi aajatikizya lufwu lwakutaziba kaacili mumizeezo yabantu, mulakonzya kusola inzila eyi:
◼ “Ndasyoma mwakaateelela makani aaya [amwaambe makani ayo]. Iciindi aciindi nokuba intenda yalufwu, ibunji bwabantu balakatazigwa kujana inzila mbobanga baumbulizya mikwasyi yasweekelwa. Ino muyeeya buti nywebo?” [Amulindile bwiinguzi.] Mpoonya amujule kupeeji lijisi makani aayo mubbuku ndyomuli mukumwaya, akutondezya cifwanikiso cabubuke. Amuzumanane kwaamba kuti: “Ibantu banji balagambwa ciindi nobaziba kuti ibantu baluleme alimwi abataluleme bayakubusigwa kubuumi mu Paradaiso anyika. [Amubale Incito 24:15 akwiipandulula.] Ibbuku eli lilakanana atumbi twaambo tunji tujatikizya makanze aa Leza aakumbele. Ikuti kamuyanda kwiiya twaambo tunji tujatikizidwe mumakanze aya, mulakonzya kusyaala abbuku eli.” Amumvwane buzuba nomutikapilukile, mubikkile maanu aazintu muntu ooyo mpaatondezya luyandisisyo alimwi ampajisi penzi.
5 Nomupilukila, makani aanu ajatikizye mukamwini ŋanda. Ndiza inga mwaamba kuti:
◼ “Mumubandi wesu wakamana, ndakakakkomanina kapati kaambo kaya nkomwakaamba kamakanze ngajisi Leza kujatikizya nyika. [Amukainduluke kaambo ako.] Ndakajana makani ngondiyeeya kuti inga mwaakkomanina.” Amujalule broshuwa ya Ncayanda kuciiyo 5. Amubale akubandika mincali minji njomukonzya muciiyo eco kufwumbwa kuti mwini ŋanda kacaakkomanina makani ayo. Mwamana kumvwana buzuba aciindi ncomutikapilukile kuti mukazumanane muciiyo eco, amwaambe ziindi imiswaangano yambungano noicitwa. Amupandulule zya Muswaangano Wabuleya, akubatamba kuti bakajanike.
6 Ikuti mwayanda kubelesya makani aantalisyo mauba-uba aajatikizya kusiya tulakiti, inga mwaamba kuti:
◼ “Ndiyanda kuti ndimusiile katulakiti aaka kalaa mutwe wakuti Ino Bayandwa Bafwide Bajisi Bulangizinzi?” Amumupe komwe mwini ŋanda, akumutamba kuti amutobelezye mwanikubala muncali wakusaanguna. Amulindile auingule mubuzyo uuli kumamanino kwamuncali. Amubale muncali wabili, mpoonya amujalule kupeeji kuli cifwanikiso iceelela mubbuku ndyomuli mukumwaya. Amuzumanane kwiinda mukwaamba kuti: “Ibbuku eli lilaatwaambo tunji tujatikizya bubuke alimwi azisyomezyo zitali boteli zyamu Bbaibbele zilangilwa kumbele. Inga ndamusiila ibbuku eeli.” Amumvwane nomutikapilukile.
7 Ikutamba kubotu nkotutamba bamwi kulakonzya kubacitya kuti baboole kumaanzi aabuumi Jehova ngali mukupa lino. Aboobo, kubantu boonse ibalaanyota atwaambe kuti, “Boola.”—Ciy. 22:17.