‘Ibazulide Kukumana Milimo Mibotu Yoonse’
1 Bantu ba Jehova sunu balilongezyedwe amaunda-maunda aazyakulya zibotu zyakumuuya. (Is. 25:6) Kuli luzibo lunji mu Magwalo lukonzya kujanwa kwiinda mukulibalila, mukucita ciiyo camukwasyi, mumiswaangano yambungano alimwi mumiswaangano misyoonto amipati. Pele sena tuli mukulubelesya luzibo olu lwakumuuya lyoonse kutegwa tube bantu ‘ibalibambide, bazulide kukumana milimo mibotu yoonse’?—2 Tim. 3:17.
2 Amuyeeye buyo zyakulya zyakumuuya zyamumwaka wa 1998, walo wasyaala cisela camyezi kale kuti umane! Kwiinda mumiswaangano yambungano yansondo ansondo, tulimukulanga-langa twaambo tupati-pati twamabbuku aali 23 aa Magwalo aa Bunakristo aa Cigiliki, ikwiinduluka makani aali mubbuku lya Munthu Wamukulu aamba zyabuumi bwa Jesu Kristo kacili anyika. Alimwi twaindulula cibeela citandila kucisela cabbuku lya Luzibo alimwi kusyeede asyoonto kuti tumanizye mabbuku aa Lukkomano Mumukwasyi alimwi a Bbuku Lyangu. Kunze lyaboobo, tuli mukulisigwa kwiinda mu Milimo Yesu Yabwami iizwa ziindi 12 amwaka, ziiyo zya Ngazi Yamulindizi zili 52, alimwi amakani aakubuleya aatandila kumweelwe wazibalo mu Ngazi Yamulindizi aabandika makani aa Bbaibbele aayindene-indene. Imapulogilamu aayaka aamiswaangano misyoonto amipati aliyungizidwe kuli zeezi zyoonse. Ma! Tazilivwulili zintu zibotu zyakumuuya izyapegwa kulindiswe.
3 Amuzikkomanine Zipego zya Jehova: Ikutegwa tugwasigwe kabotu, tweelede kuzyiba kaambo Jehova ncapeda zyakumuuya ezi zinji. Ikulya zintu ezi zibotu kuyaka lusyomo lwesu alimwi kuyumya bulongwe bwesu anguwe. (1 Tim. 4:6) Pele, cakulya cakumuuya kwiina nocipegwa kutegwa tuyiisigwe buyo. Citukulwaizya kutola lubazu mukwaambila bamwi zyakasimpe alimwi citucitya kuti tuzwidilile mukucita boobo mbotuli balanda ba makani mabotu.—2 Tim. 4:5.
4 Zintu zyakumuuya iziyandika tutaziyumbili ambali, pele lyoonse katukulwaizya luyandisisyo lwazipego zibotu alimwi izikkomanisya munzila yakumuuya kuzwa kutafwule lya Jehova. (Mt. 5:3; 1 Pet. 2:2) Kutegwa mugwasigwe kapati amujane ciindi cakubaa ciiyo canu calyoonse, ciiyo ca Bbaibbele camukwasyi alimwi akujanika kumiswaangano. (Ef. 5:15, 16) Impindu nzyomuyoojana mukucita boobo ziyooyendelana akukulwaizya kwakasololelwaa Leza, Paulo nkwaakalembela Banakristo basyomeka bana Hebrayo, mbubwena mbuli mbokulembedwe ku Ba-Hebrayo 13:20, 21.