Sena Mulaligwasya?
1 Tuulunzuma twabantu sunu tulayandisya kubaa bukkale bukondelezya, aboobo tuyanda kuziba mbotunga twazunda mapenzi. Balabala mabbuku aambobanga bajana lugwasyo nokuba kusyoma tukamu alimwi atubunga kutegwa bajane malailile aambobakonzya kusumpula bukkale bwabo. Ibamwi ambweni balakonzya kwaamba lugwasyo lusyoonto ndobajana. Pele kweelanaa bukkale bwasunu, sena bantu boonse baiya ikukkala muluumuno alimwi akubotelwa abuumi kwiinda mumapulogilamu ayiisya malailile aabantunsi? Taali masimpe aayo pe!—1 Kor. 3:18-20.
2 Kulubazu lumwi, Mulengi wesu ulapa malailile aagwasya kapati kuli baabo ibayanda kuswiilila kakunyina kubabbadelesya. Jehova uyanda kuti muntu uli woonse agwasigwe anjiisyo zyakwe. Cabwaabi wapa bantu Jwi lyakwe lyakasololelwaa muuya kutegwa libasololele mubululami alimwi wacita kuti makani mabotu aa Bwami bwakwe aambilizigwe munyika yoonse mbwiizulwa. (Int. 19:7, 8; Mt. 24:14; 2 Tim. 3:16) Buumi bubotu buliswaangene kapati akuswiilila milawo ya Jehova.—Is. 48:17, 18.
3 Malailile a Jehova mmabotu kwiinda yaayo apegwa mumabbuku aakulijanina lugwasyo naa nzila zyakusumpula bukkale zipegwaa mbunga zyamunyika. Tulakonzya kujana lugwasyo lwini-lwini alimwi lutamani ikuti naa twazibelesya kabotu zipego zya Jehova zyalo zijanika mu Jwi lyakwe alimwi ziyiisigwaa mbunga yakwe.—1 Pet. 3:10-12.
4 Amuligwasye a Miswaangano Yambungano: Sunu, Jehova ulayandisisya kutuyiisya nzila zyakwe alimwi tulakonzya kugwasigwa kwiinda mukuswiilila malailile aakwe. Miswaangano yesu yosanwe njotubaanjiyo mvwiki amvwiki mbumboni bwakuti Jehova ulatulanganya caluyando. Notujanika kumiswaangano yambungano, iluzibo lwesu kujatikizya Leza lulayungizigwa. Tulayiya mbotunga twalikwabilila kuzintu zibi kwiinda mukuswenenena kuli Jehova. Munzila eyi tulakulwaizigwa kapati.
5 Tazisi zyeezyi zilikke pe. Kumiswaangano yambungano tulakonzya ‘kujula myoyo yesu.’ (2 Kor. 6:13) Eci cibikkilizya kubaziba bamwi mumbungano. Tulagwasigwa akuyumayumizigwa mbubwenya mbuli kooko mwaapostolo Paulo nkwaakalemba mulugwalo lwakwe kuba Roma. (Rom. 1:11, 12) Naakalembela bana Hebrayo, wakabacenjezya aabo ibakatalikide cilengwa cakutayanzanaa Banakristonyina.—Heb. 10:24, 25.
6 Buumi bubotu buliswaangene akuba bantu babikkila maanu kubukkale bwabamwi. Tukulwaizigwa kujana nzila motunga twagwasilizya bamwi kuba bantu bakkomene. Aboobo miswaangano yesu ya Bunakristo ilatugwasya lwesu tobeni alimwi abaabo mbotuyanzana limwi caluyando. Cilikke ncotuyandika kucita nkutola lubazu camoyo woonse.
7 Imwaapostolo Paulo wakakaamba kaambo nkoona aka mululayo lwakwe kuli Timoteo naakalemba kuti: “Koliisya kuba abuumi bwakupa Leza bulemu.” (1 Timoti 4:7, Ci) Tulakonzya kulibuzya kuti: ‘Sena ndilaliyiisya ndemwini? Sena ndilaiya mbondinga ndagwasigwaa zeezyo nzyondimvwa kumiswaangano yambungano?’ Tulaingula kuti inzya kumibuzyo eyi ikuti naa tulabikkila maanu kuzintu nzyotumvwa kumiswaangano akusola kucita nzyotwiiya. Ameso aalusyomo tatweelede buyo kubikkila maanu kubakwesu bayiisya, pele tweelede kubona Jehova kuti ngo Mwiiyi Mupati uuyiisya bantu bakwe.—Is. 30:20.
8 Cikolo Camulimo Wateokrasi Alimwi a Muswaangano Wamulimo: Miswaangano eyi yobile itugwasya kuba bantu bacibwene mumulimo wa Bunakristo. Ngomulimo wini wa Cikolo Camulimo Wateokrasi—ncikolo mwalo bana bacikolo mobapegwa malailile alulayo ciindi aciindi. Mulijisi coolwe cakutondezya kuyaambele kwanu kamwaambaula makani kubuleya alimwi akuba mwiiyi wa Jwi lya Leza. Pele kutegwa mugwasigwe kapati acikolo eci, mweelede kulilembya, akujanika lyoonse, akutola lubazu lyoonse alimwi akuzuzikizya mbazu zyanu camoyo woonse. Ikutambula alimwi akulubelesya lulayo ndomupegwa ciyoomugwasya kuyaambele.
9 Muswaangano Wamulimo utuyiisya mbouyandika mulimo wa Bunakristo alimwi akututondezya mbotukonzya kutola lubazu mumulimo wakugwasya bamwi kuba basikwiiya. Sena nywebo amukwasyi wanu mulagwasigwa amakani aabandikwa mumiswaangano eyi yobile? Mboobu mbubakaamba Banakristo banabukwetene bamwi: “Kumuswaangano Wamulimo umwi twakaiya kuti mukwasyi weelede kulanga-langa cibalo cabuzubaa buzuba. Teetwakali kucita obo pe, pele sunu tulacita.” Ino baligwasya buti? Baamba kuti: “Tujana kuti mibandi njotubaanjiyo notuli atafwule ilakondelezya kapati. Tatucikazyanyi lino elyo notulya cakulya camasikati.” Sena abalo ibana baniini balagwasigwaa miswaangano? Inzya. Banyina bana baamba kuti: “Cilisalala kuti abalo bana besu ilabakonda kapati miswaangano. Kuli mvwiki imwi njitwakamvwa mwaneesu musankwa wamyaka yakuzyalwa iili cisambomwi kaamba zyakubeja. Pele mvwiki eyo njiyona makani amalailile kumuswaangano akali kubandika bubi bwakubeja. Kalangika kubaa nsoni abusyu bakwe, mwaneesu musankwa oyu wakalanga bausyi mpoonya wakaile kulisenda acuuno mpaakakkede. Wakayiya ciiyo, aboobo twakanyina penzi alimwi anguwe kuzwa leelyo.”
10 Mucizi umwi mupainiya waamba kuti ulikkomene akaambo kakuti ku Muswaangano Wamulimo kupegwa nzila zyambotunga twayaambele mumulimo wesu. Nkaambo nzi? Ulapandulula kati: “Nkaambo ndilaakubaa cilengwa cakwaambaula makani ngoonya lyoonse kubantu boonse. Zimwi ziindi ndiyeeya kuti nzila zipegwa mu Mulimo Wesu Wabwami inga tazibeleki. Pele ku Muswaangano Wamulimo nondimvwa kukulwaizya kwakuti tweelede kusoleka kunoozibelesya nzila ezyo, ndibaa luyandisisyo lwakuzibelesya nzila ezi zipegwa. Alimwi eci cipa kuti mulimo kaukondelezya!” Nokwakainda mvwiki zili mbozibede kasola kutalisya ciiyo ca Bbaibbele mulweendo lwakusaanguna, imucizi oyu wakatalisya ciiyo kumusimbi wakali kupailila kuti agwasigwe.
11 Ciindi nomuteelela makani aabikkilizya lulayo lwamu Bbaibbele kujatikizya kusala nkomucita, sena inga mulimvwa kuti ngu Jehova waambaula kulindinywe cakumugama? Mukwesu umwi mbwaakalimvwa oobo. Wakati: “Caino-ino kumuswaangano kwakali makani kwalo mukwesu nkwaakabandika misyobo yakulikondelezya iili kabotu ku Banakristo alimwi ayeeyo iitali kabotu. Ndakali kuyandisya kweebelela muzundano wacikweya acipekupeku. Pele nowakamana muswaangano oyu ndakabona kuti kweebelela cisobano eci kwakali kulikondelezya kutali kabotu ku Banakristo. Aboobo ndakacileka lino.” Inzya, nokuba kuti mukwesu oyu wakali kuciyandisya cintu cabulwani, cakulicesya wakazumina kusololelwaa Jehova.—Int. 11:5.
12 Muswaangano Wabuleya, Ciiyo ca Ngazi Yamulindizi Alimwi a Ciiyo Cabbuku Cambungano: Makani aabuleya ngotuswiilila mvwiki amvwiki abandika mitwe yamakani aamu Bbaibbele asiyene-siyene. Ino makani aya amugwasya buti? Mwaalumi umwi Munakristo wakaamba boobu kujatikizya lugwasyo ndwaakajanide: “Makani amwi aabuleya akakankaizya micelo yoonse yamuuya. Mwaambi kalyaamba mwini, wakaamba kuti kutegwa ajane micelo eyi, wakali kusala kubelekelaa mucelo omwe kwamvwiki yomwe. Kumamanino amvwiki wakali kulilingula akubona mbwaakacita mukutondezya bube obo mubukkale bwakwe bwabuzubaa buzuba. Mpoonya wakali kubelekelaa bube bumbi mvwiki iitobela. Ndakaukkomanina oyo muzeezo mpoonya ambebo ndakatalika kucita oobo.” Ninzila mbotu kaka eyi yakubelesya zintu ziyiigwa!
13 Ciiyo ca Ngazi Yamulindizi cilatuyiisya kubelesya njiisyo zyamu Bbaibbele mumbazu zisiyene-siyene zyabuumi bwesu. Eci cilatugwasya ikubaa mizeezo alimwi amyoyo ikkalikene nokuba kuti tujisi mapenzi manji mubuumi. Ciiyo ca Ngazi Yamulindizi alimwi cilatugwasya ikweendelaamwi akasimpe kayaabuyaambele. Mucikozyanyo, sena teetwakagwasigwa aciiyo camuzibalo zya Ngazi Yamulindizi yamu May 1, 1999 zyalo zyakajisi mitwe yakuti: “Makani aya Aleelede Kuba,” “Oyo Uubala Amvwisye” alimwi “Amupakamane Alimwi Amusungwaale!” Mbuti ziiyo ezi nywebo lwenu mbozyakamugwasya? Sena mulatondezya kwiinda mumicito yanu kuti mulakutobela kucenjezya kwa Jesu kujatikizya ziyoocitika kumbele? Sena mulalibambila kuyoozunda misunko iili kumbele elyo twaakubona “cisesemyo cabusaale . . . ciimvwi mubusena busalala”? (Mt. 24:15-22) Sena mbaakani zyanu alimwi abuumi bwanu zitondezya kuti kusalazya zina lya Jehova ikutali kulijanina zintu zyakumubili ncecintu cipati mubuumi bwanu? Sena tatugwasigwi lino alwiiyo ndotwiiya mu Ciiyo ca Ngazi Yamulindizi?
14 Amuyeeye buyo kuvwula kwazintu nzyotwiiya mu Ciiyo Cabbuku Cambungano mvwiki amvwiki. Lino tuli mukwiiya bbuku lyamu Bbaibbele lya Daniele. Mumyezi yone njotwaiya bbuku eli lyamu Bbaibbele, sena lusyomo lwesu taluyumizigwi mvwiki amvwiki? Mbubwenya mbuli Daniele musinsimi wa Jehova uyaandwa, lusyomo lwesu lulayumizigwa kutegwa tuzumanane.
15 Jehova Utuyiisya Kuba Bantu Bakkomene Mubuumi: Tatuciswi myoyo akaambo kakuti tulaibikkila maanu milawo ya Leza. Kunze lyaboobo, tulakondwa kuziba ncocaamba ikuba bantu bakkomene mubuumi. Akaambo kakutobela lulayo lwa Jehova, tulatola lubazu mumulimo wakwe ikutali kuba bantu balangilila buyo. Alimwi abo ibabeleka mulimo wa Leza mbabantu balongezedwe.—1 Kor. 3;9; Jak. 1:25.
16 Kumiswaangano yambungano, amuyeeyesye mbomunga mwazicita ezyo nzyomumvwa kumiswaangano yambungano. (Joh. 13:17) Amumubelekele Leza cakukondwa amoyo wanu woonse. Lukondo lwanu luyoovwula kapati. Muyoobaa buumi bulaa mpindu kapati. Inzya, munooligwasya nobeni.