Lwiiyo Lwakunyika Mbolujatikizya Makanze Aanu Aakumuuya
1 Ikuti naa mwajana lwiiyo lwantalisyo ilweelede nomucili bana baniini inga camugwasya kubaa luzibo lunga lwamugwasya kuti kamubala akulemba kabotu alimwi akuteelela lwiiyo lwabube bwanyika (geography) alwamakani aansiku (history), anamba alimwi asayaansi. Eezi inga zyamuyiisya kuyeeya kabotu, akulingula twaambo akujana nzila zyakumana mapenzi alimwi akupa mizeezo iigwasya. Ilwiiyo luli boobu luyakumugwasya mubuumi bwanu boonse. Ino mbuti lwiiyo lwanu lwakunyika mboluswaangene amakanze aanu aakumuuya alimwi ambolunga lwamugwasya kubaa “maanu abusongo”?—Tus. 3:21, 22.
2 Amube Bantu Bayandika Mumulimo wa Leza: Nomucili kucikolo amubikkile maanu kuzintu nzyomwiiya alimwi imilimo njomupegwa yakucitila kuŋanda amwiicite kabotu. Ikuti mwayiya kubala kabotu, inga camuubaubila kulanga-langa ijwi lya Leza alimwi eci inga camupa kuti muyume munzila yakumuuya. (Inc. 17:11) Iluzibo lunji lulamugwasya kuziba mbobeendelezegwa bantu baandeene-andeene, alimwi abalaalusyomo lusiyene-siyene mbomuswaanganya mumulimo wamumuunda. Ilwiiyo ndomujana kucikolo lulamugwasya nomucita milimo yanu ya Bunakristo mumbunga ya Leza.—Amweezyanisye 2 Timoteo 2:21; 4:11.
3 Amwiiye Kulibonena: Ikuti naa mwabeleka canguzu, mulakonzya alimwi kwiiya milimo iinga yamugwasya kulisanina nomwamanizya cikolo. (Amweezyanisye 1 Timoteo 5:8.) Amusale ziiyo zibotu. Muciindi cakusala lwiiyo lukatazya kujana milimo, amusole kubaa luzibo naa lwiiyo ilunga lwamugwasya kujana mulimo weelede kuli koonse. (Tus. 22:29) Ilwiiyo luli boobu luyakumupa kuti mukakonzye kulibonena kuti naa mwayeeya kuyoobelekela kubusena kuyandika lugwasyo kapati.—Amweezyanisye Incito 18:1-4.
4 Ikujana lwiiyo lwantalisyo ilweelede nomucili kucikolo inga camugwasya kuyaambele mumulimo wanu. Amubeleke canguzu kujana luzibo ilunga lwamugwasya kulibonena nomusola kuyaambele mumulimo wa Jehova. Mwacita boobo, ilwiiyo lwanu luyoomugwasya kuzuzikizya makanze aanu aakumuuya.