Ncinzi Ncomunga Mwamwaambila mu Bbuda?
1 Mumasi aamwi ibantu bainda kucisela akati kabaabo babbapatizigwa mba Bbuda. Ino ncinzi cileta bantu aba kukasimpe? Ino inga mwamukambaukila buti makani mabotu mu Bbuda?
2 Amumutondezye Luyando Lwini-Lwini: Ibunji bwabaabo ibakali ba Bbuda baamba kuti takuli kukambaukilwa kabotu kwakabaleta mukasimpe pe. Nduyando ndobakatondezegwa ilwakabakulwaizya. Umwi mukaintu waku Asia uukkala mucisi ca United States wakamunjila kapati muuya wakusamausya ngwaakatondezegwa amucizi umwi iwakamusikila cakuti wakazumina kwiiya. Taakali kucikanana kabotu Cingisi, pele mucizi oyu wakamukkazikila moyo. Iciindi mukaintu naakakatede naa naatakali kukonzya kwiiya, mucizi oyu wakali kuswaya buyo akupangana anguwe nobayoocita ciiyo citobela. Nokwakainda ciindi mukaintu oyu abana bakwe basankwa bobile alimwi abanyina bacembele bakabbapatizigwa. Wakabweeda kucisi nkwaakazyalilwa, ooko nkwaakaakugwasya bantu banji kwiiya kasimpe. Umwi mwanaakwe musankwa lino ubelekela kuofesi lyamutabi. Ikutondezya ‘buuya bwa Jehova aluyando lwakwe kumuntu cakaleta zilongezyo’!—Tit. 3:4.
3 Ilusyomo lwaba Bbuda: Iba Bbuda kanjikanji mbantu batakwe makani azintu nzyobasyoma bamwi, pele tabaciboni kuba cintu ciyandika kutobela njiisyo yomwe. Aboobo zintu nzyobasyoma zilaindana kumuntu amuntu. Icintu comwe ncobayiisya mulwiiyo lumwi lwaba Bbuda ncakuti buumi buzwide mapenzi, pele kwiinda muluzibo muntu ulakonzya kukulesya kuzyalululwa mubuumi butakkomanisyi. Kwaambwa kuti muntu kutegwa aleke kuzyalululwa, weelede kusika aciimo citegwa Nirvana icitakonzyi kupandululwa nkaambo tabuli busena naa cintu cimwi cicitika pele nciimo citajisi cintu cili coonse icitamvwugwi kucisa alimwi icitakwe bubi. (Amubone Ncinzi Cicitika Kulindiswe Twafwa?, mapeeji 9-10.) Ino eci citwaambila nzi? Citwaambila kuti tacigwasyi kukazyanya abantu mutwaambo tujatikizya busongo bwaba Bbuda. Pele amubandike mapenzi aapenzya bantu boonse.
4 Amukankaizye Zintu Nzyomuyanda Nyoonse: Mbwaanga iba Bbuda kanjikanji buumi babubona kuti mbwamapenzi aanyika, ikusyoma kuti bantu balakonzya kupona kukabe kutamani bacibona kuba bufwubafwuba. Nokuba boobo, toonse tulayanda kupona bukkale bwalukkomano mumukwasyi, akuti mapenzi ngotupenga akagwisigwe alimwi tuyanda kuziba mpindu yabuumi. Amubone zintu nzyotuyanda toonse mbozinga zyabandikwa.
5 Inga mwasola ntalisyo eeyi yamakani:
◼ “Sunu tupona munyika bantu banji mobaile kupenga. Ncinzi ncomuyeeya kuti cilayandika kumana mapenzi aapenzya bantu boonse? [Amulindile kwiingula.] Kuli cisyomezyo cansiku icindikkazika moyo. [Amubale Ciyubunuzyo 21:4.] Iciindi eco nocitanasika, tee inga twayanda kuyoobako caakusika?” Mpoonya amumutambikie bbuku ilipandulula mapenzi mbwaayoomana.
6 Kumuntu mupati inga mwaamba kuti:
◼ “Ambweni andinywe mulilibilikide mbuli ndime amaanu mabi aavwula ibana besu sunu ngobalimukwiiya alimwi ambwaabacita kuti babe. Nkaambo nzi bwaamu ncobwavwula akati kabana baniini? [Amulindile kwiingula.] Sena mulizi kuti zintu ezi zyakasinsimwa mubbuku ilyakatalikwa kulembwa kaindi kakutanatalikwa zikombelo zyaba Mozilemu, azya Banakristo alimwi azyaba Hindu? [Amubale 2 Timoteo 3:1-3.] Eezi zintu zilacitika nokuba kuti bantu baluujisi kwiiya. [Amubale kapango 7.] Eeli bbuku lyakandigwasya kuteelela makani aakasimpe bantu banji ngobatazibi. Sena mulayanda kulibala?” Amumutambikizye bbuku naa broshuwa lyeelede.
7 Iba Bbuda kanjikanji balalilemeka Bbaibbele kuti ndibbuku lisetekene. Aboobo amubale kuzwa mulindilyo. (Heb. 4:12) Ikuti naa muntu wabonekaanga tamvwi kabotu kujatikizya Bbaibbele nkaambo uyeeya kuti lyakalembwaa bamakuwa, amumwaambile kuti ibakalemba Bbaibbele tabali bamakuwa pe, mmusyobo wabantu bazwa ku Asia.
8 Mabbuku nzi Aabeleka Kabotu? Kuli katulakiti kamutwe wakuti Will Suffering Ever End? ikakalembelwa ba Bbuda ikamumwaambo wa Cichainizi, a Cijapanizi a Cisinihalizi alimwi a Cithai. Kunze lyaboobo basikumwaya banji bazwidilila kubelesya mabbuku aaya aakuti: Mankind’s Search For God alimwi a Inzila Yakujana Lukkomano Mumukwasyi, a Questions Young People Ask—Answers That Work; alimwi amabroshuwa aakuti “Amubone! Ndalengulula Zintu Zyoonse Zibe Zipya,” alimwi a Ino Buumi Bujisi Mulimonzi? Mbubuti Mbomunga Mwaujana? Alimwi kuti naa katuciliko inga mwatumwaya tumatulakiti twa Makani aa Bwami No. 35, Mwati Kuli Nobayooyandana Buya Bantu Boonse? Ibunji bwaba Bbuda ibayiya kasimpe lino bayiya broshuwa ya Ncayanda kusaanguna nobaya baye mubbuku lya Luzibo.
9 Nokuba kuti kwaambwa kuti kwakaindide kale myaka iitandila ku 400 bamishinali ba Cibuda kabasikide mudolopo lya Athens, Paulo naakatalika kukambauka oomu mubusena, takuzizilwe kabotu naa kuli naakaswaanganizide muntu walusyomo lwa Cibbuda. Pele tulizi Paulo mbwaakali kulimvwa kujatikizya kukambaukila bantu bamisyobo yoonse. Wakalicita “muzike wabo boonse,” kutegwa abe “mwaabilanwa abo mulingao [makani mabotu].” (1Kor.9:19-23) Aswebo inga twacita obo kwiinda mukutondezya luyando kubantu alimwi akukankaizya bulangizi mbotulaabo toonse notukambauka kumuntu uuli woonse ngotuswaanganya.