Amulange-Lange Ijwi lya Jehova Abuzuba!
1 Lusyomo lwanu lulasunkwa munzila zyaandeene-andene buzuba bumwi abumwi. Muntu ngomuzibene limwi wanyika ambweni umusinikizya kuti muunke limwi kukusobana. Ibayi banu bayanda kuti mutole lwiiyo lwakunyika mulimo wamali manji, naa beendelezi banu kumilimo bayanda kuti kamubeleka kwamaoola manji. Ambweni mwatalika kuciswa-ciswa. Nokuba kuti masunko aali boobo inga amusikila ciindi cili coonse, tamuli mulikke. Jehova ulilibambilide kumupa luzibo luyandika kuzunda masunko aaya. Ikulanga-langa lugwalo lwamu Bbaibbele alimwi abupanduluzi mukabbuku ka Kulingaula Magwalo, ninzila imwi njomukonzya kwiiya Jwi lya Jehova lyoonse. Sena mulacibelesya cipego eci?
2 Lugwasyo Nkoluli: Ibbuku lya Isaya 30:20 Jehova limwaamba kuti ngo “Mwiiyi” kwalo bantu ba Leza nkobakonzya kujana lugwasyo. Ulamupa zyoonse nzyomuyandika kutegwa mucikonzye kulwana buyumuyumu mbomunga mwajana mulusyomo lwanu. Munzila nzi? Kapango katobela kaamba kuti: “Matwi aako ayoomvwa ijwi kusule lyako liti, Njeeyi inzila, amweende mulinjiyo.” Jehova sunu ‘ulaambaula’ kwiinda mu Magwalo alimwi amabbuku ‘aamuzike musyomesi.’ (Mt. 24:45) Kuli busongo bunji kapati muzibalo zyamusyule zya Ngazi Yamulindizi zijisi makani aamba zyabukkale buli boonse bwa Bunakristo. Ikwiindulula zibalo izizubulwidwe mukabbuku ka Kulingaula Magwalo cipa kuti mube aluzibo lunji kapati ilugwasya mukulwana masukusyo aandeene-andeene.—Is. 48:17.
3 Amujane Ciindi Cakulibala: Nokuba kuti wakali kujata bubi mafwumofwumo, imutumbu umwi wakali kusola kapati kubala akubandika lugwalo lwabuzuba alimwi acibalo cisindikizya amwanaakwe musankwa ciindi nalya cakulya camafwumofwumo. Majwi aaya antoomwe amupailo ngamajwi aakucaalizya ngaakali kumvwa mafwumofwumo lyoonse katanaunka kucikolo. Akamuyumya kukaka koongelezegwa koonana abasimbi, akutatola lubazu mumakani aakusumpula cisi cokwabo, pele wakayuma akukambaukila basicikolonyina abamayi cabusicamba. Nokuba kuti wakali ngo Kamboni alikke kucikolo, taakalimvwa kusweeka pe.
4 Amusyome Jehova alimwi a Jwi lyakwe kuti musololelwe. Mwacita boobo, Jehova uyooba muntu wini-wini kulindinywe mbuli mweenzinyoko uusyomeka. Amubandike anguwe abuzuba! Inywebo antoomwe atuulunzuma twabantu nyika yoonse mbwiizulwa itulingula Jwi lya Leza, meso aanu aabe ‘meso ayoobona Mwiiyi wanu.’