Sena Mulajana Ciindi ca Kulingaula Magwalo Abuzuba?

Sena kubala lugwalo lwabuzuba mukabbuku ka Kulingaula Magwalo Abuzuba ncimwi cazintu nzyomucita abuzuba kutegwa muswene kuli Jehova? Kuti naa pe, sena inga tiimwatalika kucita oobo? Banji balabala lugwalo lwabuzuba kuseeni kutegwa kabayeeya kujatikizya nzyobabala buzuba boonse nobabeleka milimo yabo yabuzuba abuzuba. (Jos. 1:8; Int. 119:97) Ino mbuti mbomukonzya kugwasyigwa kapati ku Lugwalo lwabuzuba? Amubale majwi aayengelede kapango kutegwa muzyibe caambwa. Amusoleke kuyeeya zibalo zyamu Bbaibbele izitondezya njiisyo yaambwa mulugwalo. Mpoonya, amwiibelesye njiisyo eeyo mubuumi bwanu. Ciindi Jwi lya Leza nolyeendelezya zyakusala zyanu, liyoomusololela mubuumi bwanu alimwi muyoogwasyigwa kapati.—Int. 119:105.

Bamikwasyi ya Beteli nyika yoonse balaba aciindi ca Kulingaula Magwalo Abuzuba ciindi nobamana kulya cakulya cakuseeni. Mumyaka yainda, mibandi minji iibandikwa yali kubikkwa a JW Broadcasting^® acibeela cakuti MISWAANGANO AZICITIKA. Ino ndiilili nomwakaswiililide mubandi umwi akati kanjiyo? Ambweni mibandi imwi inga yamugwasya nywebo kumugama. Mucikozyanyo, ino cibalo cijatikizya Loti inga camugwasya buti muzintu nzyomusala?

AMWEEBELELE KAVIDIYO KAKUTI MUTAYANDI NYIKA (1JOH. 2:15), MPOONYA MWIINGULE MIBUZYO IITOBELA:

• Ino ninjiisyo nzi yamu Bbaibbele aayeeme mubandi wa Kukomba Kwamafwumofwumo ooku?

• Mbuti cibalo caamba zya Loti mbocitondezya ntenda iiliko mukuyandisya nyika naa zintu zili mumo?—Matl. 13:12; 14:12; 19:3, 12, 13, 24-26

• Ino inga twatondezya buti kuti tulamuyanda kapati Jehova ikutali nyika naa zintu zili mulinjiyo?