Mulongo Wazyakucita Zyamukwasyi—Lugwalo lwa Buzuba
1 Ibazyali basiluyando balasoleka kapati abuzuba kusanina bana babo zyakulya zijisi busani. Nokuba boobo, kubasanina zyakulya zyakumuuya zijisi busani kuzwa mu Jwi lya Leza kulayandika kapati. (Mt. 4:4) Inzila imwi momunga mwagwasya bana banu kuti bayandisye cakulya cakumuuya kutegwa ‘bakomene akufwutulwa’ nkwiinda mukutola ciindi cili mbocibede abuzuba cakulanga-langa lugwalo lwa buzuba amakani aalusindikila amukwasyi. (1 Pet. 2:2) Ndilili nomunga mwacita boobu?
2 Ciindi Cakulya: Ikusaanguna kubandika ilugwalo cifwumofwumo, kulakonzya kugwasya mukwasyi wanu kuyeeya Jehova buzuba boonse. (Int. 16:8) Imutumbu umwi wakali kusola kubala akubandika ilugwalo amakani alusindikila amwanaakwe musankwa eelyo naakali kulya cakulya camafwumo-fwumo alimwi akupaila anguwe katanaunka kucikolo. Eeci caamuyumya kutegwa atatoli lubazu mumakani akusumpula cisi cokwabo, koongelezyegwa akoonana abasimbi alimwi cakamupa kuti akambaukile basicikolonyina abamayi cabusicamba. Nokuba kuti wakali ngo Kamboni alikke acikolo, tanaakalimvwa kusweeka pe.
3 Ikuti naa kacitakonzyeki kubandika lugwalo lwa buzuba cifwumo-fwumo, inga mwalulanga-langa amukwasyi aciindi cimbi ambweni nomulya cakulya cakumangolezya. Aciindi eeci ibamwi balabandika zyakuluula zyamumulimo wamumuunda alimwi atwaambo twakabakkomanisya mukubala Bbaibbele. Ibanji baamba kuti ziindi zili boobu nobalya cakulya cakumangolezya nzeziindi zibakkomanisya kapati nobakkala antoomwe amukwasyi.
4 Masiku: Kumikwasyi imwi, ciindi cibotu ncobajana cakulanga-langa lugwalo lwa buzuba ndeelyo kabatanaunka kukoona. Eeci cilakonzya kuba ciindi cibotu cakupaila antoomwe. Eelyo bana banu nobaswiilila lyoonse kamwambaula kujatikizya Jehova alimwi akupaila kuli nguwe, ulaba muntu mwini mwini kuli mbabo.
5 Jehova aakulongezye kusoleka nkomucita kuti muyiisye bana banu kasimpe mbomukabelesya kabotu kabbuku ka Kulingaula Magwalo Abuzuba