Sena Muli Basikwaambilizya Bwami Baciindi Coonse?
1 Toonse twakakkomana kumvwa kuti mweelwe wabasikumwaya mu Zambia wakasika ku 107, 233 mu August 1999. Kwakali kusoleka akukamantana kwamasimpe! Kulibonya kuti mumyezi yakatobela, bamwi bakajana buyumu-yumu mukuba basikumwaya ba Bwami balyoonse, nkaambo kuzwa ciindi eeco mweelwe waakati-kati wamwezi amwezi uli buyo aa 92,000. Eeci citondezya kuti sikumwaya omwe akati kabali 7 taku nacita lipooti kuti ulatola lubazu mumulimo amwezi. Tusyoma kuti majwi atobela aya aakukulwaizya inga agwasya kumana penzi eeli.
2 Atutondezye Kulumba Kucoolwe Ncotujisi: Kulumba kwesu kweelede kuba kwamasimpe kucoolwe ncotujisi cakubaa lubazu lwakwaambila bamwi makani mabotu aa Bwami. Ooyu mulimo upa kuti moyo wa Jehova ukkomane alimwi ugwasya babombe myoyo kwiiya nzila iisololela kubuumi. (Tus. 27:11; 1 Tim. 4:16) Ikukambauka lyoonse kuyungizya luzibo lwesu mumulimo wabukambausi walo uuletela kukondwa alimwi akuzwidilila.
3 Amulembe Lipooti ya Mulimo: Bamwi akati kabaabo batola lubazu mumulimo wamumuunda tabalembi lipooti ya mulimo wabo muciindi ceelede. Tatweelede kulimvwa kuti mulimo wesu tuukonzyi kulipootwa pe. (Amweezyanisye a Marko. 12:41-44.) Tuleelede kulemba lipooti yamulimo amawola ngutwakabeleka! Ikuti katujisi bubambe bwa kulemba akkalenda iciindi ncitwabeleka mumulimo kuŋanda, kuya kupa kuti katuyeeya kukulemba lipooti cakufwambaana muciindi ceelede kumamanino aamwezi uli woonse.
4 Amupe Lugwasyo Luyandika: Mulakonzya kusumpula bubambe mbomujisi ooko nkomuzwa bwakugwasya baabo bayandika lugwasyo lwakuti kabatola lubazu mumulimo lyoonse. Mulembi wambungano alimwi abasikucitya ciiyo cabbuku beelede kubamba bubambe abasikumwaya balaa luzibo kutegwa bagwasyilizye. Kuti kamujisi basikumwaya batanabbapatizigwa bana naa basikwiiya Bbaibbele ibali mbaasikumwaya, mweelede kubayiisya kulemba lipooti yamulimo wabo mwezi amwezi.
5 Mucibalo ca Ngazi Yamulindizi yamu October 1, 1997 yamu Chichewa caamba zyabuumi bwamucizi Ottilie Mydland waku Norway wakaba sikumwaya wamakani mabotu waciindi coonse kuzwa kataninga bbapatizigwa mu 1921wakuti: “Ndililumbide Kuti Ndali Mukubelekela Jehova Kwaciindi Cilamfwu.” Nikwakainda myaka iili 76 kuzwa leelyo, lino kalaa myaka iili 99 wakaamba kuti: “Ndilabotelwa nkaambo ndicicikonzya kuba sikumwaya waciindi coonse.” Cabota ciimo kaka ncibeelede kutobela babelesi ba Jehova boonse!