Sena August Ulaba Mweezi Wakuzwidilila Kwiinda Yoonse?
1 Mwaka wa 1963 wakali mwaka wakuzwidilila kwiinda myaka imbi yoonse kubantu ba Jehova. Sena mulizi kuti nkaambo nzi? Wakali ngomwaka imweelwe wabasikumwaya nyika yoonse mbwiizulwa nowakasika kukaulunzuma komwe. Ikuti kakuli mwakali mukasimpe kale ciindi eco, mulayeeya mbotwakakkomana cini-cini ikubaa bantu banji boobo ibakambauka mulumbe wa Bwami! Ono, mu United States mulikke mujanika mweelwe wabasikumwaya uli boobo alimwi mu Zambia mweelwe usika ku 100,000. Pele, mwezi amwezi akati-kati ibali 20,000 akati kandiswe kwiina notutola lipooti yakuti twakatola lubazu mumulimo.
2 Amubuzumine Buyumuyumu: Mu August tusoleka kuzumanana amweelwe uuyinda kuli basikumwaya ibali 100,000 mu Zambia. Ikuti kusoleka kwesu kuzwidilile, ncobeni August ulaba mweezi wakuzwidilila kwiinda myeezi yoonse! Tulakonzya kucita obu ikuti toonse twacita lubazu lwesu.
3 Aabo ibalibambilide kubaa lweendo lwakuya kumuswaangano balakonzya kutola lubazu mumulimo kacitanasika ciindi cakuyumuka. Amubwezelezye matulakiti, mabroshuwa naa mamagazini aali mbwaabede ikutegwa mukape bumboni kubantu mbomuyooswaanganaabo muciindi eco ncomutanooli kumunzi. Aleelyo nomwasika kubusena nkomuya, mulakonzya kutola lubazu mumuunda abasikumwaya banyenzi kubusena oko.
4 Ikuti muli muciimo cibyaabi cakutakonzya kucita cili coonse, nociba ciindi eci mulakonzya kutola lubazu mumulimo munzila imwi. Mulakonzya kupa bumboni kuli bamadokotela, bamanesi, nobaba baabo ibamuswaya. Ambweni mulakonzya kupa bumboni kwiinda mukulemba ŋwadi naa mukuumya luwaile.
5 Cakutadooneka bamwi inga bakukkomanina kugwasilizyigwa ikutegwa batole lubazu mumulimo wamumuunda mu August. Baalu, bakutausi alimwi abacitya ziiyo zyabbuku beelede kucita bubambe obu ikutegwa lugwasyo olu lucitwe. Pele ziyume zitete, mutalubi kutola lipooti yamulimo wanu wamumuunda cakufwambaana kumamanino aamweezi ikutegwa mukabe umwi uubalilwa akati kabasikumwaya mu August.
6 Amucikkomanine Coolwe Eci: Imulimo wamumuunda ‘ncintu cibotu ncotwakapegwa.’ (2 Tim. 1:14) Tulacikkomanina coolwe ncotwakapegwa cakukambauka makani mabotu. (1 Tes. 2:4) Iciindi notuyeeya zintu zyoonse Jehova nzyaatucitila, tweelede kukulwaizyigwa kunootola lubazu lyoonse mwaka woonse mbuubede mumulimo ooyu uuyandika kapati kwiinda yoonse. Tatweelede kuzumizya cintu cili coonse kutusinkila kunookambauka lyoonse. August wakono atuucite kuba mweezi wakuzwidilila mumulimo wa Jehova kwiinda myeezi yoonse alimwi atukanze kuzumanana kukambauka makani aajatikizya nguwe mweezi amweezi iitobela kumbele!—Int. 34:1.