Zyuulu Zili Mwaanda!

Ooyo ngomweelwe wabasikumwaya ngotuyanda kuti bakape malipooti aabo mu Zambia mu August 1998. Sena tulangilwa kuti inga twausika? Inzya! Imweelwe waino mumbungano zili muzyooko zili 9 zyacisi utondezya basikumwaya ibali 109,809. Nokuba boobo, imweelwe mupya waatala iwakasikwa mumweezi omwe mu August 1997 wakali 96,686. Mbuti mbotunga twawiinda mweelwe oyo? Cilakonzya kucitwa ikuti naa sikumwaya umwi aumwi mumbungano walibambila kutola lubazu mumuunda mu August alimwi akufwambaana kupa lipooti yamulimo oyo. Mbwaanga mazuba obile mataanzi aamweezi oyu ali mu Mujibelo amu Nsondo, ino nkaambo nzi kutalibambila kutola lubazu mumulimo wamumuunda kutalikila ciindi cansondo eco? Mumvwiki njomunooli kumuswaangano, mulakonzya kucita bumboni bwamukwiizya mudolopo muyoocitilwa muswaangano. Kwiinda mukufwambaana kutola lubazu mumwezi, kwiina notuya kwaalilwa kubeleka ciindi cili mbocibede mumulimo wakupa bukamboni mu August. Kuti naa twabelekelaamwi, tweelede kuyoobaa mweelwe waatala mupya wabasikumwaya uutanasikidwe uuyindaa 100,000 ciindi cakusaanguna mu Zambia. Elo kuyooba koompolola kutaambiki kaka oko kwakutembaula Jehova!—Int. 47:1.