“Abasaangune Kulangililwa Mbobacita”—Munzila Nzi?
1 Mbwaanga mbunga ya Jehova iyaabukomena, lyoonse kuyandika bakwesu beelela kubeleka kabali bakutausi. Ibunji bwabakwesu batanasalwa kubikkilizyaa bakubusi, balayandisisya kukutauka milimo mumbungano. Eelyo nobapegwa mulimo wakucita uuyungizidwe, balimvwa kuti balaampindu alimwi akuti bazuzikizya mulimo umwi uuyandika. Ikuyaambele kwabo kuyeeme ‘akusaanguna kulangililwa mbobacita.’ (1 Tim. 3:10) Muunzila nzi mbocinga cacitwa eeci?
2 Mulimo wa Baalu: Mukusola kulangilila mukwesu mbwacita kweelana azyeelelo zyamu Bbaibbele zijanika kuli 1 Timoteo 3:8-13 kujatikizya bakutausi, ibaalu bayoomulangilila mukwesu mbwacita naa inga wacikonzya kuulanganya mukuli. Balakonzya kumupa mulimo wakugwasilizya mbuli wakwaabila mamagazini alimwi amabbuku, ikulanganya mincini yakwaambawida, ikusalazya Ŋanda ya Bwami azimbi buyo. Ibaalu bayoomulangilila mbwacita ambwailanganya milimo njapedwe. Bayoomulangilila naa ulasyomeka, tamuki kucita mulimo ngwapedwe, munkutwe, ulalicesya, ulaa muuya wakulyaaba alimwi ulamvwana akubeleka kabotu abamwi. (Flp. 2:20) Sena upa cikozyanyo cibotu mukusama kwakwe alimwi akulibamba? Sena mmuntu uubikkila maanu kumukuli ngwapedwe? Bayanda kubona “mbwiibede milimo yakwe kukweenda kabotu, alimwi abe amoyo mubombe wabusongo.” (Jak. 3:13) Sena uleelela ncobeni kugwasilizya mumbungano? Sena ulautobela mulawo wa Jesu ‘wakuyiisya bantu’ kwiinda mukutola lubazu mumulimo wamumuunda cabunkutwe?—Mt. 28:19; amubone Ngazi Yamulindizi yamu Chichewa yamu September 1, 1990, amapeeji 18-28.
3 Nokuba kuti kunyina myaka Ibbaibbele njolibikkide umwi nakonzya kusalwa kuba mukutausi, mukutausi, bakwesu aaba libaamba kuti ‘mbaalumi babeleka kabotu.’ Baalumi aaba tabakonzyi kuti kabali bakubusi batalika kukubuka, akaambo kakuti kweelena ambokwaambidwe, ibaalumi aaba balakonzya kabali amukaintu alimwi abana. (1 Tim. 3:12, 13) Baalumi aaba tabeelede kuba baabo batobela “zisusi zyabwanike,” pele beelede kulilemeka, kabalaa mpuwo mbotu alimwi amanjezyeezya mabotu mumeso a Leza alimwi abantu.—2 Tim. 2:22.
4 Nokuba kuti luzibo lwakucita zintu kabotu muntu ndwajisi lulayandika, iciyandika kapati ninzila mbwaucita mulimo alimwi ambwaulanga. Sena mukwesu uyandisya kutembaula Leza cakulicesya alimwi akubelekela ibanyina? Ikuti kacili boobo, Jehova uyoomulongezya mukusola-sola nkwacita kutegwa ayaambele mumbungano.