Amube Bantu Baswiililisya
1 Ikutegwa umwi aswiililisye, ikulyeendelezya kulayandika. Alimwi sikuswiilila weelede kubaa luyando lwakwiiya alimwi akugwasigwaa makani ngaamvwa. Nkakaambo kaako Jesu ncaakakankaizya mbokuyandika ‘ikucenjela ambomumvwa.’—Lk. 8:18.
2 Eeci cilayandika kapati caboola kumakani aakujanika kumiswaangano yambungano alimwi aleelo notuli kumiswaangano mipati. Eezi nzyeziindi notuyandika kuswiilila kabotu. (Heb. 2:1) Nkooko lino atubone twaambo tumwi tukonzya kumugwasya kuba bantu baswiililisya kumiswaangano eeyi ya Bunakristo.
◼ Amuuzibe mulimo wamiswaangano eeyi. Nenzila mpati ‘motuyiisigwaa Jehova’ kwiinda mu “mubanzi uuzi uusyomekede.”—Is. 54:13; Lk. 12:42.
◼ Amulibambilile limwi. Amwaalange-lange makani ayoobandikwa alimwi amubone kuti mulijisi Bbaibbele alimwi abbuku naa magazini yanu nobeni iyooyiigwa.
◼ Nomuli kumiswaangano, amubikkile maanu kukutobela zili mukubandikwa. Mweelede kweeleba ciyanza cakubandikaa bantu mbomukkede limwi alimwi akulanga-langa nzyobacita bamwi. Amubone kuti tamunyonganizigwi akuyeeya nzyomutiicite wamana muswaangano naa zintu zimbi zyanu nobeni.
◼ Amwaalange-lange makani aali mukubandikwa. Amulibuzye kuti: ‘Ino eeci caambwa cindijatikizya buti? Ino ndilili nondeelede kucicita?’
◼ Amulembe twaambo mubufwaafwi twamakani aabandikwa kubikkilizyaa magwalo. Eeci ciyoomugwasya kubikkila maanu kuzintu zibandikwa alimwi akwiibaluka twaambo ntomunga mwabelesya aciindi cimwi.
3 Amubayiisye Kuswiilila Bana Banu: Bana bayandika malailile aakumuuya. (Dt. 31:12) Mumazubaa nsiku, “boonse ibakakonzya kuswiililisya” akati kabantu ba Leza bakeelede kubikkila maanu ku Mulawo ciindi nowakali kubalwa kuli mbabo. (Neh. 8:1-3) Ikuti bazyali kabajatikizidwe mumiswaangano alimwi akubikkila maanu, bana babo abalo balalangilwa kucita mbubonya. Tacili cibotu ikuletelezyaa zidooli naa mabbuku aajisi zifwanikiso kutegwa bana kabapenta. Acimwi cibanyonganya kuswiilila bana nkweendeenda kuya kucimbuzi. Mbwaanga “bufubafuba bulaangidwe mumoyo wamwana,” ibazyali beelede kusoleka kubona kuti bana babo balakkalikila akuswiilila ciindi nobali kumiswaangano.—Tus. 22:15.
4 Kwiinda mukuba bantu baswiililisya, tutondezya kuti ncobeni tuli basongo alimwi akuti tuyanda “kuliyungizizya lwiiyo.”—Tus. 1:5.