Miswaangano Mipati—Nciindi Cakusekelela!
1 Imiswaangano mipati ya Bakamboni ba Jehova nziindi zyakusekelela kapati. Kwamyaka iinda kumwanda yainda, miswaangano eyi yajatikizigwa kapati kukuyungizyika kuli mukucitika mumbunga yesu. Kuzwa kumatalikilo noyakali nsyoonto buyo, twabona zilongezyo zya Jehova mumulimo wesu wanyika yoonse. Lyamuswaangano wesu wakusaanguna mumazubeesu ku Chicago, Illinois mu 1893, ibali 70 akati kabantu bali 360 bakajanika bakabbapatizigwa kutondezya kulyaaba kwabo kuli Jehova. Mwakali, Miswaangano Yacooko ya “Basikucita Zyaambwa mu Jwi lya Leza” yakatobelana yakajisi bantu bakajanika antoomwe nyika yoonse mbwiizulwa ibali 9,454,055, ibali 129,367 bakabbapatizigwa. Elo kaka eci citupa kusekelela!
2 Kuzwa buyo kuciindi ca Bbaibbele, ikubungana kwabantu ba Leza kwapa coolwe citaliboteli cakutambula malailile kuzwa kuli Jehova. Kuciindi ca Ezara alimwi a Nehemiya, ibantu bakaswiilila nowakali kubalwa Mulawo “kuzwa kucifumofumo kusikila isikati.” (Neh. 8:2, 3) Akaambo kakuti bakaba alumvwisyo lubotu lwa Mulawo aciindi eco, ibantu ‘bakasekelela loko.’ (Neh. 8:8, 12) Aswebo ncimwi buyo, tulasekelela kuti miswaangano mipati iitupa coolwe cibotu cakutambula malailile aluleme alimwi acakulya cakumuuya “kuciindi ceelede” kuzwa kuli Jehova kwiinda “[mu]muzike musyomesi uucenjede.” (Mt. 24:45) Mbwaanga Jesu wakaamba kuti, imuntu uleelede kuponena “amajwi oonse aazwa kumulomo wa-Leza,” miswaangano mipati ilayandika kapati kuti tube bayumu munzila yakumuuya.—Mt. 4:4.
3 Kuli Mpindu Mbotu Mukujanika: Toonse tweelede kukanza kuyoojanika uuno mwaka ku Muswaangano Wacooko wa “Bamayi ba Jwi lya Leza” woonse. Tweelede kukanza kunoosika cakufwaambana buzuba bumwi abumwi akukkala mane limwi akutola lubazu mukwaamba kuti “Ameni!” mumupailo wakujala. Ikutegwa tukacikonzye kucita boobu, tulakonzya kubambulula zintu nzyotucita. Kulakonzya kuba buyumuyumu mukulomba ciindi kumilimo yesu kutegwa tukajanike kumuswaangano. Tweelede kubaa lusyomo luyumu kutali kulangila buyo kuti zintu inga zyeenda kabotu mucoolwe. Ikuti katuyanda kujana kwakoona naa zyakweendela, tweelede kucita bubambe cakufwaambana. Kufwumbwa kusola-sola nkotuyoocita, kuyoolongezegwa ncobeni!
4 Babelesi ba Jehova kunyina nobeezyanisya imali akuzilongezyo ziboola akaambo kakujanika kumuswaangano. Amulange zitondezyo zimwi zyabaabo bakakanzide kuyoojanika Kumuswaangano Wamasi wa Bakamboni ba Jehova wakajisi mutwe wakuti, Divine Will (Luyando lwa Mulengi) mu 1958. Umwi mukwesu wakajala mulimo wakwe wakuyaka kwansondo zyobile kutegwa ape lugwasyo alimwi akujanika kumuswaangano. Imukwesu umwi ku Virgin Islands wakauzya busena bukkwana mazyekele aali osanwe (5 acres) ikutegwa mukwasyi wakwe woonse wabantu bali cisambomwi ukajanike kumuswaango. Banabukwetene bana-bana bakauzya bwato bwanjini naa kaloonji ikutegwa babweze bana babo boonse botatwe kumuswaangano bakali akati kamyeezi yobile kusikila kumyaka iili ciloba. Ibakwesu botatwe banabunyina bazwa ku California bakaambilwa kuti, ikuti batakajaniki kumilimo yabo, baakuboola milimo yabo tabakooyoijana pe. Nokuba boobo, eci tiicakabalesya kujanika kumuswaangano ooyu uutalubiki.
5 Jehova Ulakulongezya Kusolekesya Kwesu: Jehova ulabona alimwi akulongezya kusoleka kwabantu bakwe. (Heb. 6:10) Mucikozyanyo, mu 1950 Kumuswaangano wakajisi mutwe wakuti, Theocracy’s Increase (kuyungizika kwa Teokrasi), aabo bakajanika bakaswiilila makani mapati aakuti “Bweende Bupya Bwazintu.” Imukwesu Frederick Franz wakabusya luyandisisyo lwabantu boonse kwiinda mukubuzya kuti: “Sena nomuli amuswaangano oyu wamasi mulabotelwa kuzyiba kuti sunu masiku akati kesu kuli mweelwe wabantu uli mbuubede balangilwa kuba bami munyika mpya?” Imyaka iili 50 lino yainda alimwi tucisekelelaa bupanduluzi oobu busalazidwe buzwa mulugwalo lwa Intembauzyo 45:16.
6 Naakamana kujanika kumuswaangano wacooko mwakali, silutwe wamukwasyi wakalumbide kapati wakalemba kuti: “Nobakwesu, kunyina nomunga mwazyiba muswaangano oyu mbuli mbowandifwutula kapati. Mukwasyi wangu wakalongela kudolopo kutegwa tukajane mulimo, twakaile kujanika mubuyumuyumu kulusyomo lwesu. . . . Twakalilekede kubikkila maanu kumikuli yesu yakumuuya. Koonse akujanika kumiswaangano alimwi akutola lubazu mubukambausi twakalilekede. . . . Muswaangano ooyu watubukulusya, aboobo lino twatalika alimwi ikubaa makanze aakumuuya alimwi akuba bakamantene kutegwa twaazuzikizye.”
7 Jehova ulatwaabila cakulya cakumuuya ncotuyandika. Ulabikka tafule lizwide budodoodo kumiswaangano yesu. Ikulumba kwesu akaambo kabubambe obu kweelede kutupa kwaamba bwakaamba Korneliyo naakaswaigwaa mwaapostolo Petro kuti: “Eno mbotubede toonse kubusyu bwa-Leza, kuti tumvwe makani oonse ngoolaililwa ku-Mwami.” (Inc. 10:33) Aabe makanzeesu kujanika “kubusyu bwa-Leza” mucibeela cimwi acimwi mwaka uuno ku Muswaangano Wacooko wa “Bamayi ba Jwi lya Leza” alimwi akusekelela!
Kabbokesi kali apeeji 3]
Ziindi Zyama Pulogilamu
Buzuba Bwakusaanguna Alimwi a Bwabili
8:45 hrs – 16:00 hrs
Buzuba Bwatatu
8:45 hrs – 15:30 hrs