Sena Mulaziyandisya Zintu Zyakumuuya?
1 Ikuti twabuzigwa naa tulaziyandisisiya zintu zya Leza, cakutadooneka tulaingula cakufwambaana kuti inzya! Nzintu nzi zimwi zyakumuuya nzyatupa Leza eezyo nzyotuyandisisya?
2 Elo tulacikkomanina kaka icilongwe ncotujisi a Taateesu wakujulu! Utusyomezya kuti naa ‘twaswenenena kulinguwe, alakwe uyooswenenena kulindiswe.’ (Jak. 4:8) Taakwe muntu uukonzya kutambula buumi butamani nikwatali cinunuzyo cacituuzyo ca Jesu Kristo. (Joh. 3:16) Camoyo woonse, tulamulumba kapati Leza mumipailo yesu yabuzuba abuzuba akaambo kacipego eci citaliboteli.
3 Ijwi lya Leza lyakasololelwaa muuya, Ibbaibbele Lisalala, lilisetekene kulindiswe mbubwenya buyo mboisetekene imbunga ya Jehova yaanyika. Tutondezya kuti tulaziyandisisya zintu nzyatupede Jehova eelyo notutobela njiisyo zya Bbaibbele mubukkale bwesu, notuyumya luyando lwesu lwabunyina, notutobela bubambe bwateokrasi kabotu-kabotu alimwi anotubelekelaamwi abaabo ibasololela.—1 Pet. 1:22.
4 Tulapegwa zilyo zyakumuuya zinji kwiinda mumuzike musyomesi uucenjede. Eco nceciyoocitika mwaka uno ku Muswaangano Wacooko wa “Basikucita Zyaambwa mu Jwi lya Leza.” Ooko tuyootambula malailile alimwi tuyooyanzana abamwi munzila iiyandika kapati. Ino inga twatondezya buti camoyo woonse kuti tulaziyandisisya zipego ezi zyakumuuya?
5 Tutailekelezyi Ŋanda ya Jehova: Nehemiya wakabakulwaizya aabo ibakabeleka canguzu mukuyakulula malambo aa Jerusalemu ‘ikutailekelezya ŋanda ya Leza wabo.’ (Neh. 10:39) Sunu, “ŋanda” ya Jehova mbubambe bwakwe bwakukombela. Miswaangano yesu yazyooko ncibeela cabubambe oobu. Kutegwa tububikkile maanu bubambe oobu, tweelede kujanika alimwi akuswiililisya, ikutondezya Jehova kuti tulaziyandisisya zipego zyakwe nzyatupa. (Heb. 10:24, 25) Mbubambe buli buti mbotweelede kucita lino ikutondezya kuti tulaciyandisisya ciindi cibotu eeci cakumuuya?
6 Atukajanike Mazuba Oonse Otatwe: Atulibambile umwi aumwi wandiswe ikuyoojanika mazuba oonse otatwe aamuswaangano. Sena mwalibambila ikunoofwambaana kusika buzuba bumwi abumwi alimwi akubako kusikila mupailo wamamanino mubuzuba bwatatu? Ikuti kacili boobo, muyoolongezegwa kapati. Ikujanika kumuswaangano talili lyoonse nocili cintu cuuba-uba. Ikutegwa mupegwe ciindi kuzwa kumilimo yanu yakumubili ciyandika kuzyandamana buya. Ambweni mulakonzya kujana buyumuyumu azyakweendela. Pele mutalekeli buyumuyumu oobu kumutyompya kuti mutakajaniki kumuswaangano.
7 Atulange-lange Cikonzyanyo Cibotu Eci: Kabunga kabakwesu mucisi cimwi camu Afulika mwalo muli nkondo nobakali mulweendo lwakuunka kumuswaangano mwaka wamana, bakajana impi zyabasikalumamba munzila. Bakwesu bakabuzigwa kuti: “Ino ndinywe bani alimwi muunka kuli?” Bakavwiila kuti: “Ndiswe Bakamboni ba Jehova alimwi tuunka kumuswaangano wacooko.” Sikalumamba umwi wakati: “Nywebo no Bakamboni ba Jehova taakwe ncomuyoowa pe. Kamuya buyo, alimwi muyooswaangana kabotu-kabotu kakutakwe penzi lili loonse. Nokuba boobo, tumucenjezya kuti munakuyaanaa basikalumamba banji. Lyoonse kamweendela akati kamugwagwa! Ikuti naa mwabona bantu banji babungene, amuzumanane kweendela akati kamugwagwa!” Bakacita oobo mane bakasika kabotu-kabotu kumuswaangano. Bakwesu aaba bakalumbulwa akaambo kakuti bakatondezya kuti balaziyandisisya zintu zyakumuuya.
8 Andiswe tujana buyumuyumu mbubwenya mbuli bakwesu aaba. Pele tulakonzya kwiiya lusyomo lwabo akukanza kuyoojanika azibeela zyoonse zyamuswaangano wacooko. Ikuti kakuyandika kulibambila kumwi, atusyome muli Jehova kuti atusololele katuzi kuti uyootulongezya mukusola-sola kwesu nkotucita kwakuti tukajanike kupulogilamu yoonse.
9 Atugwasigwe Azilongezyo: Tulaliyandisya kapati Jwi lya Leza nkaambo tulizi kuti tulakonzya kukomena andilyo mulufwutuko. (1 Pet. 2:2) Kwiinda mukujanika kumuswaangano alimwi akuswiilila kupulogilamu tuyoogwasigwa ikuyumya lusyomo lwesu mu Jwi elyo alimwi eci ciyootupa kuti tucikonzye kuliyumya mumapenzi aaletwaa Saatani. Kwiinda mukucita boobo, tuyootondezya Jehova alimwi abaabo boonse ibalangilila kuti tulaziyandisisya zintu zyakumuuya alimwi akuti “swebo tatuli baabo bapilukila musule . . . pele tuli baabo basyoma alimwi bayoofutulwa.”—Bahi. 10:39; 12:16, Ci; Tus. 27:11.
10 Tulakonzya kulangila cakukondwa kuti Jehova Leza atujalwide zipulo zyakujulu akututilila zyoolwe zyakumuuya cakufwasuka loko. (Malk. 3:10) Aibe mbaakani yanu ikuyoojanika ku Muswaangano Wacooko wa “Basikucita Zyaambwa mu Jwi lya Leza” kuzwa kumatalikilo aapulogilamu mubuzuba bwakusaanguna kusikila kumupailo wakujala alimwi a “Ameni!” mubuzuba bwatatu kumazuba. Muyookondwa kapati kuti mwakacita obo!