Muswaangano Wacooko Wamu 2006 wa “Lufwutuko Luli Afwaafwi” wa Bakamboni ba Jehova
1. Ino mbuti bantu ba Leza mbobakatondezya kulumba kubukombi bwini-bwini muciindi cansiku, alimwi nciindi cili buti cikozyenye aceeci ncotujisi mazubaano?
1 Mwami Hezekiya waku Juda yansiku wakabelesya basimposo kutuma magwalo aakutamba bantu kuti babungane antoomwe mu Jerusalemu. (2 Mak. 30:6, 13) Kwiingula kwabantu kwakatondezya mbobakali kububona bukombi bwin-bwini. (2 Mak. 30:10-12) Mumyezi iboola, babelesi ba Jehova bamazubaano bayooba aciindi cakutondezya kulumba kwabo kwamoyo woonse akaambo kaciindi caalubazu cakubungana antoomwe kuti bakombe Jehova. Ilugwalo lumutamba kuyoojanika ku Muswaangano Wacooko wa “Lufwutuko Luli Afwaafwi” lwatumwa kumbungano yenu. Ino muyakwiingula buti kukutamba ooku?
2. Ino ncinzi ncotukonzya kucita lino kutegwa tukagwasyigwe kapati kumuswaangano wacooko?
2 Amutalike Kulibambila Lino: Kutegwa tukagwasyigwe kapati abubambe bwakumuuya buli mukubambwa, tweelede kuyoojanika kupulogilamu yoonse. Amutalikile limwi lino kulibambila kutegwa nywebo amukwasyi wenu mukajanike mazuba oonse otatwe. (Tus. 21:5) Kulibambila kwamusyobo ooyu kulakonzya kubikkilizya kulomba basikumulemba mulimo ciindi cakuya kumuswaangano, kubandika makanze eenu angomukwetene limwi ikuti katali Kamboni, kulibambila kwakoona alimwi akugwasya basikwiiya Bbaibbele kujanika abuzuba. Mutalindili kuti mane ciindi cimane. Muciindi caboobo, amwaapailile kuli Jehova makani aaya, kamusyomede kuti “uyoocita.”—Int. 37:5.
3. Ncinzi cacitwa mukuubya-ubya twaambo tujatikizya miswaangano mipati?
3 Mukubikkila maanu kukuubya-ubya twaambo tujatikizya miswaangano mipati, bakuofesi yamutabi bakalomba mbungano kupa twaambo tujatikizya kusala nkobayanda kujatikizya masena aakucitila miswaangano mipati. Lyamuswaangano wamulimo, basikumwaya boonse babbapatizyidwe bakaliko bakatondezya kusala kwambungano yabo kujatikizya masena aabelesyegwa kucitila miswaangano mipati kwiinda mukutambika maanza aabo.—Kul. 19:8.
4. Mbuti mbotukonzya kuba bantu bakulwaizya bakwesu?
4 Nkaambo nzi bamwi ncobatajaniki kububambe bwakumuuya oobu buyandika kapati? Zimwi ziindi cilakonzya kuba boobo akaambo kapenzi lyakubula mali alimwi amilimo yakumubili. Pele ciindi musazinyina naciswa naa kufwa kubusena bwamusinzo uulampa myaanda yamakkilomita, banji balakonzya kweenda kutegwa bakajanike kwacitikila manyongwe calo cikonzya kubapa kuti bakakkale kwansondo zili mbozibede. Ibamwi bacicita kuba cilengwa buya cakutajanika kumiswaangano yambungano, calo cabapa kuti kabatajaniki kububambe bwa Jehova oobu bucitwa amwaka. Cintu ciyandika nkulyaaba alimwi akulibambila kabotu. Kabunga Keendelezya kalabalumba boonse aabo bajisi muuya wakulyaaba balo ibeenda kutegwa bakajanike kumuswaangano wacooko. Basikumwaya bajisi ciimo ca Davida bakulwaizya bamwi.—Int. 122:1.
5. Nokuba kuti bali amapenzi, ino bamwi baibona buti miswaangano yacooko yabantu ba Jehova?
5 Ibakwesu banji balacitikilwa mapenzi kutegwa bakajanike kumiswaangano mipati. Nokuba boobo, miswaangano yabantu ba Jehova baibona kuti ngomusemu wabuumi bwabo. Bamwi baleenda misinzo milamfwu amaulu kutegwa bakajanike kumuswaangano wacooko, pele tabayandi kwiindwa nouba omwe. Imulangizi wacooko wakaamba kuti imukwesu amukaintu wakwe alimwi abana basyoonto bobile bakeenda musinzo uulampa makkilomita aali 70 amaulu kutegwa bakajanike kumuswaangano wacooko ku Cooko ca Kunyika Lwaambo camu Zambia. Bakaakusika mubuzuba bwatatu kuzwa nobakanyamuka. Imwi nkamu yabakwesu abacizyi bakeenda musinzo uulampa makkilomita aali 300 amaulu kwamazuba aabalilwa kunsondo yomwe. Ibamwi bakeenda amaulu kwamakkilomita aali mbwaabede kuzwa waawo bakeenda abwato kwamawoola mulwizi alimwi amabanda kutegwa bakajanike kumuswaangano wacooko. Bakwesu abacizyi boonse aaba balakkomana kujanika. Wamana muswaangano wacooko, balajokela kuminzi yabo kwiinda munyendo njiyona kabakkomene kapati alimwi akuyumizyigwa kumuuya. Kubanji, eeci ncilengwa buya kwamyaka minji.
6, 7. Mbuti aabo bayandika lugwasyo lwaalubazu mbobakonzya kugwasyigwa?
6 Lugwasyo Lwaalubazu: Lugwalo lwa Tusimpi 3:27 lwaamba kuti: “Utakasyi lugwasyo kubantu balweelede, na ulakonzya kucita.” Mbuti mbomukonzya kubacitila zibotu ibamwi kujatikizya muswaangano wacooko? Basikumwaya bacembeede, bakompeme, aabo bali mumulimo waciindi coonse abamwi, inga bayanda lugwasyo kujatikizya cakweendela naa kwakoona. Ikusaanguna, basazinyina mbobajisi mukuli wakulanganya bantu bali boobo. (1 Tim. 5:4) Pele, ikuti kabatacikonzyi kucita boobo, basyomima inga bagwasya. (Gal. 6:10) Balangizi baciiyo cabbuku beelede kubonana abaabo ibali mukakamu kabo ikubona bayandika lugwasyo lwaalubazu kutegwa basinizye kuti bubambe bwacitwa imuswaangano wacooko kautanasika.
7 Mafoomu Aakulomba Kwakoona apegwa buyo basikumwaya batakonzyi kubambilwa kwakoona abamumukwasyi wabo naa mbungano mobabede. Kkomiti Yamulimo Yambungano yeelede kulanga-langa zyeelelo zyasikumwaya kwiinda mukubelesya malailile aali afoomu. Bubambe oobu mbwabasikumwaya balikke bajisi mpuwo mbotu kubikkilizya abana babo balilemeka.
8. (a) Ino nkaambo nzi ncotweelede kujanika kumuswaangano wacooko nkoyibalilwa mbungano yesu? (b) Ino nintaamu zili buti zyeelede kutobelwa ikuti bukkale bwamupa kuti mukajanike kumuswaangano wacooko umbi?
8 Kujanika Kumuswaangano Wacooko Uumbi: Kutegwa kakujanika busena bwakukkala, mabbuku, kwakoona, azimbi zili boobu zikkwene, mwakulwaizyigwa kujanika kumuswaangano wacooko nkoyibalilwa mbungano yenu. Ikuti bukkale bwenu bwapa kuti mukajanike kumuswaangano wacooko uumbi alimwi kamuyanda kwakoona, mwalombwa kuti mwiitumine foomu ya Kulomba Kwakoona kubusena bwamuswaangano bweelede. (Amubone mulongo wamwaka uuno apeeji 5 kujatikizya miswaangano yamu Zambia kweelana amazuba noiyoocitwa.) Ikuti naa mudolopo eelyo kuyoocitwa miswaangano minji, amubone kuti afoomu yenu mwalemba mazuba alimwi amwaambo uuyoobelesyegwa kumuswaangano nkomuyoojanika.
9. Ntwaambo nzi twapa kuti kube buyo bubambe bwakusandulula mwaambo wakutambaika amiswaangano yacooko yaambwa?
9 Mwaambo Wakutambaika: Mbuli mbomukonzya kubona mukabbokesi kamulongo wamazuba alimwi amasena aamiswaangano yacooko iiyoocitwa mu Zambia, kusandulula kwamwaambo wakutambaika kuyoocitwa BUYO mumasena aamiswaangano yacooko yobile, ku Kitwe-Cingisi (Chamboli) alimwi aku Lusaka-Cingisi (EC-03). KUNYINA BUBAMBE bwamwaambo wakutambaika buyooba kumiswaangano yacooko iimwi. Bubambe oobu bupa kuti kukabe busanduluzi bubotu alimwi kutegwa bantu banji bakakkomane akuyumizyigwa kwabunyina. Ibaalu alimwi abasikusandulula mwaambo wakutambaika beelede kubazyibya basicuulutwi bali mumbungano yabo kujatikizya bubambe oobu alimwi akubagwasya kulibambila kutegwa bakajanike kumuswaangano wacooko nkwaayoosandululwa mapulogilamu amwaambo wakutambaika. Alimwi baalu beelede kubonana asicuulutwi aumwi uuli mumbungano yabo kubona kuti naa inga kwayandika lugwasyo.
10-12. Mbuti mbotukonzya kulikwabilila kuntenda, alimwi ntwaambo nzi tuyandika ntotweelede kuyeeya?
10 Kulikwabilila Kuntenda: Imbunga ya Jehova caluyando ilapa malailile aagwasya kujatikizya miswaangano. Cilausisya kuti mumiswaangano iili mboibede mumyaka yainda, basimiswaangano bamwi bakanyonyookelwa mpasya amulilo ooyo wakali kukonzya kukwabililwa. Ntenda zyamyootokala azyalo zyakajaya bantu. Bakwesu bapedwe mukuli amiswaangano yacooko alimwi abazyali, balombwa kuti kababikkila maano kutwaambo ootu tuyandika kapati kutegwa kuyanzana kwesu kumiswaangano kakuyumya-yumya akukkomanisya ikutali kwamause nkaambo kantenda zicitika akaambo kabuyamba.
11 Cakutadooneka, icipa kuti kakuba ntenda yamulilo kumiswaangano takuli kuti nkujikila munsi-munsi azivwuka pe, pele mbana batalanganizyigwi basobanya mulilo. Aboobo, ikutegwa mulikwabilile lwenu akukwabilila bakwesu, mutalekeli bana benu kweendeenda kakunyina uubalanganya; mutalekeli bana baniini kulanganya meenda aawalauka nokuba ikubasiya kuti kabasosela nkuni. Balakonzya kuzicita kabotu eezyi kumunzi, pele tabeelede kucita boobo amuswaangano alimwi tweelede kucenjela kapati kutegwa kutabi ntenda iicitika. Bantu banji nobakkala antoomwe, ibana balayanda kusobana banooli abananyina. Balafwambaana kunyonganizyigwa, eelyo tabakonzyi kubona kuti inga kwaba ntenda, aboobo tatweelede kubasiila nkandela, mancisi naa malambe. Penzi limwi ndyakuti ibazyali balasiya bana basyoonto muzivwuka kakunyina uubalanganya ciindi camasikati nobaunka kukuswiilila makani. Ibana beelede kukkala antoomwe abazyali babo ciindi camapulogilamu. Iciindi basikugwasyilizya nobabona bana baile kweendeenda abusena aacitilwa muswaangano kakunyina uubalanganya, balakonzya kubajosya bana aabo kubazyali babo. Nobazyali, twamulomba amubelekele antoomwe ababelesi bamuswaangano, eelyo munzila eeyi mulatondezya kuti ‘mulabayanda babunyina.’—1 Pet. 2:17.
12 Imbungano zimwi zibbadela basimyootokala kubatola kumiswaangano. Kufwumbwa mootokala uubelesyegwa kubweza basimuswaangano, weelede kuti kauzumizyidwe amulawo kweenda mumigwagwa alimwi kuuli kabotu. Mweelwe wabantu ampasya tazyeelede kwiindilila aawo mpounyamuna mootokala. Cilayandika kapati kuti mukwesu uusimide apegwe mukuli wakulanganya bubambe oobu. Uya kwiizyibya nkamu kujatikizya bubambe oobu, iciindi cakunyamuka alimwi abusena bwakutantila. Kufwumbwa buyumu-yumu bukonzya kuba kunkamu eeyi buyoozibisyigwa kumukwesu ooyu walo uuyoopa malailile. Iciindi nokuyandika lugwasyo, kupa lulayo naa kulanganya penzi limwi, ibakwesu bapakamene alimwi bapampu mbobayoocita boobo.
13. Ninzila nzi imwi motukonzya kupa kuti kukabe lukkomano amuswaangano wacooko uuboola?
13 Basikugwasyilizya Balisungula: Tacidoonekwi buya kuti boonse bayoojanika kumuswaangano wacooko bayookkomana kapati akugwasyigwa acakulya cakumuuya alimwi aciindi cakuyanzana ikuyaka. Tuyookkomana kapati ikuti twalisungula kugwasya kumulimo weelede kucitwa kutegwa muswaangano ukeende kabotu. (Inc. 20:35) Makkomiti aa Muswaangano Wacooko aakooko nkomubalilwa ayootalika ino-ino kutamba bamwi kuti bakatole lubazu mumulimo ooyu. Sena inga mwalisungula?—Int. 110:3.
14. Ncinzi cimukkomanisya kujatikizya muswaangano wacooko waamwaka, alimwi ino makanze nzi ngomweelede kuba aalo?
14 Naakali kumuswaangano wacooko, musankwa wamyaka yakuzyalwa iili yosanwe wakati: “Muswaangano wacooko ncibeela cakukomba Jehova ncondikkomanina kapati.” Kaambo kakazwa kunsi aamoyo aaka kalatugwasya toonse kubona mbotukukkomanina kujanika kumuswaangano wesu wacooko uucitwa amwaka. Ncamasimpe mbuli sintembauzyo mbwaakaimba kuti: “Nkaambo buzuba bomwe buyo bwamucikalilo cako mbubotu kwiinda mazuba aali cuulu aakumbi.” (Int. 84:10) Davida mulwiimbo lwakwe wakalombozya ‘kukkala muŋanda ya Jehova mazuba oonse aabuumi bwakwe kutegwa kakkomanina cikombelo cakwe.’ (Int. 27:4) Cakamukonda kapati Davida kuba akati kabakombi ba Jehova. Atwiiye mbwaakali kubulumba bukombi bwini-bwini kwiinda mukuyoojanika mazuba oonse otatwe aa Muswaangano Wacooko wa “Lufwutuko Luli Afwaafwi.”
Kabbokesi kali apeeji 3]
Ciindi Camapulogilamu
Buzuba Bwakusaanguna a Bwabili
8:45 hrs. - 16:05 hrs.
Buzuba Bwatatu
8:45 hrs. - 15:10 hrs.