Muswaangano Wacooko wa Bakamboni ba Jehova Wamu 2004 wa “Amweende a Leza”
1 Ino ncinzi cipa kuti miswaangano yacooko yaamwaka kiilibedelede kulindinywe? Sena mmakani aa Bbaibbele aayaka alimwi acisobano zibambwa a “muzike musyomesi uucenjede”? (Mt. 24:45-47) Sena mmabbuku mapya aajisi busani bwakumuuya bwakuciindi ceelede? Sena mbakwesu abacizyi baamba mbuli Bbaibbele mbolyacinca buumi bwabo? Sena mmalipooti aambuli mulimo wakukambauka zya Bwami mbuuyaambele mumanyika aamwi? Sena nkuyanzana abasyomima bamisela yoonse? Inzya, tulailangila cabusungu miswaangano yesu akaambo katwaambo ootu alimwi atumwi tunji.
2 Amukajanike Mazuba Oonse Otatwe: Kwiinda muli Musa, Jehova wakalailila kuti: “Amubunganye bantu boonse . . . kuti baswiilile, baiye.” (Dt. 31:12) Kwiinda muciinga camuzike musyomesi uucenjede, Jehova watubambila pulogilamu iilibedelede yakwiiya buzuba abuzuba bwamuswaangano. Akaambo kakuti ulatuyiisya kuti ‘tugwasyigwe tobeni,’ tuyanda kuya kujanika kwanoobandikwa malailile aakwe oonse. (Is. 48:17) Ikuti kamuyandika kulomba ciindi cakuya kuswaangana kuli sikumulemba milimo, amupaile kuli Jehova kwamana boobo amumulombe, ikutobela cikozyanyo cabusicamba ica Nehemiya. (Neh. 1:11; 2:4) Alimwi ncibotu ikubazibya cakufwambaana banamukwasyi ibatasyomi zyamakanze aanu aakuyoojanika kumuswaangano wacooko.
3 Kwakoona: Kanjikanji bakwesu balacita bubambe bwabo beni bwakuyookkala kubasazinyina naa kubeenzinyina bali mumadolopo mucitilwa miswaangano. Muminzi ibakwesu balayaka zivwuka naa koona muzilabba zipati iziyakwa abakwesu balisungula kubusena bwamuswaangano. Mumiswaangano imwi kubelesyegwa maanda aawona basicikolo kuli bamwi bajanika kumuswaangano. Notupegwa akoona kubakwesu naa basazima, taceelede pe kuti basimuswaangano bakutolele mumbi kusamausya kwabakwesu kwiinda mukuzumanana kukkala kwamazuba aayindilila wamana muswaangano kutegwa balyookezye. Aaya maanda ngaciindi buyo camuswaangano. Aabo ibapegwa aakoona munzila eeyi, beelede kubona kuti balo abana babo balilemeka kuli balaaŋanda alimwi akutanyonyoona cili coonse naa kulanga-langa mpasya naa kunjila mumasena aŋanda mobateelede. Ikuti naa uulaaŋanda waba abuyumuyumu kumakani aaya, ulakonzya kubazyibya cakufwambaana baku Cibeela Cilanga Aakoona kumuswaangano, eelyo ibakwesu aaba banoolibambide kugwasya.
4 Lugwasyo Lwaalubazu: Mwaapostolo Paulo wakayeezya mbungano zyaku Galatiya ‘kucitila bantu boonse milimo mibotu, pele kwaambisya kuli baabo baciinga calusyomo.’ (Gal. 6:10) Ibakwesu abacizyi bacembeede, ibakompeme, ibazyali bakomezya bana kakunyina mweenzinyina wamulukwatano naa aabo bali mumulimo waciindi coonse tabakonzyi kulomba kuti mubagwasye, pele balakonzya kabajisi buyumuyumu ikutegwa bakajanike kumuswaangano. Sena mulakonzya kubacitila “milimo mibotu” akubagwasya? Ibasazinyina Banakristo alimwi abaalu beelede kubuzyiba kabotu bukkale bwabantu bali boobo.
5 Ikuti foomu Yakulomba Kwakoona yatuminwa asikumwaya, Kkomitii Iilanganya Mulimo Wambungano iyooyilanga-langa, kwiinda mukubelesya malailile aali afoomu. Beelede kulanga-langa ikuti naa penzi eelyo lilakonzya kulanganizyigwa ambungano. Ibubambe buli boobu mbwabaabo buyo ibalaampuwo mbotu, antoomwe abana babo ibalilemeka kabotu. Ikuti ba Cibeela Cilanga Kwakoona kabajisi mibuzyo iili yoonse kumakani aaya, bayoozibya mulembi wambungano.
6 Ikujanika Kumuswaangano Uumbi: Ibukkale bwanu bulakonzya kumupa kuyoojanika kumuswaangano wacooko uumbi ikutali kwaabilidwe mbungano yanu. Ikuti kamuyanda makani aamba zyamuswaangano uumbi, mwalombwa kubona mulongo wamwaka uuno apeeji 5 kujatikizya miswaangano yamu Zambia kweelana amadeeti noiyoocitwa. Amwiitumine foomu ya Kulomba Kwakoona kubusena bwamuswaangano. Ikuti naa mudolopo eelyo kuyoocitwa miswaangano minji, amubone kuti afoomu yanu mwalemba madeeti alimwi amwaambo uuyoobelesyegwa kumuswaangano ngomuyanda kuyoojanika.
7 Ikukwabilila Ntenda: Imbunga ya Jehova caluyando ilapa malailile aagwasya kujatikizya miswaangano. Cilausisya kuti mumiswaangano iili mboibede mumyaka yainda, basimiswaangano bamwi bakasinyikilwa mpasya amulilo wakali kukonzya kweelebwa. Ntenda zyamyootokala azyalo zyajaya bantu banji. Bakwesu bapedwe nguzu alimwi abazyali, baambilwa kuti kababikkila maano kutwaambo ootu tupati-pati kutegwa kuyanzana kwesu kumiswaangano kakukkomanisya ikutali kwamause akaambo kantenda zicitika nkaambo kabuyamba.
8 Cakutadooneka, icipa kuti kakuba ntenda yamulilo kumiswaangano takuli kuti nkujikila munsi-munsi azivwuka pe, pele mbana ibateendelezyegwi basobana naa basosela nkuni. Aboobo, ikutegwa mukwabilile bakwesu alwanu buya kumugama, mutalekeli bana banu kweendeenda kakunyina uubalanga; mutalekeli bana baniini kulanga meenda aawalauka nokuba ikubalekela kuti kabasosela nkuni. Balakonzya kuti inga kabazyicita eezyi kabotu kumunzi, pele busena bwamuswaangano mbumbi alimwi tweelede kucenjela kapati kutegwa kutabi ntenda iicitika. Bantu banji bakkede antoomwe alimwi ibana balayanda kusobana nobali aabananyina. Balafwambaana kunyonganizyigwa, eelyo tabakonzyi kubona kuti kulakonzya kuba ntenda, aboobo tatweelede kubasiila nkendulu, mancisi naa malambe. Penzi limwi ndyakuti ibazyali balasiya bana basyoonto muzivwuka kakunyina uubalanganya ciindi camasikati nobaunka kukuswiilila mapulogilamu. Ibana beelede kukkala antoomwe abazyali babo ciindi camapulogilamu. Iciindi basikugwasyilizya nobabona kuti kuli bana baile kweendeenda abusena aacitilwa muswaangano kakunyina ubalanganya, beelede kubajosya bana aabo kubazyali babo. Nobazyali, mwalombwa kuti mubelekele antoomwe ababelesi bamuswaangano, eelyo munzila eeyi muyootondezya kuti ‘mulabayanda babunyina.’—1 Pet. 2:17.
9 Imbungano zimwi zibbadalila myootokala iibatola kumiswaangano. Kufwumbwa myootokala iibelesyegwa kutola basimuswaangano, yeelede kuti kiili kabotu alimwi kaizumizyidwe amulawo kweenda mumigwagwa. Mweelwe wabantu taweelede kwiindilila aawo mpounyamuda mootokala. Cilayandika kapati kuti mukwesu uusimide apegwe mukuli wakulanga-langa bubambe oobu. Uya kwiizyibya nkamu kujatikizya bubambe oobu, iciindi cakunyamuka alimwi abusena bwakukkwelela. Kufwumbwa buyumuyumu bukonzya kuba kunkamu eeyi, beelede kumuzyibya mukwesu ooyu walo nguyoobapa malailile. Muciindi nokuyandika lugwasyo, lulayo naa kubamba kaambo, ibakwesu bapakamenyi baya kukonzya kulimana penzi eeli.
10 Kumuswaangano wabantu ba Jehova wakacitika myaka iitandila ku 2,500 yainda, Ezara abeenzinyina iba Levi bakabala Ijwi lya Leza akulipandulula kubantu bakabungene. Ino ncinzi cakatobela? Ibbuku lya Nehemiya 8:12 litwaambila kuti “bantu boonse bakainka . . . akukusekelela loko, nkaambo bakalimvwide majwi aamulao ngebakalwiidwa.” Sena tatukkomani kuti ibananike baciinga camuzike, mbubwenya mbuli Ezara alimwi aba Levi babelesya Ijwi lya Leza, balalipandulula akutondezya mbotukonzya kulibelesya mubuumi bwesu? Mukucita boobo, imuzike ooyo utondezya luyando lwini-lwini lwa Jehova akulanganya nkwajisi kubantu Bakwe. Amukanze kutakooyooindwa buzuba nobuba bomwe bwa Muswaangano Wacooko wa “Amweende a Leza”!
MALAILILE: Mumbungano imwi aimwi, mulembi nguuyoolanganya zyoonse zijatikizya muswaangano wacooko alimwi uyoobona kuti wabakulwaizya boonse cabusungu kujatikizya nguwo. Ikuti naa mulembi katako, mwaalu umbi weelela weelede kwiilanganya milimo eeyi. Mulembi weelede kwaatobelezya kabotu malailile oonse ngatambula kuzwa kubusena buyoocitilwa muswaangano akwakoona, mulimo wakulisungula alimwi abubambe bwamulimo kautana naa wamana muswaangano. Weelede kuba aciindi cibotu amiswaangano kutegwa abale (KUTALI kwaamba buyo mubufwaafwi) akupandulula magwalo oonse aakumuswaangano. Ibaalu boonse, ikapati mulembi, beelede kubuzyiba kabotu-kabotu bubambe bwamuswaangano bumwaigwa mu Mulimo Wesu Wabwami.
Kabbokesi kali apeeji 3]
Ziindi Zyama Pulogilamu
Buzuba Bwakusaanguna a Bwabili
8:45 hrs. – 16:10 hrs.
Bwatatu
8:45 hrs. – 15:05 hrs.
Kabbokesi kali apeeji 5]
Imulongo Wamiswaangano Yacooko Yamu 2004 ya “Amweende a Leza”
MADEETI BUSENA MWAAMBO
AUGUST 13-15 KAFUE CG
KALOMO CN & CG
KATETE CN
KITWE (Buchi) CW
KITWE (Chamboli) E & ASL
LUSAKA E & ASL
MBALA CW
SAMFYA CW
SOLWEZI CW
AUGUST 17-19 KABULA CW
KAOMA SK
KASEMPA KD
LUNDAZI CN & TB
AUGUST 18-20 KALUNGU CW
LUALABA CW
MUTENDA CW
MWEWA CW
NSAMA CW
AUGUST 20-22 LUSAKA (Cibemba) CW
MONGU SK
PETAUKE CN
AUGUST 21-23 KABOMPO LV
KAZEMBE CW
AUGUST 22-24 MALAMBANYAMA CG
MATAMBAZI CN
MUTOYA (Mwinilunga) CW
MUYOMBE TB
MWANGE (Mporokoso) SW
AUGUST 23-25 MUNUNGA CW
NYIMBA CN
AUGUST 25-27 KALA (Kawambwa) SW
SOLWEZI KD
AUGUST 26-28 CHINSALI CW
AUGUST 27-29 CHILILABOMBWE CW
CHIPATA CN
KABWE CW
KAFUE CN
KASAMA CW
LUSAKA (Chichewa) CN
MANSA CW
MPONGWE CW
SENANGA SK
AUGUST 29-31 KAWA CW
LUSWISHI CW
AUG. 30–SEP. 01 MULILIMA CW
AUG. 31–SEP. 02 KASHITU CW
LUWINGU CW
SEPTEMBER 01-03 MAPANZA CG
SIKUNDU (Kalabo) SK
SEPTEMBER 03-05 LUANSHYA CW
LYENGA (Chongwe) CN
MPIKA CW
MUFULIRA CW
NDOLA CW
SEPTEMBER 05-07 MKUSHI CW
SEPTEMBER 06-08 MWANDI SK
SEPTEMBER 10-12 CHINGOLA CW
MULOBEZI SK
MUMBWA CN & CG
ASL - Mwaambo Wakutambaika Waku Amelika CG - Chitonga
CN - Chichewa CW - Cibemba E - Cingisi KD - Cikaonde
LV - Cilubale SK - Cilozi SW - Ciswahili TB - Citumbuka