Muswaangano Wacooko wa Bakamboni ba Jehova Wamu 2003 wa “Amumulemeke Leza”
1 Kwiinda muli Isaya musinsimi wakwe uusyomeka, Jehova wakalailila kuti: “Amundiswiilile, nubantu bangu; amumvwe majwi aangu, O musyobo wangu.” (Is. 51:4) Mumazubaano aakumamanino aayabwiindilila kukatazya, sena tatuzumini kuti cilayandika kapati kuswiilila milawo ya Jehova kwiinda mbocakabede lyoonse? Inzila imwi ‘mbotumvwa’ kuli Jehova nkwiinda mukutobela mulawo wakwe wakubungana kutegwa tumukombe. Elo kaka tulacilangila coolwe cilibedelede ncotujana kumiswaangano yacooko iicitwa mwaka amwaka! Kabunga Keendelezya ka Bakamboni ba Jehova kacita bubambe alimwi ibwakuti kukacitwe miswaangano yacooko minji mu Zambia mu 2003.
2 Kweelana ambokutondezyedwe mu Ngazi Yamulindizi yamu Chichewa yamu July 1, 2002, miswaangano yaakati kamasi iiyoocitwa mumasi amwi. Mbwaanga masi buyo masyoonto kuyoocitilwa miswaangano yaakati kamasi, basimuswaangano basalidwe mbabayoojanika. Ino ncinzi ncotukonzya kucita kutegwa tukagwasyigwe kapati abubambe ibuli mukucitwa bwamiswaangano yacooko mwaka uuno?
3 Amukajanike Buzuba Abuzuba: Ikutegwa tugwasyigwe kapati amalailile aapegwa aciinga camuzike musyomesi uucenjede, atubone kuti twajanika kupulogilamu yamuswaangano yoonse. (Mt. 24:45) Sena muyandika kubalomba basikumulemba mulimo kutegwa bamupe ciindi cakuyoojanika mazuba oonse kumuswaangano wacooko? Nehemiya katanalomba Mwami Aritasasta kuti amuzumizye kuunka kuyooyakulula bwaanda ku Jerusalemu, ‘wakakomba kuli Leza wakujulu.’ (Neh. 2:4) Anywebo mweelede kupaila kuli Jehova kuti amupe busicamba kutegwa mucikonzye kubalomba basikumulemba mulimo ciindi cakuyoojanika mazuba oonse otatwe kumuswaangano. Ino kuti naa sikumulemba mulimo ulawayawaya kumupa ciindi? Ambweni kumupanduluda kuti malailile ngotutambula kumiswaangano yacooko alatugwasya kuti tube babelesi basyomeka alimwi bankutwe, kulakonzya kumugwasya kutegwa atupe ciindi. Kuyungizya waawo, ikuti katujisi banamukwasyi ibatasyomi, tulakonzya kubabikkila maano kwiinda mukubazibya makanze eesu aakuyoojanika kumuswaangano wacooko cakufwambaana.
4 Bubambe Bwamasena Aakoona: Ikanjikanji bakwesu balalibambila beni kwakuyookkala kubasazinyina naa kubeenzinyina bali mumadolopo mucitilwa miswaangano. Muminzi, ibakwesu balayaka zivwuka naa koona muzilabba zipati iziyakwa abasikulisungula. Mumiswaangano imwi babelesya zikolo kutegwa bajane aakukkala basimuswaangano bamwi. Notupegwa aakoona kubakwesu naa basazima, taceelede kuti basimuswaangano bakutolele mumbi kusamausya kwabakwesu kwiinda mukulangila kuti balazumizyigwa kukkala kwamazuba aayindilila kutegwa balyookezye wamana muswaangano. Aaya maanda ngaciindi buyo camuswaangano. Aabo ibapegwa aakoona munzila eeyi beelede kubona kuti balo abana babo balilemeka kuli balaaŋanda alimwi akutajaya cili coonse naa kulanga-langa mpasya naa mumasena aŋanda mobateelede kunjila. Ikuti naa uulaaŋanda waba abuyumuyumu kumakani aaya, cakufwambaana ulakonzya kuzyibya baku Cibeela Cilanga Aakoona kumuswaangano, eelyo ibakwesu aaba banakulibambide kugwasya.
5 Ikugwasya Baabo Ibayandika Lugwasyo Lwaalubazu: Sena kuli bamwi mumbungano yanu ibayandika kugwasyigwa kutegwa bakajanike kumuswaangano wacooko? Iziyandika zyaalubazu kubacembeede, bakompeme, antela abaabo ibali mumulimo waciindi coonse zilakonzya kulanganizyigwa ikapati abasazinyina Banakristo. Pele ibaalu abamwi buyo ibalizyi penzi eeli mumbungano, caluyando balakonzya kugwasya.
6 Iba Kkomitii Yamulimo Yambungano bayoolanga-langa foomu imwi aimwi yasikumwaya Yakulembela Kwakoona. Kwiinda mukubelesya malailile aalembedwe afoomu, ikkomitii yamulimo yeelede kubona naa kulomba kumwi nkwaalubazu alimwi tacikonzyeki kubulanganya kubusena nkomubede. Ibubambe buli boobu mbwabaabo buyo ibalaampuwo mbotu, antoomwe abana babo ibalilemeka kabotu. Cibeela Cilanga Aakoona ciyoomuzyibya mulembi wambungano ikuti kabajisi mibuzyo kumakani aakulembela kwakoona kwaalubazu.
7 Ikujanika Kumuswaangano Uumbi: Ikuti naa akaambo kabukkale bumwi capa kuti muyande kuyoojanika kumuswaangano wacooko uumbi, ikutali nkomwaabilidwe alimwi muyanda kwakoona, mwalombwa kubona mulembi wanu mumbungano. Ulakonzya kumupa foomu Yakulombela Kwakoona. Mpoonya amwiitumye kubusena kuyoocitilwa Muswaangano. Ikuti naa mudolopo kulacitwa miswaangano minji, amubone kuti afoomu yanu mwalemba madeeti alimwi amwaambo uuyoobelesyegwa kumuswaangano ngomuyanda kuyoojanika.
8 Ikukwabilila Ntenda: Imbunga ya Jehova caluyando ilapa malailile aagwasya ciindi kaciciliko kujatikizya zyamiswaangano. Cilausisya kuti mumiswaangano iili mboibede mumyaka yainda, basimiswaangano bamwi bakasinyikilwa mpasya amulilo calo cakali kukonzya kweelebwa. Myootokala ayalo yajaya bantu banji. Bakwesu bapedwe nguzu alimwi abazyali, baambilwa kuti kababikkila maano kutwaambo ootu tupati-pati kutegwa miswaangano kaikkomanisya ikutali kuba mumause akaambo kantenda yacitika akaambo kabuyamba bwesu.
9 Cakutadooneka, icipa kuti kakuba ntenda yamulilo kumiswaangano takuli kuti nkujikila munsi-munsi azivwuka pe, pele mbana ibateendelezyegwi basobana naa basosela nkuni. Aboobo, ikutegwa mukwabilile bakwesu anywebo lwanu buya kumugama, mutalekeli bana banu kweendeenda kakunyina uubalanga; mutalekeli bana baniini kulanga meenda aawalauka nokuba ikubalekela kuti kabasosela nkuni. Balakonzya kuti inga kabazyicita eezyi kabotu kumunzi, pele busena bwamuswaangano mbumbi alimwi tweelede kucenjela kutegwa kutabi ntenda iicitika. Bantu banji bakkede antoomwe alimwi bana balayanda kusobana nobali aabananyina. Balanyonganizyigwa, eelyo tabakonzyi kubona kuti kulakonzya kuba ntenda, aboobo tatweelede kubasiila nkendulu, mancisi naa malambe. Penzi limwi ndyakuti ibazyali balasiya bana basyoonto muzivwuka ciindi camasikati nobaunka mukati kuya kuswiilila makani pulogilamu noyatalika. Ibana beelede kukkala antoomwe abazyali babo ciindi camapulogilamu. Iciindi basikugwasyilizya nobabona kuti kuli bana baile kweendeenda abusena acitilwa muswaangano kakunyina aubalanga, beelede kubajosya bana aabo kubazyali babo. Nobazyali, mwalombwa kuti mubelekele antoomwe ababelesi bamuswaangano, eelyo munzila eeyi muyootondezya kuti ‘mulabayanda babunyina.’—1 Pet. 2:17.
10 Imbungano zimwi zilabbadala myootokala iibatola kumiswaangano. Kufwumbwa myootokala ibelesyegwa kutola basimuswaangano, yeelede kuti kiili kabotu alimwi kaizumizyidwe amulawo kweenda mumugwagwa. Mweelwe wabantu taweelede kwiindilila aawo mpounyamuda mootokala. Cilayandika kapati kuti mukwesu uusimide wapegwa mukuli wakulanga-langa bubambe oobu. Uyakwiizyibya nkamu kujatikizya bubambe oobu, iciindi cakunyamuka alimwi abusena bwakukkwelela. Kufwumbwa buyumuyumu bukonzya kuba kunkamu eeyi, beelede kumuzyibya mukwesu ooyu walo nguyoobapa malailile. Muciindi nokuyandika lugwasyo, lulayo naa kubamba kaambo, ibakwesu bapakamenyi baya kukonzya kulimana penzi eeli.
11 Tuli Ceebelo Kumeso Aabantu: Sena bantu balakubona kwiindana kuliko akati ka Bakamboni ba Jehova abantu bamunyika eeyi? Inzya buya! Amubone twaambo tumwi ntobakaamba bantu batali Bakamboni ba Jehova: “Lyoonse twali kumuzumizya kucita miswaangano alimwi abamwi abusena buno, pele nywebo ndinywe mwiinda kutakatazya alimwi mulaa luse.” “Nsondo yamana kwakali cikombelo cimwi. Ikwiindana kuliko akati kanu acikombelo eeci, takudoonekwi buya pe.” “Tuli masimpe lyoonse kuti mulakonzya kutugwasya akubelekela antoomwe.” Sena tatugwasyigwi atwaambo tuli boobu ikubona mbuli “busongo buzwa kujulu” mbobutugwasya kapati kusumpula ibube bwesu? (Jak. 3:17) Mbwaanga tuli ‘ceebelo kumeso aabantu,’ atubone kuti kulilemeka kwesu ciindi coonse kutondezya bulemu abubotu bwa Leza wesu, Jehova.—1 Kor. 4:9.
12 Mbwaanga ‘ziyanza zyaansi aano zili mukucinca,’ tuyandika muswaangano wacooko kutegwa tugwasyigwe kuzumanana kubikkila maano kuzintu zyakumuuya. (1 Kor. 7:31) Ikulibambila kuyoojanika mazuba oonse kuyandika kusolekesya, pele kuli mpindu iiliko mukucita boobo. Mwaka uuno Muswaangano Wacooko wa “Amumulemeke Leza,” wabambwa kutegwa utugwasye kuzumanana cakutazungaana mbotulangila kuzuzikizyigwa kwalubeta lwa Jehova kunyika ya Saatani. Tutalekeli cintu cili coonse kuti citulesye kuyootambula malailile ngatubambilide Jehova.—Is. 51:4, 5.
MALAILILE: Mumbungano imwi aimwi, mulembi nguuyoolanganya zyoonse zijatikizya muswaangano wacooko alimwi uyoobona kuti wabakulwaizya boonse cabusungu kujatikizya nguwo. Ikuti naa mulembi katako, mwaalu umbi weelela weelede kwiilanganya milimo eeyi. Mulembi weelede kwaatobelezya kabotu malailile oonse ngatambula kuzwa kubusena buyoocitilwa muswaangano aakwakoona, mulimo wakulisungula alimwi abubambe bwamulimo bwamuswaangano bumwi bwamusyule naa kumbele. Weelede kubaa ciindi cibotu amiswaangano kutegwa abale (KUTALI kwaamba buyo mubufwaafwi) akupandulula magwalo oonse aakumuswaangano. Ibaalu boonse, ikapati mulembi, beelede kubuzyiba kabotu-kabotu bubambe bwamuswaangano bumwaigwa mumagwalo alimwi a Mulimo Wesu Wabwami.
Kabbokesi kali apeeji 3]
Ziindi Zyama Pulogilamu
Buzuba Bwakusaanguna alimwi a Bwabili
8:45 hrs. – 16:00 hrs.
Bwatatu
8:45 hrs. – 15:25 hrs.
Imulongo wa Miswaangano Yacooko Yamu 2003 ya “Amumulemeke Leza”
MADEETI:BUSENA: MWAAMBO NAA MYAAMBO:
AUGUST 8-10
KAFUE CN
KALOMO CN & CG
KITWE (Buchi) CW
KITWE (Chamboli) E & ASL
LUSAKA E & ASL
MKUSHI CW
MONGU SK
MPIKA CW
MPONGWE CW
SAMFYA CW
AUGUST 12-14
KALUNGU CW
SENANGA SK
AUGUST 13-15
KAZEMBE CW
LYENGA (Chongwe) CN
MULOBEZI SK
MUTENDA CW
MWEWA CW
AUGUST 15-17
CHINGOLA CW
KAFUE CG
KASAMA CW
LUSAKA (Cibemba) CW
MUFULIRA CW
AUGUST 17-19
MUYOMBE TB
NYIMBA CN
SIKUNDU (Kalabo) SK
AUGUST 18-20
KABOMPO LV
KABULA CW
MUNUNGA CW
MWANDI SK
AUGUST 20-22
LUALABA CW
AUGUST 20-22
NSAMA CW
AUGUST 21-23
PETAUKE CN
AUGUST 22-24
CHINSALI CW
KAOMA SK
LUANSHYA CW
LUSAKA CN
MUMBWA CN & CG
NDOLA CW
SOLWEZI CW
AUGUST 23-25
KALA (Kawambwa) SW
LUWINGU CW
MAPANZA CG
MUTOYA (Mwinilunga) CW
AUGUST 24-26
MATAMBAZI CN
MWANGE (Mporokoso) SW
AUGUST 25-27
KATETE CN
LUSWISHI CW
AUGUST 27-29
MALAMBANYAMA CG
MULILIMA CW
AUGUST 29-31
CHILILABOMBWE CW
CHIPATA CN
KABWE CW
KASEMPA KD
KASHITU CW
KAWA CW
LUNDAZI CN & TB
MANSA CW
MBALA CW
SOLWEZI KD
ASL – Mwaambo Wakutambaika Waku Amelika CG - Chitonga
CN - Chichewa CW - Chibemba E - Chingisi KD - Chikaonde
LV - Chilubale SK - Chilozi SW - Chiswahili TB - Chitumbuka