Muswaangano Wacooko wa Bakamboni ba Jehova Wamu 2002 wa “Basikwaambilizya Bwami Ibasungu”
1 “Ndakakondwa nibakandaambila kuti, katuya kuŋanda ya-Jehova.” (Int. 122:1) Notulanga-langa majwi aasintembauzyo, tulabona mbuli (1) mbwaakalimvwa ciindi naakatambwa kuti abasangane mukukomba Jehova, (2) ikubota kwabantu mbaakali kuyanzana limwi balo ibakajisi luyandisisyo mubukombi bwakasimpe alimwi (3) kulibambila nkwaakali kuyandika kutegwa beendele antoomwe kuya kuŋanda ya Leza.
2 Sena majwi aasintembauzyo alatunjila mumoyo ciindi notumvwa bubambe buli mukucitwa bwamuswaangano wacooko? Tulakkomana ciindi notuyeeya mbuli mbotwakakkomenyi kumiswaangano yakainda alimwi tulakulangila kuswaangana kwaalubazu abakwesu bamuyanda Jehova. Ibubambe bwakacitwa kale Bwamuswaangano Wacooko wamazuba otatwe wa “Basikwaambilizya Bwami Ibasungu” wamu 2002 mucilawo coonse ceendelezyegwa amutabi wamu Zambia. Ecino nceciindi cakutalika kulibambila kutegwa tukajanike akugwasyigwa acakulya cakumuuya icakabambwa kale.
3 “Mubanzi uuzi uusyomekede” wabamba cilyo cakumuuya aciindi ceelede calo ciya kuligwa lyamuswaangano. (Lk. 12:42) Ibantu bali mumabbazu aindene-indene baambilwa nkobaya kucitila muswaangano kutegwa kutakabi kwaatikizyanya abusena aaswaanganinwa. Aboobo, kuti kakuli kaambo kalimvwisya kaya kumupa kuswaanganina kumbi kuleka kooko nkomweelede alimwi akuti muyanda kwakoona, mulembi wambungano weelede kulomba foomu Yakulombela Kwakoona kuofesi lyamutabi yalo njomweelede kulemba moonse muyandika kulemba, eelyo mwaakumana mukabape ba Kkomitii Yamulimo Yambungano. Kunze lyaboobo, bunji bwabakwesu batalika kale kubamba zibeela zyamuswaangano zili mbozibede kutegwa “zintu zyoonse buyo zicitwe kabotu akucililana.” (1 Kor. 14:40) Mbwaanga zintu zinji zyakacitwa kale, ino ncinzi kutugama ncotukonzya kucita mukulibambila kuya kujanika kumuswaangano?
4 Amutalike Kulibambila Lino Kutegwa Mukajanike Mazuba Oonse Otatwe: Sena inga mwayanda kulomba mazuba kuli bakamulemba mulimo wakumubili kutegwa mukakonzye kujanika kumuswaangano nkomwakaambilwa kuunka? Jehova ulizyi kuti bamwi bantu balemba milimo “[mbaa]sikakomokomo.” (1 Pet. 2:18) Pele miswaangano ilayandika kapati, eelyo tuyanda kuti tusoleke mbuli mbotukonzya kutegwa tukajanike kumapulogilamu woonse. Amumusikile Jehova mumupailo kujatikizya kaambo aaka akulomba kusololelwa kutegwa zintu zikeende kabotu.—Neh. 2:4.
5 Bubambe Bwamasena Aakoona: Kanjikanji bakwesu balacita bubambe bwabo beni bwakuyookkala abamukowa wabo naa kubeenzinyina bali mumadolopo mucitilwa miswaangano. Muminzi ibakwesu balayaka zivwuka naa koona muzilabba zipati ziyakwa abakwesu basikulisungula kumuswaangano. Mumiswaangano imwi babelesya maanda aawona basicikolo kutegwa bajane aakoona aabo baboola kumuswaangano. Notupegwa akoona kubakwesu naa kuli bamukowa, taceelede kuti basimuswaangano bakubone munzila imbi kusamausya kwabakwesu kwiinda mukuzumanana kukkala kwamazuba aayindilila wamana muswaangano kutegwa bapumune kabotu. Aaya maanda ngaciindi buyo camuswaangano. Aabo bapegwa aakoona munzila eeyi, beelede kubona kuti balo abana babo balilemeka kuli balaaŋanda alimwi akutajaya cili coonse naa kulanga-langa mpasya naa mumasena aŋanda mobateelede kunjila. Ikuti naa uulaaŋanda waba abuyumuyumu kumakani aaya, cakufwambaana ulakonzya kuzyibya baku Cibeela Cilanga Aakoona kumuswaangano, eelyo ibakwesu aaba banakulibambide kugwasya.
6 Nokuba kuti aabo bayanda lugwasyo lwaalubazu balagwasyigwa a Banakristo bamukowa wabo, ibaalu alimwi abamwi buyo ibalizyi penzi eeli mumbungano, caluyando balakonzya kucita bubambe kutegwa babagwasye. (1 Tim. 5:4) Iciindi foomu Yakulembela Kwakoona noipegwa ku Kkomitii Yamulimo Yambungano, beelede kumulanga-langa umwi aumwi uulomba busena bwakoona akubona kuti uleelela kaitana akutuminwa foomu ku Cibeela Cilanga Aakoona. Imulembi wa Mbungano weelede kubikkilizya anamba yaluwaile afoomu kutegwa Cibeela Cilanga Aakoona cikonzye kumutumina kuti naa kwaba mibuzyo.
7 Amulange-Lange mu Mbungano: Ikuti kamuzyi kuti mukwesu naa mucizyi mulema naa kuti tajisi zintu ziyandika zikonzya kumupa kujanika kumuswaangano, inga cainda kubota ikuti ‘twapedana’ caluyando kwiinda mukumugwasya? (2 Kor. 6: 12, 13; Dt. 15:7) Ooyu ngomuuya Paulo ngwaakakulwaizya kulugwalo lwa 2 Ba-Korinto 8:14. Sena tamukonzyi kubaambila kuti mukaunke limwi kumuswaangano nikuba kubabbadalila? Ikuti kabali bapainiya, cakutadooneka balakonzya kumwaambila twaambo tubotu ciindi nomuli mulweendo. Ikuti kabali bakaindi mumbungano, mulakonzya kumvwa twaambo tubotu tomutanamvwide twateokrasi. Sena tamuyandi kusangana abakwesu abacizyi aaba kutegwa mukulwaizyigwe nywebo alimwi abamukwasyi wanu? Muuya wanu wabwaabi baya kuulumba alimwi Jehova uya kumupa bulumbu.—Tus. 28:27; Mt. 10:42.
8 Amulisungule Kubeleka Kamuli Bagwasyilizyi: Iciindi camuswaangano, myaanda-myaanda yabasikugwasyilizya balapa kuti miswaangano kayeenda kabotu. Basikugwasyilizya babelekela mukati, balabagwasya bantu kwiinda mukubatondezya aakukkala, pele baya babelekela mumasena musiigwa myootokala alimwi ancinga, balazyilanganya zibelesyo eezyi ciindi camuswaangano kutegwa zitabbigwi. Bakucibeela Cakusalazya busena balijisi coolwe cakusumpula mpuwo yesu yakuti tuli balondo nkaambo ibusena bwakukombela mbotubelesya kwamazuba masyoonto balabusiya kabusalala kwiinda mbotwaabujanide. Sena inga tatukonzyi kubagwasya aaba naa kugwasya baabo bali muzibeela zimwi? Sena mulilibambide kugwasyilizya kubeleka ‘akumana milimo camoyo woonse’ abanyoko bakumuuya?—Zef. 3:9.
9 Ikukwabilila Ntenda: Imbungano ya Jehova caluyando ilapa malailile aagwasya ciindi kaciciliko kujatikizya zyamiswaangano. Cilausisya kuti mumiswaangano iili mboibede mumyaka yainda, basimiswaangano bamwi bakasinyikilwa mpasya mumulilo calo cakali kukonzya kweelebwa. Myootokala ayalo yajaya bantu banji. Bakwesu bapedwe nguzu alimwi abazyali, baambilwa kuti kababikkila maano kutwaambo ootu tupati-pati kutegwa miswaangano kaikkomanisya ikutali kuba mumause akaambo kantenda yacitika akaambo kabuyamba bwesu.
10 Cakutadooneka, icipa kuti kakuba ntenda yamulilo kumiswaangano takuli kuti kujikila munsi-munsi azivwuka pe, pele mbana ibateendelezyegwi basobana naa basosela nkuni. Aboobo, ikutegwa mukwabilile bakwesu anywebo lwanu buya kumugama, mutalekeli bana banu kweendeenda kakunyina uubalanga; mutalekeli bana baniini kulanga meenda aawalauka nokuba ikubalekela kuti kabasosela nkuni. Balakonzya kuti inga kabazyicita eezyi kabotu kumunzi, pele busena bwamuswaangano mbumbi alimwi tweelede kucenjela kutegwa kutabi ntenda iicitika. Bantu banji bakkede antoomwe alimwi bana balayanda kusobana nobali aabananyina. Balanyonganizyigwa, eelyo tabakonzyi kubona kuti kulakonzya kuba ntenda, aboobo tatweelede kubasiila nkendulu, mancisi naa malambe. Penzi limwi ndyakuti ibazyali balasiya bana basyoonto muzivwuka ciindi camasikati nobaunka mukati kuyakuswiilila makani pulogilamu noyatalika. Ibana beelede kukkala antoomwe abazyali babo ciindi camapulogilamu. Iciindi basikugwasyilizya nobabona kuti kuli bana baile kweendeenda abusena acitilwa muswaangano kakunyina aubalanga, beelede kubajosya bana aabo kubazyali babo. Nobazyali, mwalombwa kuti mubelekele antoomwe ababelesi bamuswaangano, eelyo munzila eeyi muyootondezya kuti ‘mulabayanda babunyina.’—1 Pet. 2: 17.
11 Imbungano zimwi zilabbadala myootokala kubatola kumiswaangano. Kufwumbwa myootokala ibelesyegwa kutola basimuswaangano, yeelede kuti kiili kabotu alimwi kaizumizyidwe amulawo kweenda mumugwagwa. Mweelwe wabantu taweelede kwiindilila aawo mpounyamuda mootokala. Cilayandika kapati kuti mukwesu uusimide wapegwa mukuli wakulanga-langa bubambe oobu. Uyakwiizyibya nkamu kujatikizya bubambe oobu, ciindi cakunyamuka alimwi abusena bwakukkwelela. Kufwumbwa buyumuyumu bukonzya kuba kunkamu eeyi, beelede kumuzyibya mukwesu ooyu walo nguyoobapa malailile. Muciindi nokuyandika lugwasyo, lulayo naa kubamba kaambo, ibakwesu bapakamenyi baya kukonzya kulimana penzi eeli.
12 Sena Masimpe Bantu Balazibona Nzyotucita? Iciindi camuswaangano wacooko wamwaka wamana, musankwa uubeleka muhotela iwakacileka kwiiyaa Bakamboni ba Jehova kwamyaka iili 20 yainda, wakaambila Bakamboni bamwi kuti wakali kuyeeya kuti atalike alimwi ikwiiya Bbaibbele akutalika kuswaangana. Nkaambo nzi? Nkaambo kakuti Bakamboni bakalijisi luyando kulinguwe alimwi bakali kumupa bulemu ciindi nobakali kuhotela.
13 Musambazi umwi wakabaamba boobu bakwesu: “Kabunga kanu nkakainda kubota. . . . Bantu banu balakkazika moyo alimwi balaabulemu.” Elo kaka eeci cilamukonda Taateesu wakujulu natubona notucita kweelana amalailile aa Jesu aakuti: “Mumuni wanu umunike kunembo lyabantu, kuti babone milimo yanu mibotu, balemeke Usowanu uuli kujulu”!—Mt. 5:16.
14 Atucite kweelana ambuli mbwaakabede Mwami Davida walo cakukondwa wakayandisisya kuunka kuya kukomba kuŋanda ya Jehova. Miswaangano yesu yacooko nkasensa kacakulya cakumuuya alimwi taku ciindi ciinda ceeci kubota caboola kumakani aakuyanzana caluyando. Aboobo, twamulomba kuti mutalike kulibambila kutegwa mukajanike mazuba oonse otatwe muzibeela zyoonse Aamuswaangano Wacooko wamwaka uuno wa “Basikwaambilizya Bwami Ibasungu”!
MALAILILE: Mumbungano imwi aimwi, mulembi nguuyoolanganya zyoonse zijatikizya muswaangano wacooko alimwi uyoobona kuti boonse wabakulwaizya kuyoojanika kumuswaangano. Ikuti mulembi katako, mwaalu uuzyi mbotweendelezyegwa twaambo, ulakonzya kwiilanganya milimo eeyi. Mulembi weelede kwaaccilila kabotu malailile woonse ngatambula kuzwa kubusena buya kucitilwa muswaangano aajatikizya kwakoona, aamulimo wakulisungula kubikkilizya abube bwamilimo iiya kuba alimwi aiyandika kucitilalimwi yamuswaangano. Weelede kujana ciindi cili mbocibede lyamiswaangano kutegwa abale (IKUTALI kwaamba buyo mumajwi aakwe) akupandulula kabotu magwalo oonse aamuswaangano. Ibaalu boonse, ikapati mulembi, beelede kuzimvwinsya eezyi kujatikizya bubambe bwamuswaangano bulembedwe mumagwalo alimwi amu Mulimo Wesu Wabwami.
Kabbokesi kali apeeji 3]
Ziindi Zyama Pulogilamu
Buzuba Bwakusaanguna alimwi a Bwabili
8:45 hrs. - 16:00 hrs.
Bwatatu
8:45 hrs. - 15:30 hrs.