Muswaangano wa Cooko wa Bakamboni ba Jehova wamu 2007 wakuti “Amutobele Kristo”
1, 2. (a) Mbuti Musa mbwaakabakulwaizya bana Israyeli kugwasyigwa kukubungana antoomwe? (b) Ino nkulibambila kuli buti nkotweelede kucita lino?
1 Musa wakapa malailile kubana Israyeli abeenzu boonse kuti kababungana antoomwe kwainda myaka iili ciloba kuti babalilwe Mulawo. Ino wakajisi makanze nzi? “Kuti baswiilile, baiye.” (Dt. 31:10-12) Jehova wakabona kuti cakali kuyandika kuti bantu bakwe kababungana mubunji. Ino-ino bantu ba Jehova bayoobungana alimwi kwamazuba otatwe ku Muswaangano Wacooko wakuti “Amutobele Kristo.”
2 Sena mwakatalika kale kulibambila? Sena muyandika kulomba mazuba kuli basikumulemba mulimo aakuyoojanika kumuswaangano? Sena inga mwabagwasya mbomwiiya limwi Bbaibbele naa bamumukwasyi batali Bakamboni kuyoojanika kumuswaangano antoomwe andinywe? Sena kuli bamwi bali mumbungano bayandika lugwasyo kutegwa bakajanike? Sena muyanda kuyoojanika kumuswaangano uumbi kutali kooko mbungano yanu nkoyeelede kuyooswaanganina? Sena muyooyanda kwakoona? Twaambo ootu tutobela tuyoomugwasya kulibambila.
3. (a) Ino nkuzuzikizigwa kuli buti kwalugwalo lwa Isaya 25:6 kucitika mazuba aano? (b) Ino ncinzi cabonwa kujatikizya bantu bajanika kumuswaangano wacooko buzuba bwakusaanguna, alimwi ino ncinzi ncotweelede kucita umwi aumwi kumugama?
3 Amukajanike Mazuba Oonse Otatwe: Jehova ulaabila zyakulya zyakumuuya zinji kubantu bakwe. (Is. 25:6) Eeci cilabikkilizya apobwe lyakumuuya licitwa kumiswaangano yacooko iicitwa amwaka. Kwajanika kuti bantu bajanika kumuswaangano buzuba bwakusaanguna mbasyoonto kwiinda mazuba amwi. Amukanze kuyoojanika mazuba oonse otatwe aamuswaangano wacooko uukatalusya ooyo mbunga ya Jehova ngoyatubambila. Ikuti naa muyandika kuyoolomba mazuba nkomubeleka, amwaapailile makani aaya. Mpoonya ‘amube basicamba’ kubandika abasikumulemba mulimo cakufwambaana mbobwaambilizyilwa buyo buzuba bwamuswaangano. (1 Tes. 2:2; Neh. 2:4, 5) Inga cagwasya kapati kubapandulwida basikumulemba mulimo kuti muswaangano wacooko ncibeela cabukombi bwanu. Kucita boobu cakufwambaana kuyoopa kuti cibaubaubile basikumulemba mulimo kuti bamuzumizye kuyoojanika kumuswaangano.
4. Mbuti mbotukonzya kubagwasya kulibambila mbotwiiya limwi Bbaibbele alimwi abamumukwasyi wesu batali Bakamboni kuyoojanika kumuswaangano wacooko?
4 Kulibambilila Antoomwe Ambomwiiya Limwi Bbaibbele Alimwi Amukwasyi Wanu: Elo ciyookkomanisya kapati kuyoojanika amuswaangano antoomwe ambomwiiya limwi Bbaibbele, akulibonena luyando lwabunyina lwa Bunakristo ‘mumbungano mpati’! (Int. 22:25) Amubaambile kakucili ciindi kutegwa bajane ciindi cakuyoojanika. Amubaambile twaambo ntomukkomanina nomujanika kumiswaangano yacooko. Mulakonzya kubagwasya kulibambila basikwiiya banu kwiinda mukubatondezya mavidiyo aatondezya miswaangano yakainda, inga mwabatondezya vidiyo ya United by Divine Teaching. Amubazibye abalo bamumukwasyi batali Bakamboni nzyomulibambila. Ambweni balakonzya kulibambila kuyooyebelela cisobano naa kujanika buzuba bomwe bwamuswaangano wacooko andinywe.
5, 6. Ino mbuti bubambe bwakaubausyigwa bwakucesya zyakulya mbobwatugwasya, alimwi mulimo uuli buti ngotweelede kucita?
5 Kwamyaka minji, bubambe bwamiswaangano bwaubausyigwa. Twakulwaizigwa kucesya mweelwe wazintu azyakulya nzyotunyamuna kumuswaangano. Twabona kuti ‘zintu buyo zisyoonto ziyandika’ kutegwa tuukkomanine muswaangano. (Lk. 10:42) Ikucesya zyakulya azintu nzyotunyamuna kumuswaangano, kupa kuti zintu nzyotweelede kusowa kaziceya abusena aswaanganinwa. Nokuba kuti ncintu ciyandika kumuntu uuli woonse kusalazya abusena mpakkede bwamana buzuba bwamuswaangano uuli oonse, tweelede kubona kuti busena bulasalala buzuba boonse.
6 Jesu naakabamba cakulya cabantu bainda ku 5,000, cakaabilwa munzila mbotu alimwi busena bwakasalazigwa mbocakamanina buyo cakulya. (Lk. 9:14, 15; Joh. 6:10-13) Mumulawo wakapegwa a Musa, baalumi bakabikkwa kulanganya bweende bwatwaanda twakulida atempele. (1 Mak. 9:26) Sena tatukonzyi kuziba nzyayanda Jehova kulindiswe? Taciyandiki kusiya zipepa zibikkila zyakulya, zintu ziyandika kusowa, mabbodela alimwi atusinsyo twamabbodela naa mabbodela aazipulasitiki abusena mpotukkede. Ibakkomiti yamuswaangano wacooko batubikkila bubambe bwakuti katukonzya kujana busena bubotu bwakusowela tombe, aboobo atwaabelesye masena aaya.
7. Ncinzi ciyoogwasya bazyali abana kukatalusyigwa kapati ciindi cakulya camasyikati?
7 Ciindi cakulya kumiswaangano yacooko nceciindi cakuti bazyali babandike abana babo twaambo tupati-pati twamuswaangano akubalumba akaambo kakuswiililisya. (Amweezyanisye fy cibalo 1 munc. 2.) Nokuba kuti tukulwaizigwa kuyanzana kutegwa ‘tuyumizyanye’ ciindi cakulyookezya, bana basyoonto tabeelede ‘kulekelwa’ kulunduka-lunduka.—Rom. 1:11, 12; Tus. 29:15.
8, 9. Ino mbuti mbotukonzya kutondezya muuya wabwaabi waambwa kuli 1 Timoteo 6:18? (b) Ino mbubambe nzi buliko bwakugwasya bamwi bayanda lugwasyo mukujana masena aakoona?
8 Amubagwasye Bakwesu Abacizi: Mwaapostolo Paulo wakakulwaizya Banakristo aabo bakali bavwubi kumubili “kuti bacite milimo iiluzi, kuti babe bavubi mukumana milimo mibotu, kuti kabafwamba kupa akwaabilana abeenzinyina.” (1 Tim. 6:17, 18) Tulakonzya kuba amuuya wabwaabi ooyo Paulo ngwaakakulwaizya ikuti naa twalanga-langa bukkale bwabacembeede abalema, aabo bali mumulimo waciindi coonse, bazyali bali balikke naa bamwi bali mumbungano bayandika lugwasyo kutegwa bakajanike kumuswaangano wacooko. Mukuli wakugwasya bantu aaba ngwabantu bamumukwasyi ibali mba Kamboni, pele baalu abamwi balakonzya kubona akugwasya ikuti kakuyandika.—Gal. 6:10; 1 Tim. 5:4.
9 Ikuti muntu umwi mumbungano kayandika busena bwakoona, iba Kkomiti Yamulimo Yambungano balakonzya kubona ikuti naa sikumwaya uleelela kulemba foomu ya Kulomba Kwakoona. Katana kutuma foomu eeyi ku Cibeela Cilanga Kwakoona, malailile aabikkidwe afoomu ayeelede kulangwa-langwa.
10. Ino malailile nzi ngotweelede kutobela notulibambila kuyandaula mootokala wakubbadela?
10 Mbungano zimwi zibbadela basimyootokala kubatola kumasena aamiswaangano. Mootokala uuli woonse uubelesyegwa kubweza basimuswaangano, weelede kuti kauzumizidwe amulawo kweenda mumugwagwa alimwi kauli kabotu. Alimwi myootokala tayeelede kuzyula kapati. Cilayandika kapati kuti mukwesu uusimide apegwe mulimo wakulanganya bubambe oobu. Uyoobazibya bamunkamu kujatikizya bubambe buli boonse, iciindi cakunyamuka alimwi abusena nkobayootantila. Penzi lili lyoonse ndobakonzya kujana bamukakamu liyoozibisyigwa kumukwesu ooyu uubikkidwe walo uuyoopa malailile. Ciindi nokwayandika lugwasyo, kupa lulayo, naa kulanganya penzi limwi, bakwesu bapakamene alimwi bapampu mbobakonzya kuyoocita boobo.
11. Ino malailile nzi aapegwa ikuti katuyanda kuyoojanika kumuswaangano uumbi kutali kooko mbungano yesu nkoyeelede kuyooswaanganina?
11 Kujanika Kumuswaangano Wacooko Uumbi: Kutegwa kukabe busena bwakukkala bupati, mabbuku manji, kwakoona, azimbi zili boobu zikkwene, mwakulwaizyigwa kuyoojanika kumuswaangano wacooko ooko mbungano yanu nkoyeelede kuyooswaanganina. Ikuti bukkale bwanu bwapa kuti mukajanike kumuswaangano wacooko uumbi alimwi ikuti kamuyanda kwakoona, mwalombwa kuti mwiitumine foomu ya Kulomba Kwakoona kubusena bwamuswaangano bweelede. (Amubone mulongo wamwaka uuno apeeji 5 kujatikizya miswaangano yamu Zambia kweelana amazuba noiyoocitwa.) Ikuti kakuli miswaangano minji iicitwa mudolopo omo, mweelede kulemba mwaambo alimwi amazuba aamuswaangano ngomuyanda kuyoojanika.
12. Ino ntwaambo nzi twapa kuti kukabe buyo bubambe bwakusandulula mwaambo wakutambaika mumasena aamuswaangano aambwa?
12 Mwaambo Wakutambaika: Mbuli mbomukonzya kubona mukabbokesi kamulongo wamazuba alimwi amasena aamiswaangano yacooko iiyoocitwa mu Zambia, kusandulula mwaambo wakutambaika kuyoocitwa BUYO mumasena aamiswaangano yacooko obile, ku Lusaka-Cingisi alimwi aku Ndola-Cingisi. KUNYINA BUBAMBE bwamwaambo wakutambaika buyooba kumiswaangano iimwi kunze lyayeeyi. Bubambe oobo bupa kuti kukabe busanduluzi bubotu alimwi kutegwa bantu banji bakakkomane akuyumizyanya. Baalu alimwi abasikusandulula mwaambo wakutambaika beelede kubazibya basinke matwi bali mumbungano yabo kujatikizya bubambe oobu alimwi akubagwasya kulibambila kutegwa bakajanike kumuswaangano wacooko nkwaayoosandululwa makani mumwaambo wakutambaika. Baalu beelede kubonana amusinke matwi aumwi uuli mumbungano yabo kutegwa babone kuti naa uyandika lugwasyo.
13, 14. (a) Ino mbubambe nzi mbotwabambilwa katutanasika abusena aacitilwa muswaangano? (b) Mbuti mbotunga twatondezya kulumba kumilimo yoonse njotucitilwa? (Amubale Ba-Hebrayo 13:17.)
13 Amutobele Bubambe Bubikkidwe: Notusika amuswaangano, kulalibonya kuti kwacitwa milimo minji mukulibambila kuti tukasike. Bakwesu basikugwasyilizya balatwaanzya akutupa tupepa twapulogilamu akututondezya masena aakukkala. Bakwesu abacizi balabusalazya busena akubamba kabotu kucibumbili. Alimwi kwabelekwa mulimo uuyandika ngotutakonzyi kubona wakulibambila zibeela zyamuswaangano alimwi akulanganya milimo imwi.
14 Kumuswaangano aumwi, bantu banji balabeleka kwamyezi minji kulibambila kabotu alimwi mikwasyi yabo ayalo yagwasyilizya mukubapa ciindi cakulanganya zintu eezi ziyandika kapati. Sena tatulumbi kukulyaaba nkobacita kutegwa tugwasyigwe? Tulakonzya kutondezya kulumba kwiinda mukutobela malailile aali mucibalo cino alimwi amalailile aambi ngotuyoopegwa waakuswena muswaangano wesu. (Heb. 13:17) Ikutobela malailile cakuliyandila aumwi nkwacita kuyoopa kuti zintu “zyoonse buyo zicitwe kabotu akucililana.”—1 Kor. 14:40.
15. (a) Nkaambo nzi kubungana kwabantu ba Jehova ncokuyandika kapati mazuba aano? (b) Ino ncinzi aumwi wesu ncakonzya kucita lino?
15 Kuswaangana kwabantu ba Leza kulayandika ‘mbotukubwene kuti buzuba bwa Kristo buli afwaafwi.’ (Heb. 10:25) Kumiswaangano yesu ya Bunakristo, ibaciinga camuzike musyomesi uucenjede balatupa makani aakonzya kutugwasya “kucenjela kubamba majwi oonse” Jehova ngayanda kuti tutobele. (Dt. 31:12) Amutalike lino kulibambila kutegwa mukajanike mazuba oonse otatwe ku Muswaangano Wacooko wamutwe wakuti “Amutobele Kristo” akuyoogwasyigwa kumalailile oonse aakumuuya alimwi akuyanzana kukkomanisya.
[Kabbokesi kali apeeji 3]
Ciindi Camiswaangano
Buzuba Bwakusaanguna a Bwabili
8:20 hrs.—16:15 hrs.
Buzuba Bwatatu
8:20 hrs.—15:35 hrs.