Muswaangano Wacooko wa Bakamboni ba Jehova Wamu 2008 wa “Amusololwe Amuuya wa Leza”
1. (a) Nkaambo nzi lulayo lwa Paulo ku Banakristo bana Hebrayo ncolugwasya mazuba aano? (Amubale Ba-Hebrayo 10:24, 25.) (b) Ncoolwe nzi ncotulangila ciya kutupa kubelesya lulayo lwa Paulo?
1 Mwaapostolo Paulo wakakulwaizya Banakristo bana Hebrayo kuti kababungana akukulwaizyanya “lyoonse” mbobabwene kuti buzuba bulaafwaafwi. (Heb. 10:24, 25) Kuli bumboni bunji butondezya kuti “buzuba” Paulo mbwakaamba bulaafwaafwi kapati. Aboobo, tulangila kwaakuswaangana abakwesu abacizyi kutegwa tukapegwe malailile aakonzya kutusololela muzyiindi eezyi zyikataazya ‘mumazuba aano aamamanino.’ (2 Tim. 3:1) Tuya kuba acoolwe cili boobu amiswaangano yacooko yamu 2008.
2. (a) Nkaambo nzi ncociyandika kujanika kumuswaangano mazuba oonse otatwe? (b) Ino mbuti mbotukonzya kutalika kulibambila kutegwa tukajanike?
2 Amukajanike Mazuba Oonse Otatwe: Tumukulwaizya kujanika mazuba oonse otatwe. Kwiinda ‘mukutaleka kulibunga-bunga,’ kunyina nociya kutwiinda cakulya cakumuuya ciyandika kapati. (Heb. 10:25) Kamutalika lino kulibambila kakucili ciindi. Inga mwabazyibya bakamulemba mulimo cakufwambaana kutegwa abalo babone mbobakonzya kubeleka. Ikuti bana benu tabaninga jala zyikolo ciindi camuswaangano, mulakonzya kubazyibya bamayi kujatikizya muswaangano. Amubaambile kuti muswaangano ncintu ciyandika kapati mubukombi bwenu. Jehova uya kumulongezya ikuti mwasaanguna kuyandaula Bwami.—Mt. 6:33.
3. Ino ncinzi bamwi ncobacita kutegwa bakaakujanike kumiswaangano yacooko?
3 Babelesi ba Jehova kunyina nobeezyanisya imali kuzyilongezyo zyiboola akaambo kakujanika kumuswaangano. Amulange zyitondezyo zyimwi zyabaabo bakakanzide kwaakujanika ku Muswaangano Wamasi wa Bakamboni ba Jehova wakali ku New York City wakajisi mutwe wakuti, Divine Will (Luyando lwa Mulengi) mu 1958. Umwi mukwesu wakauleka mulimo wakwe wakuyaka kwansondo zyobilo kutegwa agwasye alimwi akujanika kumuswaangano. Imukwesu umwi ku Virgin Islands wakauzya busena bwamazyekele osanwe (5 acres) ikutegwa banamukwasyi boonse bali cisambomwi bakajanike kumuswaangano. Banabukwetene ibacili bana bakauzya bwato bujisi njini ikutegwa babatoleele bana babo boonse botatwe kumuswaangano, bakali akati kamyeezi yobilo kusikila kumyaka iili ciloba. Ibakwesu botatwe banabunyina bazwa kucisi ca California bakaambilwa kuti, ikuti batakajaniki kumilimo yabo, baakuboola baya kujana milimo yabo yapegwa bambi. Nokuba boobo, eci tiicakabalesya kujanika kumuswaangano ooyo ngobatakalubi.
4. Muunzila nzi motukonzya kubayeeya bamwi?
4 Amubagwasye Bamwi Kuti Bakajanike: Paulo wakaambila banyina kuti ‘kabayeeyana.’ (Heb. 10:24) Sena kuli bakwesu abacizyi ibali mu Ciiyo Cabbuku Cambungano ibayanda lugwasyo kutegwa bakajanike kumuswaangano wacooko? Sena inga mwabagwasya basikwiiya Bbaibbele banu kuukkomanina muswaangano nokuba kuti baya kujanika buyo buzuba bomwe? Nomubaambila bamukwasyi wanu batali Bakamboni kujatikizya makanze ngomujisi aakujanika kumuswaangano, inga mwabalomba kuti mukaunke limwi. Kusoleka kwanu kuya kupa kuti mulongezyegwe.
5. (a) Ino nkuli nkotukonzya kwaajana makani aamba mazuba amasena kuya kucitilwa miswaangano yacooko? (b) Ino ncinzi ncotuyandika kucita kuti naa katuyanda kuzyiba makani aamba muswaangano uumbi ikutali kooko mbungano yesu nkoyeelede kujanika?
5 Nkotukonzya Kujana Twaambo: Amwaka bakuofesi lyamutabi balaakutuminwa luwaile ikubuzya mazuba abusena miswaangano nkoiya kubeda. Kanji-kanji ibatuma luwaile mbakwesu abacizyi ibaazyi kale makani aaya. Tumulomba kuti, kamutanatuma luwaile kuofesi lyamutabi, amulange-lange Mulimo Wesu wa Bwami wamu March 2008. Apeeji 5 mu Mulimo Wesu wa Bwami ooyu, kuli mulongo wamiswaangano yoonse iiyakucitilwa mu Zambia. Ikuti kamuyanda kuzyiba makani aamba muswaangano uumbi ikutali kooko mbungano yanu nkomweelede kujanika, mulakonzya kulembela baabo bakumuswaaangano ooyo. Ikuti naa kakuli miswaangano minji iicitilwa mudolopo, mulakonzya kulemba musyobo abuzuba bwamuswaangano ngomuyanda kuti mukajanike.
6. Ino malailile nzi aapegwa kujatikizya foomu ya Kulomba Kwakoona?
6 Lugwasyo Lwaalubazu: Ikuti sikumwaya walomba kwakoona, Ibamu Kkomiti Yamulimo Yambungano balakonzya kusala naa sikumwaya ooyo uleelela kupegwa foomu ya Kulomba Kwakoona. Mulembi katanatuma foomu ku Cibeela Cilanga Kwakoona kumuswaangano, imalailile aajanika afoomu ayelede kulangwa-langwa.
7. Ino nkaambo ncokuli bubambe bwakusandulula mumwaambo wakutambaika amiswaangano iigaminide?
7 Mwaambo Wakutambaika: Kweelana ambomwabona mukabbokesi kajisi mazuba amasena amiswaangano iiyakucitwa mu Zambia, imwaambo wakutambaika uyakucitwa buyo MUMASENA OBILO mu Zambia, ooku kunakuli buyo kumuswaangano wa Cingisi ku Lusaka aku Ndola. KUNYINA bubambe bumwi buya kuba kumiswaangano imwi. Bubambe oobu bupa kuti kukabe busanduluzi bubotu alimwi kutegwa bantu banji bakakkomane akuyumizyigwa kwabunyina. Ibaalu alimwi abasikusandulula mwaambo wakutambaika beelede kubazyibya basicuulutwi bali mumbungano yabo kujatikizya bubambe oobu alimwi akubagwasya kulibambila kutegwa bakajanike kumuswaangano wacooko nkwaayoosandululwa mapulogilamu mumwaambo wakutambaika. Alimwi baalu beelede kubonana asicuulutwi aumwi uuli mumbungano yabo kubona kuti naa inga kwayandika lugwasyo.
8. Ino malailile aali ngotuyandika kutobela notulibambila mbokweendwa?
8 Ikulibambila Mbokweedwa: mbungano zyimwi zyibbadela basimyootokala kubatola kumiswaangano. Kufwumbwa mootokala uubelesyegwa kubweza basimuswaangano, weelede kuti kauzumizyidwe amulawo kweenda mumigwagwa alimwi kuuli kabotu. Mweelwe wabantu ampasya tazyeelede kwiindilila aawo mpounyamuna mootokala. Cilayandika kapati kuti mukwesu uusimide apegwe mukuli wakulanganya bubambe oobu. Uya kwiizyibya nkamu kujatikizya bubambe oobu, iciindi cakunyamuka alimwi abusena bwakutantila. Kufwumbwa buyumu-yumu bukonzya kuba kunkamu eeyi, imukwesu ooyu weelede kwaambilwa kutegwa ape malailile. Iciindi nokuyandika lugwasyo, kupa lulayo naa kulanganya penzi limwi, ibakwesu bapakamene alimwi bapampu mbobaya kucita boobo.
9. Muunzila nzi motukonzya kumulemeka Jehova notujanika kumuswaangano wacooko?
9 Milimo Mibotu: Ikumvwida mulawo wa Jehova wakumbungana antoomwe kutegwa tumukombe kutupa kuti ‘tugwasyigwe.’ Kunze lyaboobo, kutupa coolwe cakulemeka zyina lya Jehova. (Is. 48:17) “Milimo mibotu imwi ilalibonya” kubantu banji amiswaangano yacooko alimwi bamwi baamba mbobalimvwa. (1 Tim. 5:25) Mbotulilemeka kulamukkomanisya Leza wesu Jehova.
10. Ino lugwalo lwa Matayo 4:4 lwaamba nzi kujatikizya bubotu bwakuswiilila kuzyibeela zyoonse zyapulogilamu?
10 Jesu wakaamba kuti buumi bwesu buyeeme akumvwa “majwi oonse aazwa kumulomo wa-Leza.” (Mt. 4:4) Amiswaangano yesu yacooko, Jehova ulatupa “zilyo kuciindi ceelede,” zyibambwa ‘amuzike musyomesi uucenjede.’ (Mt. 24:45) Kuli mulimo mupati uucitwa mukubamba akupa cakulya eeci cakumuuya. Toonse tweelede kulumba akaambo kakutulanganya nkwacita Jehova caluyando kwiinda mukujanika akuswiililisya kuzyibeela zyoonse zyapulogilamu.
[Kabbokesi kali apeeji 3]
Ciindi Camapulogilamu:
Buzuba Bwakusaanguna a Bwabili
8:20 hrs. - 15:55 hrs.
Buzuba bwatatu
8:20 hrs. - 15:00 hrs.