Muswaangano Wacooko wa Bakamboni ba Jehova Wamu 2009 Wakuti “Amulangile!”
1. (a) Ino nzilongezyo nzi nzyotuya kujana kwiinda mukujanika kumuswaangano wacooko kwamazuba oonse otatwe? (b) Ino ncinzi ncotweelede kucita lino?
1 Toonse tulaulangila muswaangano wacooko wamu 2009 alimwi tuliyandide kuya kuswaangana ababelesima mukutembaula Jehova “ibazyi kuti bayandika zyintu zyakumuuya.” (Mt. 5:3, NW) Mbokunga buzuba bwa Jehova buli afwaafwi, tumukulwaizya kuti nyoonse mukajanike kwamazuba oonse otatwe kutegwa tukayumizyanye kumuuya alimwi akuyooyiya mbotukonzya kwiima nji mulusyomo. (Zef. 1:14) Amubazyibye bamayi abasikumulemba mulimo kuti muswaangano wacooko ncintu ciyandika kapati mubukombi bwenu. Amulibambile kakucili ciindi alimwi kamupaila kuli Jehova akaambo kakuti nguukonzya kumugwasya.—Is. 50:10.
2. Ino nkaambo nzi ncotuteelede kuunka kumuswaangano wamasi ikuti katutali akati kabaabo basalidwe?
2 Miswaangano Yamasi: Mbwaanga miswaangano eeyi iyakuba buyo mumasi masyoonto, balikke aabo basalidwe mbobeelede kuya kujanika. Ikutobela bubambe oobu kuya kupa kuti kutakabi kwaatikizyanya mumasena aaya.—1 Kor. 14:40; Heb. 13:17.
3. Ino mbuti mbotukonzya kutondezya luyando lwa Bunakristo kubantu bamumbungano yesu?
3 Kugwasya Bamwi Kuti Bakajanike: Sena mumbungano yenu kuli bayandika lugwasyo kutegwa bakajanike kumuswaangano wacooko? Ikuti mwabagwasya bamwi munzila eeyi nkokuti ‘tamuyeeyi kuligwasya nubeni luzutu, pe, pele mulayanda kugwasya beenzinyoko.’—Flp. 2:4.
4. Ino mbuti bamwi mbobakalyaaba kutegwa bakajanike kumiswaangano yacooko?
4 Babelesi ba Jehova kunyina nobeezyanisya imali kuzilongezyo ziboola akaambo kakujanika kumuswaangano. Amubone zikozyanyo zimwi zyabaabo bakajanika Kumuswaangano Wamasi wa Bakamboni ba Jehova iwakajisi mutwe wakuti Divine Will, mu 1958. Umwi mukwesu wakajala mulimo wakwe wakuyaka kwansondo zyobile kutegwa abeleke mulimo wakulisungula akujanika kumuswaangano. Imukwesu umwi ku Virgin Islands wakauzya busena bukkwana mazyekele aali osanwe (5 acres) ikutegwa mukwasyi wakwe woonse wabantu bali cisambomwe ukajanike kumuswaangano. Banabukwetene bamwi bakauzya bwato bwanjini naa kaloonji ikutegwa batolelezye abana babo boonse botatwe kumuswaangano ibakali akati kamyeezi yobile kusikila kumyaka iili ciloba. Ibakwesu botatwe banabunyina bazwa ku California bakaambilwa kuti, ikuti batakajaniki kumilimo yabo, baakuboola milimo yabo tabakooyoijana pe. Nokuba boobo, eci tiicakabalesya kujanika kumuswaangano ooyu uutalubiki.
5. Ino ncinzi ncotweelede kucita ikuti kwayandika kuti tukajanike kumuswaangano umbi kunze lyayooyo imbungano yesu nkwiiya kuswaanganina?
5 Lugwasyo Lwaalubazu: Ikuti sikumwaya walomba kuti agwasyigwe kujana busena bwakusikila, ibamu Kkomiti Yamulimo Yambungano beelede kubona naa uleelela kulemba foomu Yakulomba Kwakoona. Beelede kwaalanga-langa alimwi malailile aali afoomu imulembi katana kwiitumina ku Cibeela Cilanga Kwakoona.
6. Ino nkaambo nzi bubambe bwakusandulula mumwaambo wakutambaika ncobuyoocitilwa kumiswaangano yobile buyo?
6 Mwaambo Wakutambaika: Kweelana ambomwabona mukabbokesi kajisi mazuba amasena aamiswaangano iiyakucitwa mu Zambia, imwaambo wakutambaika uyakucitwa buyo MUMASENA OBILE, kumuswaangano wa Cingisi ku Lusaka aku Ndola. KUNYINA bubambe bumbi buya kuba kumiswaangano imwi. Bubambe oobu bupa kuti kukabe busanduluzi bubotu alimwi kutegwa basicuulutwi banji bakakkomane akuyumizyigwa kwabunyina. Ibaalu alimwi abasikusandulula mwaambo wakutambaika beelede kubazyibya basicuulutwi bali mumbungano yabo kujatikizya bubambe oobu alimwi akubagwasya kulibambila kutegwa bakajanike kumuswaangano wacooko nkwaayoosandululwa mapulogilamu mumwaambo wakutambaika. Alimwi baalu beelede kubonana asicuulutwi aumwi uuli mumbungano yabo kutegwa bazyibe naa uyandika lugwasyo.
7. Ino malailile aali ngotuyandika kutobela notulibambila zyakweendela?
7 Kulibambila Zyakweendela: Mbungano zimwi zibbadela basimyootokala kutegwa babatole kumiswaangano. Kufwumbwa mootokala uubelesyegwa kubweza basimuswaangano, weelede kuti kauzumizyidwe amulawo kweenda mumigwagwa alimwi kuuli kabotu. Mweelwe wabantu ampasya tazyeelede kwiindilila amweelwe mootokala nguuzumizyidwe kubweza. Cilayandika kapati kusala mukwesu uusimide kuti alanganye bubambe oobu. Uya kwiizyibya nkamu kujatikizya bubambe oobu, iciindi cakunyamuka alimwi abusena bwakutantila. Kufwumbwa buyumu-yumu bukonzya kuba kunkamu, imukwesu ooyu weelede kwaambilwa kutegwa ape malailile. Iciindi nokuyandika lugwasyo, kupa lulayo naa kulanganya penzi limwi, ibakwesu bapakamene alimwi bapampu baya kucita oobo.
8. Ino ncinzi ncotweelede kubikkila maano kapati notulibambila anotuya kuba kumuswaangano wacooko wamu 2009?
8 Milimo Iipa Bulemu Kuli Leza: Notutondezya micelo yamuuya muzyintu zyoonse, mbotwaambaula ambotulilemeka, tupa kuti bantu ba Jehova batasampaulwi alimwi cipa kuti tutalebyi bamwi. (1 Kor. 10:31; 2 Kor. 6:3, 4) Aboobo amukape bulemu kuli Leza kwiinda mukujanika akulilemeka kabotu mumbazu zyoonse kumuswaangano wacooko wamu 2009.—1 Pet. 2:12.
[Kabbokesi kali apeeji 5]
Ciindi Camapulogilamu:
Buzuba Bwakusaanguna a Bwabili
8:20 hrs. - 15:55 hrs.
Buzuba Bwatatu
8:20 hrs. - 15:30 hrs.