Kuyumizyanya Mulusyomo Munzila Iilibedelede
1 Buzuba abuzuba lusyomo lwabantu ba Jehova lulasunkwa. Mbwaanga ulizi kuti ujisi buyo kaindi kaniini, Diabolosi uli mukutulwana kapati kutegwa alunyonyoone lusyomo lwesu kuli Jehova. (Ciy. 12:12) Aboobo iciyandika kapati ‘nkuyuma mu Mwami amunguzu zyakwe zipati’ kutegwa ‘tukakonzye kuzuunyana mubuzuba bubyaabi, eelyo yakumana buyo inkondo yoonse, tukaime nji.’—Ef. 6:10, 13.
2 Ikuswaangana abakombima, mbubambe bubikkidwe a Jehova ikutegwa tujane nguzu. Imwaapostolo Paulo wakamvwisya kapati ibubambe oobu ncobwakali kuyandika. Wakalombozya kuba akati kabanyina Banakristo kutegwa kube ‘kukulwaizyanya’ alimwi akuti ‘bayume.’ (Balo. 1:11, 12, Ci) Ikutegwa tuyumizyigwe kucita luyando lwa Leza, Kabunga Keendelezya kacita bubambe bwakuyootupa coolwe cakugwasyigwa kwiinda mukuyumizyanya lya Muswaangano Wacooko uuboola wa “Basikwaambilizya Bwami Ibasungu.”
3 Amukajanike Kutegwa Mukagwasyigwe: Aibe mbaakani yanu yakuyoojanika mazuba oonse otatwe. ‘Tulagwasyigwa’ kwiinda mukusika kalutanatalika lwiimbo lwakusaanguna alimwi akuzumanana kuba nkuko kusikila limwi tukaambe camoyo woonse kuti “Ameni” kumupailo wakujala. (Is. 48:17, 18) Ibanji bayooyandika kucita bubambe kumulimo wabo kakucili ciindi kutegwa bakabe aciindi cakuyoojanika kwamazuba oonse otatwe. Masimpe, tacili cuuba-uba pe kuli basikumulemba mulimo kuti bamupe ciindi, pele tulijisi lusyomo kuti Jehova uyootugwasya kucita luyando lwakwe. (1 Joh. 5:14, 15) Ikuti katutanacita oobo, ecino nceciindi cakucita bubambe bweelede kujatikizya mbotuya kweenda kuya kumuswaangano alimwi akujanina limwi nkotuya koona, ikutali kwiile kulindila buyo kuti zintu ziya kulibamba zyalikke. Tulijisi lusyomo kuti Jehova uyookulongezya kusoleka kwesu nkotuli mukucita kutegwa tukajanike mazuba oonse otatwe.–Tus. 10:22.
4 Amulangile Kuyooyumizyigwa: Sena kuli ciindi nomwakazwa kumuswaangano wacooko akwaamba kuti: “Takunabede muswaangano mubotu kwiinda yooyu!” Ino nkaambo nzi kakapa kuti mukonzye kulimvwa boobu? Nkaambo kakuti mbotuli bantu batalondokede, mukuya kwaciindi tulakonzya kutalika kukatala eelyo akuyanda kuyumizyigwa munzila yakumuuya. (Is. 40:30) Mucizi umwi wakapandulula kuti: “Bweende bwazintu oobu bulandiminya, aboobo miswaangano ilandibukulusya kujatikizya mbondizilanga zintu zyakumuuya akundipa nguzu zyakumuuya nzyondiyandika. Kulibonya mbuli kuti kukulwaizyigwa kulaboola aciindi nondikuyanda kapati.” Ambweni andinywe kuli nomwakalimvwide boobu.
5 Tulakulwaizyigwa ikutali buyo kwiinda mumakani aakananwa alimwi azyakubuzya-buzya, pele alimwi akuzibeela zimwi zyamuswaangano wesu izigwasya munzila yakumuuya. Imukwesu umwi wakaamba kuti: “Icintu cindikkomanisya kapati ninzila iilimvwisya kabotu mbolipandululwa Bbaibbele alimwi ambozikonzya kubelesyegwa njiisyo zigwasya izijanika mulindilyo. Masimpe, zisobano zilagwasya kapati mukutondezya mbotunga twagwasyigwa kuzitondezyo zyakaindi, zibotu alimwi azibi. Lyoonse ndilombozya kutambula mabbuku mapya alimwi ndilabotelwa kwaabala kwaciindi cilamfwu eelyo nondapiluka kuŋanda.”
6 Miswaangano yacooko mbubambe buyandika kapati kuzwa kuli Jehova “[mu]ziindi zikataazya” eezi. (2 Tim. 3:1) Ilatugwasya kutobela lulayo luzwa kuli Leza lwakuti: “Amulangile, mukakatile mulusyomo. Amube baalumi benibeni, muyume.” (1 Kor. 16:13) Aboobo, atukanze kuyoojanika muzibeela zyoonse akuyookulwaizyanya kapati lya Muswaangano Wacooko wa “Basikwaambilizya Bwami Ibasungu”!
Kabbokesi kali apeeji 3]
Amukanze Kuyoojanika Mazuba Oonse Otatwe
■ Amulombe ciindi kuli bakamulemba milimo.
■ Amucite bubambe bweelede kujatikizya nkomuya koona.
■ Amulibambile mbomuya kweenda kuya kumuswaangano.