“Lyoonse Kamuya Buyandaula Kucita Kabotu”
1 Ibukkale bwa Bunakristo bujatikizya ‘kuyandaula kucita zintu zili kabotu lyoonse kubantu boonse.’ (1 Tes. 5:15) Iciindi notujanika kumuswaangano wacooko, kuli nzila zinji motukonzya kucitila bamwi zintu zibotu. Muziindi zili boobu, bantu batulangilila alimwi abaabo mbotuswaanganya batulanga munzila yeelene buyo ambotubeendelezya. Ikutegwa tuzumanane katujisi mpuwo mbotu mbotuli Bakamboni ba Jehova, tweelede kutondezya kwiinda mumilimo yesu kuti ‘tulabalemeka bantu boonse.’ (1 Pet. 2:17) Kucita boobu kubikkilizya ‘kutayeeya kuligwasya tobeni luzutu pe, pele umwi aumwi uleelede kwiingasila kugwasya mweenzinyina.’—Flp. 2:4.
2 Kuyiisya Bana Mbobakonzya Kucita Kabotu: Muziindi zili boobu, ibana aabo basiigwa kakunyina muntu mupati uubalanga balaleta mapenzi. (Tus. 29:15) Muziindi zimwi, bazyali inga bajata bubi ikucita zimwi zintu, aboobo balaleka kulanga nzyobacita bana babo. Bamwi bana balatalika kuputa kapati. Eeci cipa kuti banyonganizyigwe Bakamboni bamwi alimwi abaabo batali Bakamboni.
3 Nobazyali, mazuba aamuswaangano kaatanasika, ciyoogwasya kapati ikuti mwajana ciindi cakwiinduluka abana banu makani aakulilemeka munzila ya Bunakristo kuyandika kulimbabo ciindi coonse alimwi amumasena oonse mobakonzya kuba. (Ef. 6:4) Mucikozyanyo, amubatondezye kuti iluyando lwini-lwini lwa Bunakristo “talukwe cisapi, talulilangilili cintu, talufwambi kujata bukali.” (1 Kor. 13:5) Bapati balakonzya kukankaizya mbwaayandika kapati makani aaya kwiinda mukupa citondezyo ceelede kutegwa boonse babone. Nobana, mulakonzya kuyandaula kucita zintu zili kabotu kwiinda mukubalemeka bazyali banu, kutajata-jata zintu zyabantu alimwi akutabanyonganya aabo bali afwaafwi ampomubede. (Kol. 3:20) Mbotuya buzumanana kubelekela antoomwe mukucita kabotu kubantu boonse, ‘tulalemekana muziyanza zyoonse lwiisyo lwa Leza Mufwutuli wesu.’—Tit. 2:10.
4 Ikucita Makwebo: Mbwaanga bamwi bantu balizi kuti basimuswaangano banji tabajisi zifwotozyo naa makkamela, batalika kucita makwebo kwiinda mukufwotola lyamiswaangano yacooko alimwi aimbi buyo miswaangano yabantu ba Jehova. Kunyina cilubide pe ikuyanda kubaa cifwoto lyamiswaangano eeyi iilibedelede. Nokuba boobo, ibunji bwabaabo bafwotola balajana mpindu, aboobo bacita makwebo. Ikutegwa eeci citanyonganyi bubotu bwakuyanzana kwa Bunakristo, tutabazumizyi pe kuti bacite milimo yabo. Alimwi eeci nceceelede kucitwa akumakwebo aambi buyo. Ikaambo kapati ncotuswaanganina antoomwe nkukomba Jehova, ikulya atafwule lyakwe lyakumuuya alimwi akukulwaizyanya.—Rom. 1:11, 12.
5 Ikulilemeka kabotu kwesu kulababotela aabo batulangilila alimwi abaabo bakali kutukazya akaambo katwaambo tumwi. Kufwumbwa zintu nzyotuli mukucita, kwaambaula kwesu alimwi amilimo yesu mbotuli Banakristo, yeelede kusinizya kuti tuyanda kucita zintu zili kabotu.
Kabbokesi kali apeeji 4]
Mwalombwa Mutuyeeye Twaambo Ootu:
■ Kulanga zintu bana banu nzyobali mukucita.
■ Busena bwamuswaangano tabweelede kubelesyegwa kuba “busena” bwakwaambilizya “makwebo” aali woonse.
■ Amubelesye busena bwamuswaangano kuzuzikizya mulimo ngobubambilidwe wakukomba Jehova.