Amukamantane
1 Ino nzyiindi zinji buti nzyomulaakugambwa kujatikizya mboulengedwe mubili wamuntu? (Int. 139:14) Cizo camubili cimwi acimwi cilabeleka calukamantano azizo zimwi. Ijwi lya Leza likozyanisya mbungano ya Bunakristo kuzizo zyamubili zikamantene. Kwiinda mubusolozi bwa Silutwe Kristo, bantu boonse bamumbungano ‘baliswaanganizyidwe antoomwe muzizo zyoonse. Alimwi cizo cili coonse cilabeleka mulimo wancico.’ (Baefe. 4:16a, Ci) Aboobo Jehova ulababelesya bantu bakwe bakamantene kuzuzikizya zintu zitaliboteli.
2 Basimbungano yamumwaanda wamyaka wakusaanguna bakacita zintu “amoyo omwe” nobakali kulanganya umwi aumwi nzyaakabulide munzila yakumuuya alimwi akumubili. (Inc. 2:44-47) Kwiinda mukugwasyigwa a Jehova, bakakamantana nobakali kukazyigwa alimwi eeci cakabapa kuti bazunde. (Inc. 4:24-31) Bakakambauka mulumbe wa Bwami kufwumbwa nkobakali kuunka, akuzuzya makani mabotu kumasena oonse kwakali bantu anyika kuciindi eeco. (Kol. 1:23) Mazubaano, imbungano ya Bunakristo calukamantano yacita milimo iikozyenye munzila iinda kukomena. Ino ntwaambo nzi tupa kuti kube lukamantano oolu?
3 Ikukamantanizyigwa Akuyiisya kwa Leza: Munyika yoonse, twakamantanizyigwa abukombi bwesu. Ino eeci cikonzyeka buti? Tuliizi nzila iiboneka Jehova njali mukubelesya kwaabila ‘cakulya cakumuuya muciindi ceelede.’ (Mt. 24:45) Alimwi tulabikkila maano kapati ‘kuzipego kubantu’ mbaakapa kuti babe bamayi mumbungano. Mbotuya buzumanana kutobela bubambe Jehova mbwabikkide kutegwa atusanine munzila yakumuuya, ikulimvwisya Jwi lya Leza kuyooyungizyigwa alimwi tuyookulwaizyigwa kuyandisisya kumwiiya Jesu mbotuli basikwiiya bakwe. Tweelede kuzumanana kwiiya Jwi lya Leza akusolekesya kapati kuba “aalukamantano lomwe mukusyoma.” (Baefe. 4:8, 11-13, Ci) Sena muli mukusumpula lukamantano lwesu lwakumuuya kwiinda mukubala Bbaibbele lyoonse?
4 Kukamantana Kwiinda Mukuyanzana kwa Bunakristo: Luyando lulatukamantanya antoomwe notuyanzana ciindi camiswaangano ya Bunakristo. Kumiswaangano eeyi, ‘tulayeeyana umwi amweenzinyina.’ (Heb. 10:24, 25) Eeci cibikkilizya kutalanga buyo kubusyu, pele kubazyiba kabotu bakwesu alimwi akubabona mbubonya mbuli Jehova mbwababona kuti balayandika. (Hag. 2:7) Mbotuya buzumanana kuswiilila kumibandi yabo yalusyomo, iluyando ndotujisi kulimbabo lulayaambele alimwi lukamantano lwesu lulayumizyigwa. Sena bamwi balimuzyi kuti muli umwi wabaabo bajanika lyoonse kumiswaangano yambungano?
5 Babelesima Mumuunda: Kukambauka makani mabotu antoomwe abasyomima kulatukamantanya kucita luyando lwa Leza. Imwaapostolo Paulo wakabalumbaizya kapati ‘babelesinyina mumilimo ya Bwami bwa Leza.’ (Kol. 4:11) Ikulwiidana zitucitikila alimwi akugwasyanya notuli mumulimo wamumuunda kulatugwasya kuzuzikizya mulimo wa Bunakristo ngotupedwe alimwi akutukamantanya.—Kol. 3:14.
6 Muuya Uusalala Mbuukamantanya: Mbotuya buzumanana kusungwaala kucita luyando lwakwe, Jehova ulatulongezya amuuya wakwe. Eeci cilatugwasya kucesya kuteendelana alimwi akukkala antoomwe muluumuno. (Int. 133:1) Cilatukulwaizya “kulondola lujatano luzwa ku-Muuya kucaanzyo caluumuno.” (Ef. 4:3) Umwi aumwi wesu ulakonzya kusumpula luumuno luliko akati kabantu ba Leza kwiinda mukutondezya micelo yamuuya munzila njotweendelezya bamwi.—Gal. 5:22, 23.
7 Ikubelekela antoomwe calukamantano mubusolozi bwasilutwe bwa Kristo “kulagwasya mubili kuti ukule akuliyaka muluyando.” (Ef. 4:16b) Kuyungizya waawo, kulamulemeka Jehova, “Leza siluumuno.”—Rom. 16:20.