Amutondezye Kulumba Kuzintu Zibelesyegwa mu Mbunga Yeendelezyegwa a Leza
1 Naakali kucita bubambe bwakubambulula tempele, Mwami Josiya wakabalumbaizya aabo bakapedwe mulimo wakucita boobu kaamba kuti: “Mali aanjila mumaanza aabo taelede kubalilizigwa pe, nkaambo balacita cabusyomesi.” (2 Bam. 22:3-7) Ikubikkila maano kubaalumi aaba nkobakajisi kuzintu zisetekene kwakalibonya munzila njobakali kweendelezya zintu nzyobakapedwe. Sunu mbotuyaabuzumanana kutola lubazu mumulimo uusetekene wamakani mabotu aa Leza, aswebo tweelede kusyomeka munzila njotweendelezya zintu nzyotupedwe.
2 Mumulimo Wamumuunda: Ikulumba nkotujisi akaambo kamulumbe uuyandika kapati uuli mumabbuku eesu alimwi akuzyiba mali aabelesyegwa kusimba mabbuku, kupa kuti kaayandika kapati kulindiswe. Tweelede kucenjela kutegwa tutapi mabbuku eesu kubantu bataubikkili maano mulumbe wamu Bbaibbele. Ikuti muntu katondezya kubula luyandisyo kumakani mabotu, tulakonzya kumupa buyo katulakiti muciindi cakumupa mabbuku aambi.
3 Mabbuku ayelede kupegwa munzila iitondezya kuti tulaayanda. Mutani kwaasiyi mumasena aabuleya oomo mwaakonzya kutataulwa abantu. Ikutegwa kutabi aanyonyooka, amwaabale mabbuku ngomucijisi muŋanda kamutanabweza aambi. Ikuti lyoonse kamuba amamagazini aayindilila, mulakonzya kucesya mweelwe waoda yanu.
4 Mabbuku Ngotubelesya Tobeni: Mabbuku ngotweelede kooda ngayaayo buyo ngotuyanda kubelesya. Tweelede kubikkila maano kumabbuku ngotulomba mbuli ma Bbaibbele aacivwumbyo citeteete, ma Reference Bibles alimwi amabbuku aambi mapati mbuli Concordance, Index, mavolyumu aa Insight alimwi abbuku lya Proclaimers, nkaambo mabbuku aaya woonse aladula.
5 Sena lyoonse mulalemba zina lyanu alimwi akkeyala mumabbuku aanu? Eeci cilagwasya kutabweza aambi mabbuku kunze lyayaayo ngotujisi kale, pele ngotutabwene nkwaabikkidwe. Ikuti naa mwasweekelwa bbuku lyanyimbo, Ibbaibbele naa bbuku ndemubelesya nomwiiya, ambweni mulakonzya kulijana kalibikkidwe azintu zimwi zisweeka ku Ŋanda ya Bwami naa kubusena bucitilwa miswaangano mipati.—Lk. 15:8, 9.
6 Atusoleke kwaabelesya kabotu mabbuku eesu. Eeyi njenzila njotunga twatondezya kusyomeka kwesu notubelesya zintu zya Bwami eezyo Jehova nzyatupede.—Lk. 16:10.