Ikucileka Mulimo Wakumubili—Sena Kusololela Kumulimo Uuyungizyidwe?
1 Ibantu banji bankutwe kumulimo balombozya ciindi baakucileka mulimo nobaya kwaangululwa kukubeleka canguzu abuyumu-yumu bujanika kumulimo wakumubili. Pele, kanjikanji ikucileka mulimo kuleta kutabikkila maano, butolo alimwi akufwambaana kucembaala. Ikuti muntu kataciti mulimo uugwasya, ulakonzya kutalika buyo kulibilika lwakwe mwini. Muteende waku Brazil wakaluula kuti, ibabelesi bakubuleya ibakacileka mulimo bajisi mapenzi ‘aakutakutila, kukalala, ikutaliiba, kubula mbaakani akaambo kakutyompokelwa alimwi akuyeeya kuti buumi bwabo bunyina mpindu.’
2 Mukwiindana, Banakristo banji bukkale oobu bupya mubuumi bwabo babubona kuba nzila iisololela kumulimo wakumuuya uuyungizyidwe. Mukwesu umwi wakatalika mulimo wabupainiya nokwakainda nsondo zyobile kuzwa ciindi naakakkwanisya myaka iili 65 wakaamba kuti: “Kunyina ciindi mubuumi bwangu nondakaba azilongezyo zitalivwulili mbuli zeezyo nzyondakajana mumyaka iili kkumi yainda yabupainiya.” Banabukwetene bamwi bakalemba kuti: “Myaka iikondelezya mubucembele bwesu yakatalika ciindi notwakatalika bupainiya.” Masimpe, kubantu banji, ikucileka mulimo kubapa coolwe cikondelezya cakuyungizya mulimo wabo alimwi akujana zilongezyo zitalivwulili kuli Jehova.
3 Amujate Bubi Alimwi Akuzyala Micelo: Ibunji bwabaabo bakacileka kale milimo bakakomena kakunyina zintu zidumide eezyo mazubaano zipa buumi kuuba-uba, aboobo bakaiya kubeleka canguzu kuzwa ciindi nobakali bana. Nokuba kuti balakonzya kabatacijisi nguzu mbuli zyamu bukubusi, bacili babelesi bazyala micelo. Mucilawo camutabi umwi, 22 pasenti yabapainiya, ibakwesu abacizi ibasika ku 20,000 bajisi myaka iili kuma 60. Ibacembeede aaba bajisi cibeela cipati kumulimo wabukambausi. Iluzibo lwabo ndobajana kwamyaka minji yakubeleka alimwi abube bwabuna Leza zigwasya mbungano mobabede.—Jak. 3:17, 18.
4 Ikujata bubi mumulimo wabukambausi kupa kutaciswa-ciswa akupona buumi bubotu. Mucizi umwi uucembeede uujisi myaka iili 84 iwakatalika bupainiya naakacileka mulimo wakaamba kuti: “Ikuba aziiyo zya Bbaibbele zinji abantu bajisi luyandisisyo kwandigwasya kuzumanana kupakamana. Tandijisi mootokala, aboobo ndileenda kapati. Eeco capa kuti kanditaciswi-ciswi.” Banabukwetene bacembeede ibapainiya bakaamba boobu: “Mulimo utupa kuzumanana katuli bayumu mumizeezo alimwi akumubili. Lyoonse buyo inga tuli antoomwe. Tulakkomana mubuumi bwesu.”
5 Ikubeleka Kubusena Kubulide: Banakristo bamwi ibakacileka mulimo ibajisi mali balongela kuyoobeleka kubusena buyandika bakambausi banji ba Bwami. Ibambi bayungizya mulimo wabo kwiinda mukuyoobelekela kucisi cimbi. Mbubwenya mbuli mwaapostolo Paulo, basikumwaya basungu aaba ‘zyoonse eezi balazicita nkaambo kamakani mabotu kuti abalo batambule ambabo zileleko.’—1 Bako. 9:23, Ci.
6 Banabukwetene bamwi bakatalika bupainiya nobakamana kukomezya bana babo basankwa bobile. Kwiinde myaka iikubwene yabupainiya, bakatalika kwiiya mwaambo wa Chiccainiizi. Lino kabajisi myaka iili kuma 70, ciindi cisyoonto cainda bakakondwa kubona kakamu ka Chiccainiizi nkobakali kubeleka aankako yaba mbungano. Elo kaka ncilongezyo citaliboteli ikuba abanabukwetene bali boobu!
7 Kunyina Kucileka Kubeleka Mumulimo: Nokuba kuti bantu banji kumamanino balacileka kubeleka mumulimo wabo wakumubili, ku Munakristo uuli woonse kunyina kucileka mumulimo wa Leza pe. Boonse beelede kuzumanana kusyomeka “kusikila kumamanino.” (Mt. 24:13, 14) Mubwini, akaambo kakukomena, bamwi tabakonzyi kucita mbuli mbobakali kucita kaindi mumulimo wa Jehova. Pele, elo kaka cilakulwaizya ikubabona kabali mukucita mbobakonzya camoyo woonse! Ijwi lya Leza lilabaumbulizya kuti Jehova takailubi milimo yabo alimwi aluyando ndobatondezya kuzina lyakwe.—Lk. 21:1-4; Heb. 6:10.
8 Ikuti naa myaka yanu yakucileka mulimo iyaabuswena, sena tamukonzyi kupaila akuzinzibala kuyeeya mbomukonzya kujana mpindu kapati mubukkale bwanu ibuya abucinca? Kwiinda mulugwasyo lwa Leza, mulakonzya kujana kuti ikucileka mulimo kumujaluda nzila yamulimo uuyungizyidwe uumuleta ntembauzyo Jehova alimwi azilongezyo zinji.—Int. 148:12, 13.