Ipulogilamu Mpya ya Muswaangano Waalubazu

Kuli makani manji mazubaano aamba mbotukonzya kubona kuti moyo wesu uli muciimo cibotu kutegwa tukkomane akoongola. Iciyandika kapati nciimo camoyo wesu wacikozyano. Aboobo ipulogilamu yamuswaangano waalubazu iiyootalika mu September 2003 ijisi mutwe weelela kapati wakuti: “Ikumanina Jehova Milimo Camoyo Woonse.” (1 Mak. 28:9) Ino inga twalangila kuya kwiiya nzi?

Mulangizi wabbazu uyakubandika makani aakuti, “Ikugwasya Bamwi Kumanina Jehova Milimo Cakukondwa.” Kubuzya-buzya kuya kutondezya lukkomano lujanwa mukubikkila maanu akweendelezya ziiyo zya Bbaibbele kubantu ibayanda kubelekela Jehova. Cakutadooneka, boonse baya kujanika kumuswaangano bayoowumbulizyigwa akukulwaizyigwa amakani aakusaanguna ngaya kukanana mwaambi mweenzu aakuti, “Ikukwabilila Myoyo Yesu Munyika Yamapenzi.” Cibeela camafwumofwumo ciya kumana amakani alubbapatizyo.

Kumazuba, imakani aakuti, “Ikugwasya Bamwi” ayakutondezya mbotukonzya kubagwasya bantu. Ncinzi ibazyali ncobakonzya kucita kutegwa bakwabilile myoyo yabana babo kuzintu zibyaabi akubagwasya kubaa cilongwe a Jehova? Makani aakuti, “Amubagwasye Bana Banu Ikumukkomanina Jehova,” ayakutupa nzila zibeleka akutondezya mbotukonzya kucita boobo.

Sena tulazibelesya zintu zyoonse nzyatupa Jehova izitugwasya kukwabilila moyo wesu wacikozyano kuti lyoonse kauli muzumi? Imakani aamwaambi mweenzu aamamanino aakuti, “Amuzumanane Kumanina Jehova Milimo Camoyo Woonse,” ayakubandika mbazu zyone ziyandika izituyumya kumuuya. Sena tulasola-sola kujana ciindi cikubwene cakupaila camoyo woonse, cakwiiya Jwi lya Leza, cakukambauka cabusungu alimwi acakuyanzana a Banakristoma? Sena inga twayaambele munzila zimwi akati kazyeezyi?

Jehova ulatutamba ategwa: “Bika moyo wako kululayo, akucenjeka kutwi kwako kumajwi aaluzibo.” (Tus. 23:12) Kamulibambila lino kuya kujanika mubuzuba oobu bwalwiiyo lwamu Magwalo lugwasya. Kucita boobo kuya kumuyumya-yumya kuzumanana kumanina Jehova milimo camoyo woonse acakukondwa.