Jehova Ulabagwasya Aabo Ibamusyoma
1 Bantu banji babona mali, nguzu alimwi akuba aluzibo muzintu zimwi kuba zintu ziyandika kapati kutegwa muntu azwidilile. (Int. 12:4; 33:16, 17; 49:6) Pele aabo ibamuyoowa Jehova akumusyoma, Ibbaibbele libasyomezya kuti “ngonguwe mugwasyi wabo antobo yabo.” (Int. 115:11) Atulange-lange mbazu zyobile motuyandika kutondezya lusyomo muli Jehova.
2 Mbotuli Babelesi Banakristo: Lyoonse notuyiisya mumbungano naa mumulimo wamumuunda, tweelede kusyoma Leza wesu. Amubone cikozyano ca Jesu. Nokuba kuti wakali Mwana a Leza, tanaakasyoma busongo bwakwe naa nguzu pele wakasyoma cakumaninina muli Wisi wakujulu. (Joh. 12:49; 14:10) Aswebo mbotweelede kucita oobo. (Tus. 3:5-7) Nkwiinda mukulongezyegwa buyo a Jehova kusolekesya kwesu nokunga kwamuletela bulemu alimwi akuti bantu bagwasyigwe.—Int. 127:1, 2.
3 Tulatondezya lusyomo lwesu muli Jehova kwiinda mukupailila busolozi bwakwe alimwi alugwasyo lwa muuya wakwe uusalala. (Int. 105:4; Lk. 11:13) Kuyungizya waawo, tulatondezya lusyomo lwesu muli Leza kwiinda mukubona kuti kuyiisya kwesu kuyeeme aa Jwi lyakwe, Ibbaibbele. Mulumbe walyo ulaanguzu ukonzya kuyasa moyo akucinca buumi bwabantu. (Heb. 4:12) Ciindi ‘notubeleka milimo kunguzu nzyatupa Leza,’ Jehova ulalemekwa.—1 Pet. 4:11.
4 Mukumana Mapenzi: Alimwi tweelede kulomba lugwasyo kuli Jehova notuli mubukkale bukatazya alimwi amumapenzi. (Int. 46:1) Mucikozyanyo, basikutulemba mulimo balakonzya kuwayawaya kutupa ciindi kuti tujanike kumuswaangano mupati, antela tulakonzya kulijana mubukkale bukatazya mumukwasyi wesu. Tulatondezya kuti tulamusyoma Jehova kwiinda mukupaila cakusinizya alimwi akutobela busolozi mbwapa mu Jwi lyakwe alimwi ambunga. (Int. 62:8; 119:143, 173) Kwiinda mukucita boobo, babelesi ba Jehova balalibonena lugwasyo lwakwe mubuumi bwabo.—Int. 37:5; 118:13, 16.
5 Jehova mwini utusyomezya kuti: “Uli acoolwe muntu uusyoma Jehova, uujisi Jehova mbuli mutabilizi wakwe.” (Jer. 17:7) Atutondezye lusyomo lwesu mulinguwe muzintu nzyotucita.—Int. 146:5.