Atulumbe Jehova Nkaambo Kaluzyalo Lwakwe
Lufwu lwa Kristo Luyooyibalukwa mu March 24
1. Mbuti Jehova mbwaatutondezya luzyalo?
1 Sitembauzyo wakakankamuka ategwa: “[Bantu] balumbe Jehova nkaambo kaluzyalo lwakwe, amilimo yakwe iigambya njacitila bana ba-Adamu!” (Int. 107:8) Luzyalo lwa Leza talugoleli alweetelelo ndwajisi kubantu. Eeci cilisalazyidwe mumajwi aakutembaula aakasololelwa aakuti: “Buuya bwako bwakanditabilila, O Jehova.” (Int. 94:18) Elo kaka taluliboteli luzyalo ndwaakatondezya Jehova mukutupa mwanaakwe simuzyalwa alikke!—1 Joh. 4:9, 10.
2. Ino mbuti mbotukonzya kutondezya kulumba kuli Jehova?
2 Mbociyaabuswena Ciibalusyo ca lufwu lwa Kristo, mbuti mbotukonzya kulumba ‘Leza uutufwida luzyalo’? (Int. 59:17) Umwi aumwi wesu uyooyanda kulibikkila ciindi cakuzinzibala kuyeeya mazuba aakumamanino aa Jesu anyika. (Int. 143:5) Alimwi inga cagwasya kutobela mulongo waalubazu wakubala Bbaibbele uubambilidwe Ciibalusyo, mbuli mbokutondezyedwe mukabbuku ka Kulingaula Magwalo Abuzuba—2005 alimwi ikuti kacikonzyeka amubale akuvwuntauzya muzibalo 112-16 zyamu bbuku lya Muntu Mupati antoomwe amabbuku aambi aapandulula Bbaibbele. Amuzinzibale kuyeeya zibalo nzyomubala, akulitakata kuli nzizyo. (1 Tim. 4:15) Ikupaila notwiiya Jwi lya Leza takutuyumyi buyo, pele alimwi kutugwasya kutondezya luyando lwesu kuli Jehova.—Mt. 22:37.
3, 4. (a) Mbuti mbotukonzya kwiiya cikonzyanyo cabakwesu baku Liberia? (b) Mbaani mbomukanzide kutamba ku Ciibalusyo?
3 Amukulwaizye Bamwi Kulumba Leza: Mwaka wainda, bantu bali 16,760,607 bakajanika ku Ciibalusyo nyika yoonse mboizulwa. Mumunzi umwi ku Liberia, bakwesu bakalembela lugwalo ku mupati wadolopo, ikumuzyibya makanze aabo aakucita Mulalilo wa Mwami mudolopo lyakwe. Ooyu mupati wadolopo wakabazumizya kuti babelesye bbuwa lyakuumina bbola yakumaulu ikucita cilengwa eeci alimwi wakacaambilizya mucilawo cakwe coonse, ikutamba bantu kuti bakajanike. Nokuba kuti kwakali buyo basikumwaya bosanwe mumunzi ooyo, bantu bakajanika ku Ciibalusyo bakali 636!
4 Mbubwenya buyo, ikuti kacikonzyeka tuyanda kugwasya bantu banji kutusangana ikucita Ciibalusyo. Ino mbuti kuti mwalemba mulongo wamazina aabantu mbomukanzide kutamba? Zitondezyo zili kunze aacivwumbyo ca Ngazi Yamulindizi ya April 1 zilijisi kutamba kwakuyoojanika ku Ciibalusyo. Ikutamba ku Ciibalusyo ikusimbidwe akwalo kulakonzya kubelesyegwa. Amubelesye ntaipi naa kulemba kabotu-kabotu akapepa ikabelesyegwa ikutamba bantu, ciindi abusena nkociyoocitilwa Ciibalusyo, mwamana mukape umwi aumwi ngomuyootamba. Mbobuyaabuswena buzuba bwa March 24, amukabaswaye alimwi boonse akubaambilida limwi bubambe boonse.
5. Mbuti mbotukonzya kukulwaizya basikwiiya Bbaibbele kujanika ku Ciibalusyo?
5 Mbuti mbotukonzya kugwasya basikwiiya Bbaibbele ibatanatalika kujanika kumiswaangano kutegwa bagwasyigwe kapati acilengwa eeci? Amutole maminiti ali mbwaabede aciiyo cimwi acimwi ikubagwasya kumvwisya mbociyandika cilengwa eeci. Mulakonzya kujana twaambo tugwasya kapati mubbuku lya Kukambitsirana, amapeeji 70-4.
6. Nkaambo nzi ncociyandika ikusamausya beenzu lya Ciibalusyo?
6 Amusamausye Beenzu: Lya Ciibalusyo, amubaambauzye beenzu alimwi akubasamausya. (Rom. 12:13) Amulibambile kukkala abaabo mbomuyootamba, alimwi akubona kuti balijisi Bbaibbele abbuku lyanyimbo. Ikapati tuyooyandisya kubatambula camaanza obile bakwesu abacizyi ibatajaniki-janiki balo bayoojanika. Ikubikkila maano kwesu inga kwaakubagwasya kutalika alimwi kuyanzana lyoonse ambungano. (Lk. 15:3-7) Kuciindi eeci cilibedelede kapati, atukasolekesye kugwasya bamwi kutusangana ikulumba Jehova akaambo ‘kakutufwida luzyalo cakugambya.’—Int. 31:21.