“Amuyandisye Jehova Nyoonse Nobasalali Bakwe!”
Lufwu lwa Jesu Iluyooyibalukwa mu April 4
1 Imyaka yainda eelyo Ukraine noyakacili mubweendelezi bwacipani comwe, ibeendelezi bakali kubalangisisya ibakwesu—ikapati ibuzuba bwa Mulalilo wa Mwami nobwaswena—akaambo kakuti bakali kuyandisisya kuzyiba busena mbobaswaanganina. Eeli lyakali penzi lyoonse akaambo kakuti beendelezi bakalicizyi ciindi cilangilwa kucitwa ciibalusyo. Ino ncinzi ncobakali kunga bacita bakwesu? Iŋanda yamujulu yamucizyi umwi yakalobedwe maanzi munsi. Mbwaanga beendelezi tiibakali kulangila kuti inga kwaswaangana bantu mubusena buli boobo, ibakwesu bakayaka cibuye camapulanga atala lyamaanzi aakali kwiinda-inda mumazwi. Nokuba kuti bakali kulipeta buya kukkala akaambo kacibuye caŋanda cakali atala lyabo, kunyina muntu wakabanyonganya eelyo mbungano calukkomano noyakali kucita Mulalilo.
2 Imakanze aabakwesu baku Ukraine aakutobela mulawo wakwiibaluka lufwu lwa Jesu cakali citondezyo cibotu caluyando ndobajisi kuli Leza. (Lk. 22:19; 1 Joh. 5:3) Lyoonse notujisi zitunyonganya mubuumi, atuyumizyigwe azikozyanyo zili boobo akukanza kuyoojanika lya Mulalilo wa Mwami mu April 4. Kwiinda mukucita boobo, tutondezya kuti aswebo tulimvwa mbuli sintembauzyo iwakaimba kuti: “Amuyandisye Jehova nyoonse nobasalali bakwe!”—Int. 31:23.
3 Amugwasye Abamwi Kuyaambele Mukuyanda Leza: Ikuyanda Leza alimwi kutukulwaizya kutamba bambi kuyooyibaluka lufwu lwa Jesu andiswe. Mupepa lyamukati lya Mulimo Wesu Wabwami wamu February twakakulwazyigwa kulemba mulongo wamazina aabaabo mbotukanza kuyootamba ku Ciibalusyo. Sena muli mukubona kuti muntu woonse uuli amulongo wanu watambwa? Amubapandulwide mbociyandika ikujanika. Ikubaibalusya buzuba aciindi liyoocitwa Ciibalusyo ciindi aciindi naa kakuyandika akubalomba kuti muyoobacinga kulakonzya kubakulwaizya kujanika.
4 Kubusena buswaanganinwa, amukasolekesye kubaanzya boonse ibayoosika mbotwakatamba alimwi amukabasamausye. Ino mbuti mbomunga mwabagwasya kuyaambele mukuyanda Jehova? Amukalibambile cakulisungula kwiingula mibuzyo njobanoojisi. Kamunoolibambilide kwaamba bubambe bwaciiyo ca Bbaibbele ikuti zintu kazili kabotu. Amukabatambe kunoojanika kumiswaangano yesu yambungano iicitwa ansondo. Ibaalu bayooyandika kubabikkila maanu kapati Banakristo bakacilekela limwi kutola lubazu mumilimo yesu ibanooliko. Balakonzya kucita bubambe bwakubaswaya bali boobo akubakulwaizya kubukulusya milimo yabo, ambweni kwiinda mukupandulula twaambo tumwi twakaambwa mumakani aa Ciibalusyo.—Rom. 5:6-8.
5 Ikuyumya Luyando Ndotujisi Kuli Jehova: Ikuyeeyesya cipego cacinunuzyo kulakonzya kuyumya luyando ndotujisi kuli Jehova a Mwanaakwe. (2 Kor. 5:14, 15) Umwi wali kujanika lyoonse ku Ciibalusyo kwamyaka minji wakati: “Tulacilangila Ciibalusyo. Ciba caalubazu amwaka kulindiswe. Ndilayeeya imyaka iili 20 yainda kandiimvwi muŋanda musanzyilwa mitumba, kandilangilila mutumba wabataata mbendakali kuyanda kapati akucilumba camoyo woonse cinunuzyo kwiinda musyule. Kabatana kufwa bataata ndakalujisi buyo luzibo lwacinunuzyo. Ee, ndakalaazyi magwalo oonse aamba zyacinunuzyo alimwi ndakali kukonzya kwaapandulula! Pele lilikke lufwu nolwakandicisa imoyo wangu nowakanjilwa cancobeni kujatikizya ncotuyoocitilwa kwiinda mucinunuzyo eeco citaliboteli.”—Joh. 5:28, 29.
6 Ibuzuba bwa Ciibalusyo camwaka uuno mbobuyaabuswena, amujane ciindi cakupangika myoyo kujatikizya ncico. (2 Mak. 19:3) Amuzinzibale kuyeeya makani aali mukubala kwa Bbaibbele kwa Ciibalusyo ikwaalubazu ikubikkidwe mukabbuku ka Kulingaula Magwalo Buzubaa Buzuba—2004 alimwi amu Kkalenda ya 2004. Ibamwi balacikkomanina kwiinduluka zyaandaano 112-16 mubbuku lya Muntu Mupati lyaciiyo cabo camukwasyi. Ibamwi balavwuntauzya kwiinda mukubelesya mabbuku aakwiiya aambi aapegwa kwiinda muciinga camuzike musyomesi uucenjede. (Mt. 24:45-47) Toonse tulakonzya kunooamba cipego cacinunuzyo lyoonse mumipailo yesu. (Int. 50:14, 23) Mmasimpe, iciindi ca Ciibalusyo ecino, atuzumanane kuyeeya luyando ndwajisi Jehova kulindiswe alimwi akujana nzila zyakutondezya luyando ndotujisi kulinguwe.—Mk. 12:30; 1 Joh. 4:10.