Amuyungizye Luyandisyo Kwiinda Mukubatolela Mamagazini Lyoonse
1. Mbuti mbotukonzya kuyungizya luyandisyo lwa bantu mbotutolela mamagazini lyoonse?
1 Bunji bwa bantu mbotuyaanya mumulimo balatutambula kabotu notubaswaya alimwi balatambula mabbuku eesu pele balawaya-waya kuti babe aciiyo ca Bbaibbele ca lyoonse. Nzila imwi motunga twayungizya luyandisyo lwa bantu bali boobu nkwiinda mukubatolela mamagazini lyoonse. Nomwaabila mamagazini, amulembe zina lya muntu ooyo alimwi ankwakkala, buzuba nomwakamuswaya, mamagazini ngaakatambula alimwi alugwalo ndomwakabandika kubikkilizya ancomwakabona kujatikizya luyandisyo lwa muntu ooyo. Nomutambula mamagazini mapya, amulange-lange twaambo tukonzya kubakkomanisya aabo mbomutolela mamagazini lyoonse eelyo amubatondezye twaambo ooto nomubaswaya. (1 Kor. 9:19-23) Mukuya kwaciindi, zintu zimwi nzyobabala mumagazini eesu inga zyabapa kuba aluyandisyo alimwi akupa kuti bayande kwiiya zinji.
2. Nkaambo nzi ncociyandika kapati kuti bantu bayandaule Jehova lino alimwi ncinzi cimwi ncotukonzya kucita kutegwa tubagwasye?
2 Pele tulizyi kuti bunji bwa bantu kunyina nobayooba babelesi ba Jehova kwiinda mukulibalila mamagazini. Mbwaanga cilayandika kapati kuti bantu bayandaule Jehova lino, ncinzi acimwi ncotukonzya kucita kutegwa tubagwasye? (Zef. 2:2, 3; Ciy. 14:6, 7) Tulakonzya kuyungizya luyandisyo lwabo kwiinda mukubabalila lugwalo lwalibambilwa kabotu ciindi cimwi acimwi notubatolela mamagazini.
3. (a) Mbuti mbotukonzya kulibambila kubelesya lugwalo lomwe mumibandi iili mbwiibede? (b) Ntwaambo nzi ntobabikkila maano kapati bantu mucilawo canu?
3 Kubelesya Lugwalo Lomwe Mumibandi: Amubayeeye aabo mbomutolela mamagazini lyoonse alimwi amulibambile kubelesya lugwalo lomwe mumibandi iili mbwiibede iigaminide nzyayandika umwi aumwi. (Flp. 2:4) Mucikozyanyo, ikuti umwi wasweekelwa muyandwa mulufwu caino-ino, inga mweenda nyendo zyakupilukila zili mbozibede kutegwa mukabandike ncolyaamba Bbaibbele kujatikizya bafwide alimwi abulangizi bwabubuke. Makani aali mubbuku lya Kukambitsirana aansi amitwe mipati-pati yakuti “Imfa” alimwi a “Chiukiriro” alakonzya kubelesyegwe nomulibambila kubelesya lugwalo lomwe mumibandi eeyi. Inga mwazumanana kubandika mibandi aimwi ijatikizya makani aali mbuli bwayaaya aamba mbuli kuciswa, kucembala alimwi alufwu mboluyoogwisyigwa. Iciyandika nkujana kaambo kakonzya kukkomanisya muntu ngomutolela mamagazini lyoonse alimwi akuyaambele kumutondezya ncolyaamba Bbaibbele kukaambo aako.
4. Nkaambo nzi ncociyandika kugwasya bamwi kumvwisya Magwalo ngotubelesya alimwi mbuti mbotukonzya kucita oobo?
4 Amubagwasye Ikumvwisya: Nokuba kuti bunji bwaziindi ncibotu kuti mibandi iili boobu kiitakatazyi kutobela alimwi kiili mifwaafwi, nzinji ziyandika kunze lya kubala buyo lugwalo lwalibambilwa. Saatani woofwaazya mizeezo ya bantu kumakani mabotu. (2 Kor. 4:3, 4) Nobaba baabo balibala Bbaibbele bayandika lugwasyo kutegwa balimvwisye. (Inc. 8:30, 31) Aboobo, amutole ciindi kupandulula alimwi akutondezya mbolubeleka lugwalo, mbuli mbomukonzya kucita nomupa makani mu Cikolo Camulimo Weendelezyegwa a Leza. (Inc. 17:3) Amubone kuti muntu ngomubandika limwi wamvwisya mbwakonzya kubelesya Jwi lya Leza mubuumi bwakwe.
5. Mbuti muntu ngotutolela mamagazini lyoonse mbwakonzya kutalika kwiiya Bbaibbele?
5 Ikuti muntu ngomubandika limwi kazikkomanina nzyali mukwiiya, mukuya kwaciindi amubikkilizye magwalo obile naa otatwe amu Bbaibbele mumibandi yanu mukuswaya kumwi akumwi. Amujane ciindi cakumutondezya broshuwa ya Ncayanda naa bbuku lya Luzibo. Munzila eeyi muntu ngomutolela mamagazini lyoonse kumbele inga watalika kwiiya Bbaibbele.