Amwaambile Bamwi Kujatikizya “Mumuni Wenyika”

1. Mumuni nzi mupati wakasinsimwa mu Jwi lya Leza, alimwi nciindi cili icipa kuti twaambile bamwi kujatikizya mumuni ooyu?

¹ Kwiinda mumusinsimi Isaya, Jehova wakasinsima kuti: “Bantu ibakeenda mumudima babona mumuni mupati. Abo ibakakede munyika yalufu iisia mbi bapasukilwa mumuni.” (Is. 9:⁠2) “Mumuni mupati” ooyo wakabonwa mubukkale bwa Mwana aa Leza, Jesu Kristo. Mulimo wakwe wakukambauka naakali anyika alimwi azilongezyo zyakajanwa kuzwa kucinunuzyo cakwe zyakayumya-yumya bukkale bwabaabo bakali mumudima kumuuya. Mumuni wamusyobo ooyu ngobayandika bantu muciindi eecino camudima. Mulalilo wa Mwami nciindi cibotu cakuti twaambile bamwi kujatikizya “mumuni wenyika.” (Joh. 8:12) Mwaka wamana, tuulunzuma twabantu bakatondezya lusyomo kwiinda mukutobela mulawo wa Jesu wakuti: “Amukacite obo kuti mukandiyeeye.” (Lk. 22:19) Mbotuyaabuswena ku Ciibalusyo camwaka uno, mbuti mbotukonzya kutola lubazu mukwaambila bamwi kujatikizya mumuni mupati Jehova ngwaatupa kuti tuumunike?—Flp. 2:15.

2. Ino mbuti mbotukonzya kulumba kapati kujatikizya cinunuzyo cacipaizyo, alimwi ncinzi ciyootobela mukucita boobo?

² Amube Amoyo Uulumba: Ciindi ca Ciibalusyo nciindi cibotu cakuzinzibala kuyeeya kujatikizya luyando lupati Jehova alimwi a Jesu ndobakatondezya mukupa cipaizyo cacinunuzyo kubantu. (Joh. 3:16; 2 Kor. 5:14, 15) Cakutadooneka, kuzinzibala kuyeeya ooku kuyakutupa kulumba kapati akaambo kaciindi eeci cisetekene. Bantu ba Leza boonse bayooyanda kulibikkila ciindi cakubala akuzinzibala kuyeeya nzyobabala kukubala kwa Bbaibbele kwaalubazu kwa Ciibalusyo, mbuli mbokutondezyedwe mukabbuku ka Kulingaula Magwalo Abuzuba. Kuyeeya kujatikizya bube bubotu kapati bwa Jehova bwalo buyubununwa cabulemu mukupa cinunuzyo, kutupa kuti katukkomene kuti ngu Leza wesu. Kuzinzibala kuyeeya kujatikizya ncocipandulula cinunuzyo kulindiswe kutugama, kuyungizya luyando lwini-lwini ndotujisi kuli Leza alimwi a Mwana wakwe alimwi kutukulwaizya kucita kuyanda kwa Leza kusikila mpotugolela.—Gal. 2:20.

3. Mbuti mbotukonzya kutondezya kulumba kwesu ku Ciibalusyo?

³ Ikuti katulumba kapati kububambe bwa Jehova bwalufwutuko, busungu bwesu ku Ciibalusyo buyoolibonya kuli basikwiiya Bbaibbele, kubantu nkotupilukila amakani mabotu, basazima, basimukoboma, basicikoloma, mbotubeleka limwi alimwi abamwi mbotutamba kuciindi eeci caalubazu. (Lk. 6:45) Aboobo, amusoleke canguzu kubatamba bantu aaba akubapa tupepa twakubatamba ku Ciibalusyo tusimbidwe kutegwa katuli ciyeezyo. Ikutegwa kutabi ngobaluba, banji babona kuti cilagwasya kubalemba aabo mbobatamba lyoonse ku Ciibalusyo akuyungizya bambi bapya amwaka. Kucita boobu munzila yalibambilwa kabotu akusolekesya kutamba baabo bajisi luyandisyo ilakonzya kuba nzila mbotu yakutondezya kulumba kwesu kuli Jehova Leza “nkaambo kacipo cakwe citaambiki.”—2 Kor. 9:15.

4. Ncinzi cikonzya kutugwasya kutola ciindi cinji mumulimo mumwezi wa March a April?

⁴ Amutole Ciindi Cinji Mumulimo: Sena inga mwakonzya kutola ciindi cinji mumulimo mumwezi wa March a April? Cakutazumbauzya, kusolekesya kwaambila bamwi “Makani Mabotu aabulemu bwa-Kristo” uyookulongezya Leza. Jehova mbwali Nkekasensa kaluzibo lwakumuuya, ulailila kuti: ‘Akube mumuni uumunikila mudima.’ (2 Kor. 4:4-6) Kufwumbwa nokwayandika, baalu bayakubikka bubambe bwaciindi abusena bwamiswaangano yamulimo wamumuunda iiyungizyidwe kutegwa bagwasye basikumwaya bayanda kutola ciindi cinji mumulimo. Eeci cilakonzya kubikkilizya bukambausi bwamumugwagwa cindi camafwumo-fwumo naa bubambe bwakubelekela mucilawo camakwebo alimwi abukambausi bwaaluwaile kumangolezya naa kulubundu-bundu. Amulibikkile mbaakani mbotu yamawoola kutegwa imugwasye kutola ciindi cinji mumulimo alimwi amubeleke canguzu kwiizuzikizya. Kubantu banji, ikupa Jehova zintu ziinda kubota kubikkilizya kutola lubazu mubupainiya bwakugwasyilizya.—Kol. 3:23, 24.

5. Mbuti banji mbobagwasyigwa kukucesyegwa kwamweelwe wamawoola aayandika kubapainiya bakugwasyilizya?

⁵ Sena Inga Mwacita Bupainiya Bwakugwasyilizya? Kwainda myaka iili ciloba kuzwa ciindi mweelwe wamawoola uuyandika kubapainiya bakugwasyilizya nowakacesyegwa. Kucinca ooku kwapa kuti abambi banji babe alukkomano azilongezyo zyamulimo wabupainiya bwakugwasyilizya. Sena kuli nomwakabusolekede? Bamwi caba cilengwa cabo buya cakucita boobu amwaka. Mumbungano zinji, basikumwaya banji balaucita mulimo ooyu caantoomwe alimwi ulaba cibeela cikkomanisya kapati camulimo wambungano mumwaka. Sena inga mwajana ciindi cakucita bupainiya bwakugwasyilizya ciindi ca Ciibalusyo mumyezi eeyi? Mwezi wa April ulakonzya kuba mwezi mubotu kapati kuli bamwi mbokunga ujisi nsondo zyosanwe.

6. Ino mbubambe bukkomanisya buli buti ibwabambwa?

⁶ Sena mbungano yenu iyooswaigwa mulangizi wabbazu mumwezi wa March naa April? Eeci cilakonzya kumubeda ciindi acimbi cibotu. Mbuli mbokwakaambilizyigwa musyule, mumwaka wamulimo wa 2006, boonse banoobeleka kabali bapainiya bakugwasyilizya mumwezi mulangizi wabbazu ngwanooswaya bayoozumizyigwa kujanika mucisela cakusaanguna camuswaangano wabapainiya baciindi coonse uucitwa munsondo njaswaya. Cakutadooneka, twaambo twakumuuya tuyumya-yumya tupegwa amuswaangano ooyu tuyakugwasya bapainiya bakugwasyilizya banji kuti bacikonzye kuba bapainiya baciindi coonse. Kuyungizya waawo, mu March tuyakuba acoolwe cakugwasya bantu kuba mumumuni wakumuuya kwiinda mukubelesya bbuku lipya linooyiigwa lya Ino Ncinzi Cini Bbaibbele Ncoliyiisya? Sena inga tiimwalibikkila mbaakani yakutalisya ciiyo ca Bbaibbele mubbuku lipya eeli?

7, 8. (a) Ino ncinzi cikonzya kutugwasya kubamba mulongo wakucita bupainiya bwakugwasyilizya? (b) Mbuti kubelekela aantoomwe kwamukwasyi mbokukonzya kugwasya, alimwi mbuti mukwasyi woonse mbougwasyigwa?

⁷ Nomutelaika zyamweelwe wamawoola aali 50 aayandika kubapainiya bakugwasyilizya, amusole kulemba mulongo uuyomuzumizya kumunika mumuni wakasimpe kwamawoola aabalilwa ku 12 ansondo. Amucibandike abaabo ibakacita boobo cakuzwidilila kubikkilizya abamwi buyo. Eeci inga cabakulwaizya kuti bamusangane. Kwiinda mukulibambila kabotu, basikumwaya babbapatizyidwe bana alimwi abapati, bacibona kuti tacikatazyi kwiizuzikizya mbaakani eeyi mbotu kapati. Amucipailile eeci. Eelo kaka kuti kacikonzyeka, amubutelaike akubukkomanina bupainiya bwakugwasyilizya!—Malk. 3:10.

⁸ Mikwasyi minji yacibona kuti lugwasyo luzwa kumukwasyi woonse lulakonzya kupa kuti cuube-ube kuli umwi wamumukwasyi kwiizuzikizya mbaakani eeyi. Umwi mukwasyi wakasala kuti boonse babbapatizyidwe mumukwasyi wabo bali bosanwe balilembye kuba bapainiya bakugwasyilizya. Bana bobile ibamwi batakaninga bbapatizyigwa bakasoleka canguzu kutola ciindi cinji mumulimo. Ino mukwasyi wakagwasyigwa buti kuzwa mukusoleka ooku? Bakalemba kuti: “Wakali mwezi uukkomanisya kapati, alimwi twakalimvwa kuti cilongwe camumukwasyi cakayumizyigwa. Eelo kaka tulamulumba Jehova akaambo kacilongezyo cibotu eeci!”

9. Mbuti mbotukonzya kuumunika mumuni wesu ciindi ca Ciibalusyo?

⁹ Sena mulimo wesu waalubazu mu March a April uyakukulwaizya akutupa kuba acilongwe ciyumu a Taata wesu wakujulu? Kuzwidilila kwesu mukucita boobu kuyeeme akusolekesya nkotucita mukuyungizya luyando lwesu kuli Leza a Mwana wakwe alimwi akutola ciindi cinji mumulimo. Makanze eesu aabe mbuli aasintembauzyo wakaimba kuti: “Njoolumbisya Jehova amulomo wangu, njoomutembaula akati kabuleya.” (Int. 109:30) Jehova uyooulongezya mulimo wesu wabusungu ciindi ca Ciibalusyo. Aboobo, atuumunike mumuni mupati kutegwa bantu banji abamwi bakonzye kuzwa mumudima alimwi ‘akuba amumuni wabuumi.’—Joh. 8:12.