Batupa Cikozyanyo Cakusyomeka
1 Cibeela cipya camulimo waciindi coonse cakatalisyigwa mu 1937—mulimo wabupainiya bwaalubazu. Balombwana abamakaintu beelela, ibasimide mumulimo wa Bunakristo, bakaitambula camoyo woonse mikuli yakuyoobelekela kufwumbwa ooku mbunga nkoyabatuma. Kwamakkumi aamyaka kusika mazuba aano, bapainiya baalubazu bazumanana kupa cikozyanyo cakusyomeka ceelede kutobelwa.—Heb. 6:12.
2 Mbobakali Kumbele: Kumatalikilo, bapainiya baalubazu bakautola ambele mulimo wakukambauka kwiinda mukubelesya muncini uubelesya malekkoodi basika amunzi wauuli aŋanda. Alimwi bakabelesya malekkoodi kumubandi wamu Bbaibbele nobapilukila. Eeci cakali kucitwa mumadolopo mapati mbungano mozyakatalisyidwe kale. Kuzwa waawo, bapainiya baalubazu bakazootumwa kumasena kwakabulide bakambausi ba Bwami. Bakazumanana kubaswaya bantu boonse bakajisi luyandisisyo kumulumbe wa Bwami alimwi akweendelezya ziiyo zya Bbaibbele. Akaambo kakusolekesya kwabo, imbungano zinji zipya zyakatalisyigwa. Mulimo wakumwaya makani mabotu ngobakacita wakapa kuti kube kuyaambele kapati kwambunga njotubona mazuba aano. (Is. 60:22) Bapainiya baalubazu bazumanana kugwasya kapati mukumwaya makani mabotu ‘kubantu boonse baansi ano.’—Kol. 1:23.
3 Baleelede Kuyiigwa: Bapainiya baalubazu bamwi babeleka mumulimo waciindi coonse kwamyaka iili mbwiibede. Kwamyaka minji yainda, lusyomo lwabaalumi abamakaintu aaba basyomeka lwakasalazigwa mubukkale bwiindene-indene. (1 Pet. 1:6, 7) Balilisungwide kusiya zintu zibotu zyakumubili kutegwa bakabelekele mumasena muyandika lugwasyo. Ibamwi lino balicembeede alimwi balaciswa-ciswa, naa balacitikilwa mapenzi amwi. (2 Kor. 4:16, 17) Nokuba boobo, ‘bacizyala micelo mubucembele bwabo.’ (Int. 92:14) Basyoma muli Jehova, eelyo balatambula zilongezyo kuzwa kulinguwe.—Int. 34:8; Tus. 10:22.
4 Masimpe, tweelede kubalumba kapati bapainiya baalubazu. Ikuti kamujisi coolwe cakuba abapainiya baalubazu babelekela mumbungano yanu, amucibelesye coolwe eeco kutegwa mwiizye ambabo alimwi akugwasyigwa azyakuluula zyabo. Amubalumbe akaambo kamulimo wabo wakuba bakambausi ba Bwami basyomeka. Amukulwaizyigwe akaambo kakutazungaana kwabo. Boonse aabo baiya lusyomo lwabo, mbubwenya buyo abalo Jehova ulakonzya kubayanda akubalongezya nkaambo “abo bacita cakusyomeka mbebamubotezya.”—Tus. 12:22.