Kabbokesi Kamubuzyo

◼ Mbuti mbotukonzya kubagwasya bapainiya?

Mumwaka wamulimo wa 2009, bakwesu abacizyi batandila ku 800,000 bakacita mulimo wabupainiya bwaciindi coonse abwaalubazu nyika yoonse. Aaba babelesi baciindi coonse babelesya ciindi cabo, nguzu zyabo azyintu nzyobajisi mukukambauka makani mabotu. (Tus. 3:9) Eelo kaka Jehova ulikkomene amilimo yabo! Mbuti mbotukonzya kutondezya kuti tubabona mbwababona Jehova alimwi akubagwasya bapainiya kutegwa kabakkomene alimwi akuzumanana kubeleka mulimo wabo?

Masimpe, majwi eesu mabotu alakonzya kubayumya-yumya kutegwa bazumanane kubeleka mulimo wabupainiya. (Tus. 25:11) Sena tatukonzyi kujana ciindi cakubeleka ambabo mumulimo wakukambauka? Iciindi notubeleka ambabo tulakonzya kubelesya mootokala wesu ikutali wabo. Ikuti twatanta mootokala wabo, tulakonzya kusanga kutegwa bakonzye kuula ziyandika. (1 Ko. 13:5; Flp. 2:4) Alimwi tulakonzya kutondezya kuti tulabayanda kwiinda mukubasangaalizya akubaita zimwi ziindi kumaanda eesu kucakulya.—1 Pe. 4:8, 9.

Magwalo alasyomezya kuti Jehova uyoobapa ziyandika aabo babikka Bwami bwakwe mubusena bwakusaanguna mubuumi bwabo. (Int. 37:25; Mt. 6:33) Nzila imwi njabelesya nimbungano ya Bunakristo. (1 Jo. 3:16-18) Masimpe ngakuti bapainiya tabalangili kuti bakwesu banoobabbadelela zyintu nzyobayandika. Alimwi ambweni tabakonzyi kwaambila bantu bamwi kuti kuli nzyobayanda. Nokuba boobo, tulakonzya kubagwasya bapainiya basyomeka ‘kuzulizya kubulizya kwabo’ kwiinda mukupakamana akubona nzyobayandika.—2 Ko. 8:14, 15.

Febe, mukambausi musungu mu Mbungano yaku Kenekreya mumwaanda wamyaka wakusaanguna, naakaunka ku Roma, Paulo wakakulwaizya bakwesu baku Roma kuti: “Amumutambule kabotu mu Mwami munzila yeelede basalali, alimwi . . . mumugwasye mumakani aali woonse mwanga wayandika lugwasyo.” (Lom. 16:1, 2) Tulijisi coolwe cakubagwasya aabo bali mumbungano yesu bakambauka makani mabotu cakutaleka mbuli bapainiya baciindi coonse abapainiya baalubazu.—Mil. 5:42.