Mweelwe Wamawoola Aayandika Kubapainiya Wacinca
1 Toonse tulakkomana kubaa bapainiya baciindi coonse alimwi abagwasilizya mumbungano ibabeleka canguzu. Nomuba mumasena cilawo cakubelekela mocili cisyoonto alimwi mocibelekwa-belekwa coonse, ibapainiya bapa cikozyanyo cibotu kwiinda mukubeleka mulimo wa Bwami cabusungu. Bakulwaizya basikumwaya boonse kuzumanana kukutauka kuyandaula baabo “basalidwe.”—Inc. 13:48.
2 Iba Sosaiti babubona buyumuyumu mbobajana bapainiya kukujana mulimo wakumubili wakubagwasilizya kuzintu zyakumubili alimwi uubapa ciindi cakuzumanana mumulimo wabo wabupainiya waciindi coonse. Ikuyuma kwabuumi mumasi manji mazubaano capa kuti kaciyabubakataazya bamwi kunjila mulimo wabupainiya nokuba kuti mumoyo balayanda kucita boobo. Eezi zintu zyalangwa-langwa mumyezi eyi yainda.
3 Akaambo kaceeci caambwa kale, iba Sosaiti baacesya mawoola aayandika kubelekwa abapainiya baciindi coonse abakugwasilizya. Ikutalikila mumwaka wa 1999, imawoola aayandika kubapainiya baciindi coonse anooli 70 amwezi, naa 840 kwaasanganya oonse mumwaka. Ibapainiya bakugwasilizya banooyandika mawoola aali 50 mwezi amwezi. Mweelwe wamawoola aayandika kubapainiya baalubazu abamishinali tuucincide nkaambo iba Sosaiti balabagwasilizya kuzintu ziyandika zyakumubili. Eeci cibapa kuti basungwaalile mumulimo wakukambauka akugwasya bantu kuba basikwiiya.
4 Tusyoma kuti ooku kucesya kwamawoola aayandika kulagwasya kuti bapainiya banji bazumanane kubeleka mulimo ooyu mubotu. Eeci alimwi cilabajulila mulyango basikumwaya banji kunjila mulimo wabupainiya bwaciindi coonse abwakugwasilizya. Tacilibedi coolwe kaka eci kuli boonse mumbungano!