Amube Azilengwa Zibotu Zyakumuuya, Amutebule Zilongezyo Zinji
1. Nkaambo nzi ncocigwasya kulingula milimo yanu yakumuuya njomucita abuzuba?
1 Nomwakaba Banakristo, kweelede kuti mwakasolekesya kuba abubambe bwakunoocita milimo yakumuuya iigwasya yalo iibikkilizya kubala Bbaibbele, miswaangano ya Bunakristo, mulimo wamumuunda alimwi amupailo. Akaambo kakulongezyegwa a Jehova mukusoleka kwanu, mwakaba acilongwe ciyumu a Jehova. Ambweni kwainda myaka iili mbwiibede kuzwa ciindi nomwakabbapatizyigwa. Sena mwazumanana kuba azilengwa zyakumuuya nzyomwakaba azyalo nomwakaba Banakristo?
2. Ino tugwasyigwa buti kuzwa kukubala Bbaibbele abuzuba?
2 Amulilingule: Sena mujisi cilengwa cakubala cibeela ca Jwi lya Leza abuzuba? Eelyo kaka tulatambula zilongezyo zinji kwiinda mukucita boobo! (Jos. 1:8; Int. 1:2, 3) Mu Israyeli yansiku, mwami aumwi wakeelede kubala bbuku lya Mulawo “mazuba oonse aabuumi bwakwe.” Ino wakali kuyoogwasyigwa buti? Mwami wakali kuyooba amoyo mubombe alimwi akwiiya kulemeka Jehova kutegwa ataleyi kuzwa kumalailile Aakwe. (Dt. 17:18-20) Mbubwenya buyo amazuba aano, kubala Bbaibbele abuzuba kulatugwasya kuba bantu batakwe mulandu alimwi baluleme munyika eeyi mbyaabi alimwi iisofweede. Alimwi kulatugwasya kuba bantu balibambilide kumulimo.—Flp. 2:15; 2 Tim. 3:17.
3. Ino tugwasyigwa buti kukujanika kumiswaangano lyoonse?
3 Jesu wakajisi cilengwa cakwiinka kucikombelo ooko Magwalo nkwaakali kubandikwa. (Lk. 4:16) Cakutadooneka, eeci cakamuyumya kulwana masunko ngaakali kuyoocitikilwa. Andiswe tulayumizyigwa kwiinda mumalailile aakumuuya ngotupegwa kumiswaangano yambungano alimwi ‘akuyumizyanya mulusyomo’ ikuli kabotu. (Rom. 1:12) Kubungana antoomwe abakwesu kulatugwasya kuliyumya mumapenzi aamazuba aano aakumamanino. (Heb. 10:24, 25) Sena cicili cilengwa canu kujanika kumiswaangano yoonse?
4. Ino kutola lubazu mumulimo wamumuunda nsondo ansondo kutugwasya buti?
4 Cibalo cakasololelwa amuuya citwaambila kuti baapostolo bakatola lubazu mukwaambilizya makani mabotu ‘mazuba oonse mutempele amumaanda.’ (Inc. 5:42) Nokuba kuti inga tiitwakonzya kukambauka abuzuba, sena inga twakonzya kucicita kuba cilengwa cesu kutegwa katutola lubazu mububambe bumwi bwabukambausi nsondo ansondo? Kwiinda mukucita boobu, tuyooba aluzibo lunji mukupandulula Jwi lya Leza alimwi tuyooba azyakuluula zikulwaizya notukambaukila bamwi kasimpe kamu Bbaibbele.
5. Ino nkaambo nzi ncociyandika kapati kupaila kuli Jehova lyoonse?
5 Musinsimi Daniele wakalongezyegwa kapati akaambo kakubelekela Jehova “lyoonse” mubuumi bwakwe boonse. Eeci cakali kubikkilizya acilengwa cakupaila lyoonse kuli Jehova. (Dan. 6:10, 16, 20) Mbubwenya buyo, notupaila lyoonse kuli Jehova camoyo woonse, uyootupa muuya wakwe uusalala. (Lk. 11:9-13) Kuyungizya waawo, Jehova uyootwiingula kwiinda mukuswenenena kulindiswe, kutupa kuti tube acilongwe ciyumu anguwe. (Int. 25:14; Jak. 4:8) Eelyo kaka tabuliboteli bulumbu oobu! Aboobo, atubeleke cabupampu kutegwa tube azilengwa zibotu zyakumuuya alimwi akutebula zilongezyo zinji kuzwa kuli Jehova.