Muuya Wakulyaaba Uletela Zilongezyo
1. Ino mbuti Davida a Nehemiya mbobakatondezya muuya wakulyaaba?
1 Goliati naakasampaula basikalumamba bana Israyeli, sikalumamba uuli oonse naakalyaaba kuti amulwane. Pele kunyina wakalyaaba, ccita mulombe mweembezi watakayiisidwe kulwana nkondo. (1 Sam. 17:32) Bama Juda bakali mubuzike bakapilukila ku Jerusalemu nobakakakilwa kuyakulula bwaanda, sikupa zyakunywa kumwami wa Persia nguwakalisungula kusiya cuuno cakwe cabulemu muŋanda yamwami, akweenda kuya ku Jerusalemu kutegwa akeendelezye mulimo. (Neh. 2:5) Jehova wakabalongezya baalumi bobile aaba, Davida a Nehemiya akaambo kamuuya wakulyaaba ngobakatondezya.—1 Sam. 17:45, 50; Neh. 6:15, 16.
2. Nkaambo nzi Banakristo ncobeelede kutondezya muuya wakulyaaba?
2 Mazuba aano, muuya wakulyaaba tuuko munyika. Mu “mazuba aakumamanino” aano, bantu balipakesye mubuumi bwabo, alimwi banji “[m]basikuliyanda.” (2 Tim. 3:1, 2) Tacikatazyi pe kumuntu kutalika kubikkila maanu kapati kuzintu nzyayanda mwini cakuti ulatalika akutabikkila maanu kuzyoolwe zyakulyaaba nokwayandika kugwasya bamwi. Pele mbotuli Banakristo, tuyanda kwiiya Jesu walo wakaliyeeyela kubweza ntaamu kugwasya bamwi. (Joh. 5:5-9; 13:12-15; 1 Pet. 2:21) Ino mbuti mbotukonzya kutondezya muuya wakulyaaba, alimwi ino nzilongezyo nzi nzyotuyoojana?
3. Mbuti muuya wakulyaaba mbougwasya kumiswaangano yambungano?
3 Mukubelekela Bakwesu: Tulakonzya kwaabila ‘cipo cakumuuya’ kuli bamwi kwiinda mukulyaaba kupa bwiinguzi ciindi zibeela zyamiswaangano nozizumizya baswiilizi kutola lubazu. (Rom. 1:11) Kwiingula kumupa bulemu Jehova, kupa kasimpe kuti kakkalilile mumizeezo amumoyo wesu alimwi kupa kuti twiikkomanine miswaangano. (Ps. 26:12) Alimwi tulakonzya kulyaaba kupa makani mu Cikolo Camulimo Weendelezyegwa a Leza ciindi uupa makani natakonzyi kucita boobo. Eeci ciyootugwasya kuyungizya luzibo lwesu lwakuyiisya.
4. Ino ninzila nzi zimwi motukonzya kutondezya muuya wakulyaaba?
4 Bakwesu balakonzya kutondezya muuya wakulyaaba kwiinda mukusika azyeelelo zyakulanganya mikuli mumbungano. (Is. 32:2; 1 Tim. 3:1) Boonse balakonzya kugwasyilizya kuti miswaangano yaalubazu, yabbazu ayacooko yeende kabotu kwiinda mukulyaaba kubelekela muzibeela ziindene-indene. Notulyaaba kubelekela antoomwe amulangizi wabbazu mumulimo naa kumubambila cakulya, eeci cipa ‘kuyumizyanya mulusyomo.’ (Rom. 1:12) Notulisungula kupa lugwasyo kubana batakwe bamawisi, bamukabafwu, baciswa, bamatumbu alimwi abamwi mumbungano, tulajana lukkomano alimwi azilongezyo kuzwa kuli Jehova.—Tus. 19:17; Inc. 20:35.
5. Ino ntwaambo nzi tujatikizya Ŋanda ya Bwami tuyandika basikulisungula balyaabide?
5 Nzila imwi yakwaaba ciindi alimwi anguzu zyesu njakugwasyilizya mukusalazya alimwi akubambulula Ŋanda ya Bwami. Kuyungizya waawo, akaambo kakuti bantu banji bali mukuboola mukasimpe, kuyandika kuyaka Maanda aa Bwami mapya alimwi abasikulisungula banji beelede kubeleka mulimo ooyu. Banabukwetene bamwi bakalisungula kugwasya nokuba kuti tiibakacizi kuyaka. Mukuya kwaciindi, banabukwetene aaba bakayiisyigwa alimwi lino balagwasyilizya mukuyaka. Mukaintu wakaamba kuti: “Kubelekela antoomwe abamwi kwapa kuti tube azilongwe ziyumu. Twakotoka, inga tulikatede kumubili pele tulakatalusyigwa kumuuya.”
6. Nkaambo nzi mulimo wakukambauka ncouli mulimo mupati kapati wakulyaaba ngotukonzya kucita?
6 Kwiinda Mukukambauka: Mulimo mupati wakulyaaba ngotukonzya kucita mazuba aano mmulimo wakukambauka Bwami. Bantu nobagwasyigwa kumvwisya akubelesya lulayo lwamu Bbaibbele, balakabona kaambo ncobaponena alimwi balajana nguzu zyakucikonzya kuzunda ziyanza zibi. Balaiya bulangizi bwakumbele bwamu Bbaibbele buyumya-yumya. Kwiinda mukuyiisya luzibo lwamu Bbaibbele, tubeleka mulimo wakulyaaba uukkomanisya walo uuletela bamwi zilongezyo zitamani. (Joh. 17:3; 1 Tim. 4:16) Ambweni bukkale bwesu bulakonzya kutuzumizya kutola ciindi cinji mumulimo ooyu kwiinda mukucita bupainiya bwakugwasyilizya naa bwaciindi coonse, kwiinda mukulongela kubusena bubulide kapati naa kwiinda mukwiiya mwaambo uumbi.
7. Ino nkaambo nzi kulyaaba ncokuyandika kapati mazuba aano?
7 Mwami Davida wakasinsima kuti kuciindi eeco Mesiya nayootalika kweendelezya, bantu ba Leza ‘bayoolyaaba camoyo woonse.’ (Int. 110:3) Jehova nabinzyaanya mamanino aabutebuzi bwakumuuya, mulimo uuyandika kulyaaba mmupati. (Is. 60:22) Sena kuli nomwakaambide kuti: “Mpendi! Unditume mebo!”? (Is. 6:8) Masimpe, kwiinda mukutondezya muuya wakulyaaba, tulamukkomanisya Jehova alimwi akujana zilongezyo zinji.