Kabbokesi Kamubuzyo

◼ Mbuti lwiimbo lwakujalula lwamuswaangano wa Cikolo Camulimo Weendelezyegwa a Leza, Muswaangano wa Mulimo, Muswaangano Wabuleya alimwi a Ciiyo ca Ngazi Yamulindizi mbolweelede kutalisigwa alimwi nguni weelede kucita boobo?

Nyimbo zisalidwe zyakujalula muswaangano zyansondo aimwi zya Cikolo Camulimo Weendelezyegwa a Leza zilabikkwa mu Mulongo wa Cikolo Camulimo Weendelezyegwa a Leza uuli mupepa lyamukati lya Mulimo Wesu wa Bwami wa October. Nyimbo zyakujalula akujala Muswaangano wa Mulimo wansondo ansondo zilatondezyegwa apeeji 2 mu Mulimo Wesu wa Bwami. Mbubwenya buyo, nyimbo zya Ciiyo ca Ngazi Yamulindizi zyansondo ansondo zilajanwa apeeji 2 mu Ngazi Yamulindizi. Nyimbo zibikkidwe zibonwa kuti ncibeela camuswaangano woonse, aboobo zyeelede kutalisigwa amukwesu weendelezya muswaangano ooyo ikutali Mulangizi wa Cikolo naa sicuuno wa Makani Aabuleya.

Mucikozyanyo, mulangizi wa Cikolo Camulimo Weendelezyegwa a Leza uyoobatambula baswiilizi, uyooamba lwiimbo lwakujalula, uyooendelezya cikolo mpoonya uyootamba mwaambi wakusaanguna wa Muswaangano wa Mulimo kucibumbili. Mukwesu uujisi cibeela mu Muswaangano wa Mulimo nguuyooamba lwiimbo lwakujalula Muswaangano wa Mulimo.

Mbubwenya buyo, Muswaangano Wabuleya uyootalisigwa asicuuno. Uyoobatambula boonse bayoojanika akubalomba kusangana mukwiimba lwiimbo lwakujalula lwakasalwa amwaambi. Sicuuno (naa mukwesu umbi weelela wakasalilwa limwi) uyootalisya muswaangano kwiinda mukupaila. Uyooamba mwaambi akwaamba mutwe wamakani aabuleya. Aakumana makani, sicuuno nokuba kuti takaambi zyoonse mwaambi nzyaali kwaamba, uyooamba majwi masyoonto aakulumba kumalailile. Uyooamba mutwe wamakani aabuleya aansondo iitobela mpoonya uyoobalomba boonse bajanika kuti balindile Ciiyo ca Ngazi Yamulindizi. Sicuuno teelede kubuzya baswiilizi ikuti naa balayanda kupa mooni kumbungano nkwaazwa mwaambi ikuti naa ngwakumbungano iimbi. Citobela, sicuuno uyooita mweendelezi wa Ciiyo ca Ngazi Yamulindizi kucibumbili.

Mweendelezi wa Ciiyo ca Ngazi Yamulindizi uyooamba lwiimbo lwakusaanguna lweelede kubelesegwa kweelana aciiyo. Uyooendelezya ciiyo kweelana amalailile aalembedwe mpoonya uyooamba lwiimbo lwakujala. Mweendelezi wa Ciiyo ca Ngazi Yamulindizi kanji-kanji nguuita mukwesu wali kukanana makani aabuleya kuti ape mupailo wakujala.

Ikutobela malailile aaya kuyoogwasya kubona kuti miswaangano yesu yambungano yeendelezyegwa munzila iili kabotu.