Bubambe Bupya Bwamiswaangano Yambungano
1, 2. Ino nkucinca kuli buti kuyoocitika kujatikizya bubambe bwamiswaangano kutalikila mu January 2009?
1 Munsondo ya April 21-27, 2008, kwakali cakwaambilizya cikkomanisya mumbungano nyika yoonse mbwiizulwa. “Kutalikila mu January 1, 2009, Ciiyo Cabbuku Cambungano cinoocitilwa antoomwe a Cikolo Camulimo Weendelezyegwa a Leza alimwi a Muswaangano wa Mulimo. Izyina lyamuswaangano wa Ciiyo Cabbuku Cambungano liyoocincwa akuba Ciiyo ca Bbaibbele Cambungano.”
2 Mulongo Wamiswaangano Eeyi Iicitwa Ansondo: Miswaangano yoonse kubikkilizya nyimbo amipailo iyootola woola lyomwe amaminiti aali 45. Muswaangano uyootalika alwiimbo alimwi amupailo (5 min.), eelyo kuyooba Ciiyo ca Bbaibbele Cambungano (25 min.). Kuzwa waawo, Cikolo Camulimo Weendelezyegwa a Leza (30 min.) ciyootobela. Mpoonya, lwiimbo (5 min.) luyoojalula Muswaangano wa Mulimo (35 min.). Ooyu muswaangano uyoomana alwiimbo amupailo (5 min.). Kutegwa mugwasyigwe kulibambila miswaangano eeyi, mulongo wa Ciiyo ca Bbaibbele Cambungano, Cikolo Camulimo Weendelezyegwa a Leza alimwi a Muswaangano wa Mulimo unoomwaigwa amwezi mu Mulimo Wesu wa Bwami.
3. Ino Ciiyo ca Bbaibbele Cambungano cinooyendelezyegwa buti?
3 Ciiyo ca Bbaibbele Cambungano: Muswaangano ooyu unoocitwa mbubwenya mbocicitwa Ciiyo ca Ngazi Yamulindizi. Takukayandiki kutalika muswaangano kwiinda mukwiinduluka twaambo twamuciiyo cansondo yamana. Muciindi caboobo, muswaangano weelede kuba buyo amajwi masyoonto aantalisyo. Eeci ciyoopa kuti boonse bajanika babe aciindi cakupa bwiinguzi mubufwaafwi. Nsondo aimwi, mulangizi weendelezya unoosala mwaalu omwe kuti ayendelezye muswaangano ooyu.
4. Ino Muswaangano wa Mulimo uyoocinca buti?
4 Muswaangano wa Mulimo: Muswaangano wa Mulimo uyoozumanana kucitwa mbuli mboucitwa lyoonse, pele unoojisi zibeela zifwaafwi. Kanji-kanji zyakwaambilizya ziya kutola maminiti osanwe. Eeci ciyoopa kuti kakucitwa buyo zyakwaambilizya ziyandika kapati alimwi amagwalo amwi aazwa kumutabi. Zyakwaambilizya mbuli bubambe bwakuunka mumulimo wamumuunda, mulongo wakusalazya, malipooti aankomwi yamali alimwi amagwalo amwi azwa kuofesi yamutabi tazyeelede kubalwa kucibumbili pe, pele ziyoobikkwa abboodi lyamakani kutegwa bakwesu balibalile. Aabo bajisi zibeela mupulogilamu beelede kulibambila kabotu akutobela ciindi cibikkidwe alimwi amalailile aapedwe.
5. Ino miswaangano yambungano inooyendelezyegwa buti nsondo njayooswaya mulangizi wabbazu?
5 Kuswaya Kwamulangizi Wabbazu: Pulogilamu yakuswaya kwamulangizi wabbazu yalo taikacinci. Muli Bwabili kuyoocitwa Cikolo Camulimo Weendelezyegwa a Leza alimwi a Muswaangano wa Mulimo eelyo kuyootobela lwiimbo. Mpoonya mulangizi wabbazu uyookanana makani kwamaminiti aali 30. Mbuli mbokucitwa nsondo njaswaya mulangizi wabbazu, buzuba bumwi munsondo kuyoocitwa Ciiyo ca Bbaibbele Cambungano mpoonya kuyooba lwiimbo amakani aamulimo aayookananwa amulangizi wabbazu. Muswaangano uyoojalwa alwiimbo alimwi amupailo.
6. Ino mulangizi wakabunga ujisi mulimo nzi?
6 Miswaangano Yamulimo Wamumuunda: Balangizi batubunga bayoosalwa akabunga kabaalu kutegwa kabalanganya tubunga twabasikumwaya ibalibambila kuunka mumulimo wamumuunda alimwi akucita mulimo wabweembezi kuli basikumwaya bali mukabunga aako. Ikuti mukutausi nguwasalwa kuti kalanganya kabunga, weelede kwiitwa kuti “mubelesi wakabunga.”
7. Ino ncinzi ncotukonzya kulangila kububambe bupya bwamiswaangano yambungano?
7 Kweelana ambotwabona mumalailile aaya, tuyooba aciindi cakulanga-langa malailile alimwi atwaambo tukulwaizya twalo tuyootugwasya kuba acilongwe ciyumu a Jehova. Eeci ciyootupa kuba bakambausi alimwi abamayi bacibwene ibakayiisyigwa kutegwa tuzwidilile mumulimo.—Ef. 4:13, 14; 2 Tim. 3:17.
8. Ino mbuti kulibambilila limwi mbokuyootugwasya swebo alimwi abambi?
8 Kulibambilila limwi miswaangano eeyi kuyootugwasya kubikkila maanu kutwaambo tupati-pati ituyookankaizyigwa lyamiswaangano. Toonse tuyoocikonzya kutola lubazu mukwiingula kutegwa tukulwaizyanye. (Rom. 1:11, 12; Heb. 10:24) Makanze eesu ayelede kuba aakuti ‘kukomena kwesu kulibonye’ kwiinda “[muku]pandulula makani aalusinizyo mbukweelede.”—1 Tim. 4:15; 2 Tim. 2:15.
9. Ino ncinzi ncotukanzide kucita, alimwi nkaambo nzi?
9 Tulikkomene kapati akaambo kakucinca ooku kwacitwa kumiswaangano yesu. Atuzumanane kutobela busolozi “[bwa]muzike musyomesi uucenjede” akukakatila ku Mweembezi Mupati natugwasya kulibambila “mapenzi” aayo mapati aali afwaafwi kucitika.—Mt. 24:21, 45; Heb. 13:20, 21; Ciy. 7:14.