Nzyomweelede Kwaamba Kujatikizya Mamagazini

Ngazi Yamulindizi June 1

“Ikuti muntu umwi wamwaambila kuti kupenga koonse nkotubona mazuba aano kuyoomana ino-ino, sena inga mwamusyoma? [Amulindile bwiinguzi. Mpoonya amubale Isaya 55:11.] Cibalo eeci cilatondezya ncotweelede kusyoma munguzu zya Leza zyakumanizya mapenzi oonse, nkaambo makanze aakwe alazuzikizigwa lyoonse.”

Awake May

“Sena muyeeya kuti nzyotucita alimwi aziyootucitikila kumbele zyakabambilwa limwi a Leza? [Amulindile bwiinguzi.] Kweelana akapango kamu Bbaibbele aaka, Leza ulabazumizya bantu kulisalila mbobayanda kupona. [Amubale Deuteronomo 30:19.] Cibalo eeci cilatondezya Ibbaibbele ncolyaamba kujatikizya makani aaya.” Amubatondezye cibalo citalikila apeeji 12.

Ngazi Yamulindizi June 1

“Abuzuba tulamvwa makani aabantu aabo bacita milimo mibi. [Amwaambe cikozyanyo cakacitika ino-ino cizibidwe mucilawo canu.] Sena kuli nomwakagambidwe ikuti naa kuli cintu cileta bubi citalibonyi calo cili mukuyunga bantu? [Amulindile bwiinguzi. Mpoonya amubale Ciyubunuzyo 12:12.] Magazini eeyi ilapandulula mbotukonzya kulikwabilila.”

Awake June

“Ndiyanda kumvwa mbomuyeeya kujatikizya ncocaamba eeci. [Amubale 1 Timoteo 6:10.] Sena muyeeya kuti aabo bajisi mali azintu zyakumubili balapenga akaambo kakuba azintu eezyo? [Amulindile bwiinguzi.] Magazini eeyi ilapandulula ibubi bujanwa akaambo kakuyandisya lubono.”