Amumukombe Jehova Mumukwasyi Woonse
1 Muciindi Bbaibbele nolyakali kulembwa, bamumukwasyi bakali kucita zintu zinji antoomwe. Bakali kubelekela antoomwe milimo yaaŋanda alimwi cipati kapati bakali kukomba Jehova mukwasyi woonse. (Lev. 10:12-14; Dt. 31:12) Mazuba aano, mumasena manji, bamukwasyi tababelekeli antoomwe milimo minji. Nokuba boobo, Banakristo balizi bubotu bwakubelekela antoomwe milimo mumukwasyi ikapati caboola kumakani aakukomba. Elo cilamukkomanisya kaka Sikutalisya mukwasyi nabona mikwasyi kaimukomba mulukamantano!
2 Amukambaukile Antoomwe: Kubelekela antoomwe mukukambauka makani mabotu kuyumya mukwasyi. Kunze lyakuunka abantu bamwi bamumbungano kuyookambauka, mwaalu lyoonse unoobeleka amukaintu wakwe abana. (1 Tim. 3:4, 5) Nokuba kuti balangizi beendeenda bajisi bubi balajana ciindi cakubeleka abamakaintu babo mumuunda.
3 Ibazyali bakambauka antoomwe abana babo balakonzya kubagwasya kuyaambele akuba bakambausi bacibwene. Ibana tabakaboni buyo lukkomano ndobajana bazyali babo mumuunda pele alimwi bayoobona bazyali babo mbobatondezya luyando ndobajisi kuli Jehova akubantunyina. (Dt. 6:5-7) Ibubotu bwakukambauka antoomwe abana tabumani pe bana nobakomena. Banabukwetene bamwi bajisi bana basankwa botatwe bali amyaka yaakati ka 15 a 21 bacizumanana kuunka ambabo mumulimo ciindi aciindi. Bausyi bakati: “Tulabayiisya cintu cimwi lyoonse. Alimwi tulabona kuti kulakkomanisya akukulwaizya.”
4 Amulibambile Antoomwe: Mikwasyi imwi bacibona kuti cilagwasya kulibambila kuunka mumulimo antoomwe. Ibana kanji-kanji balakukkomanina kwiinduluka-induluka abamukwasyi nobaizyanya nzila eezyo naa kuba mwiniŋanda. Bamwi balabelesya maminiti masyoonto kucita boobo kumamanino aaciiyo camukwasyi.
5 Lukkomano lwesu lulakomena notutola lubazu mumilimo iiyandika kapati alimwi iikkomanisya abaabo mbotuyanda. Elo kulakkomanisya kubelekela antoomwe abamumukwasyi mumulimo wamumuunda wakuŋanda aŋanda, kujokelela akweendelezya ziiyo zya Bbaibbele! Aboobo, nomukomba Jehova amukwasyi wanu, calukkomano mulakonzya kwaamba kuti: “Pele mebo abasiŋanda bangu tulabelekela Jehova.”—Jos. 24:15.