Branch Letter

Nomuyandwa Basikumwaya ba Bwami:

Tulakkomana kaka ikubona kuyaambele kwamulimo uucitwa mucilawo camutabi wa Zambia mumwaka wamulimo wa 2007! Twakasika amweelwe uuyungizyidwe wabapainiya baciindi coonse bali 10,655 mu March. Bunji bwabaabo bakamanizya Cikolo Cakwiiya Mulimo bakatumwa mumuunda kabali balangizi beendeenda, bapainiya baalubazu abaciindi coonse balagwasyilizya kapati kumulimo wakukambauka.

Umwi wakamanizya Cikolo Cakwiiya Mulimo wakaamba kuti: “Mubuzuba bwakusaanguna notwakaunka mumulimo kubusena nkotwakatumwa, bantu bakagambwa kutubona katukambauka kuŋanda aŋanda. Bakatubuzya kuti: “Eeci tacinacitikide okuno, ino muzwa kuli?” Aboobo twakatalika kubeleka antoomwe abasikumwaya katubagwasya kubikkila maanu kumikuli yabo yamukwasyi ayamumbungano.” Ciyandika nkuba amulongo uuli kabotu. Basikumwaya bapati alimwi bajisi luzibo lunji beelede kupa mizeezo iiyoogwasya basikumwaya bacili bana mumakani aaya.

Kubelekela antoomwe ooku kulakulwaizya. Tupepa twa Makani aa Bwami Na. 37 tutandila kutuulunzuma tobile twakajisi mutwe wamakani wakuti “Mamanino aa Bukombi Bwakubeja ali Afwaafwi!” twakaabilwa mucilawo camutabi coonse ca Zambia.

Makanze aakwaambilizya ooku ngakugwasya bantu babombe myoyo kwiiya cini Bbaibbele ncoliyiisya. (Mt. 28:19, 20) Nomukambauka, mutalubi kulemba bantu aabo batondezya luyandisisyo alimwi amukapilukile kamujisi makanze aakutalisya ciiyo ca Bbaibbele. Tulikkomene kubeleka antoomwe andinywe mumulimo ooyo uuyandika kapati alimwi twamutumina mooni waluyando lwa Bunakristo.

Tobanyoko,

Ofesi ya Mutabi yamu Zambia