Amubagwasye Basikwiiya Bbaibbele Kuba Basikumwaya ba Makani Mabotu aa Bwami
1 Imulimo Jesu ngwaakabapa basikwiiya bakwe kweelana ambokulembedwe ku Matayo 28:19, 20 wakali mupati kapati. Basikwiiya ba Kristo bakalaililwa kugwasya bantu banji kuba basikwiiya kutegwa abalo bakazumanane amulimo wakugwasya bamwi kuba basikwiiya. Intalisyo yakabambwa yakuti mulimo wakukambauka makani mabotu aa Bwami bwa Leza ucitwe kutegwa bantu balibambile mulimo mupati uuyakucitwa kumazuba aakumamanino aano ngotupona.—Mt. 24:14.
2 Basikwiiya Bbaibbele balakonzya kuba bana besu naa bantu bamwi buyo ibayanda kwiiya Bbaibbele andiswe. Tuliyandide kubagwasya bantu aabo akubatondezya mukuli ngobajisi wakugwasya bamwi kuba basikwiiya ba Jesu Kristo.—Lk. 6:40.
3 Amubagwasye Kuti Kabapa Bumboni: Amubakulwaizye mbomwiiya limwi kwaambila bamwi nzyobayiya. Amubaambile zicitika zikkomanisya mumulimo wamumuunda. Amubayiisye bana benu kutola lubazu mumulimo wamumuunda kabacili baniini kweelana ambobakonzya. (Int. 148:12, 13) Nzyomucita anzyomwaamba zyeelede kutondezya kuti mulimo wamumuunda mulaubikkila maano kapati.—1 Tim. 1:12.
4 Jehova ubelesya buyo aabo bazumina akutobela zyeelelo zyakwe ziluleme. Nokuba boobo, basikumwaya bapya tabajisi luzibo lunji mbuli lujisi baabo bakambausi ba Bwami bakalyaaba kaindi alimwi babbapatizidwe, pele bapya beelede kusyoma akuzipandulula njiisyo zyantalisyo zyamu Bbaibbele. (Amubone Bakamantene, amapeeji 79-82.) Akaambo kakuti bakazwa mu “Babuloni Mupati” alimwi bakaleka kutola lubazu mutwaambo twacisi, balakonzya kujanika kumiswaangano yambungano lyoonse.—Ciy. 18:2, 4; Joh. 17:16; Heb. 10:24, 25.
5 Mbumwabonena buyo kuti umwi wabasikwiiya Bbaibbele benu uleelela kuba sikumwaya uutabbapatizidwe, mulakonzya kwaambila mulangizi weendelezya. Walo uyakwaambila baalu bobilo kuti bakabandike andinywe asikwiiya Bbaibbele wenu kutegwa bakabone naa uleelela ncobeni kuba sikumwaya uutabbapatizidwe wamakani mabotu aa Bwami aantoomwe ambungano. Mpoonya muyakuba acoolwe cakuzumanana kumuyiisya sikwiiya Bbaibbele ciindi nomuunka limwi mumulimo wamumuunda.