Ino Mbuti Mbotukonzya Kubagwasya Bantu Bajanika ku Ciibalusyo?
1. Ino mulumbe nzi uuyandika kapati uuyakukambaukwa mu March 22, 2008?
1 Mu March 22, 2008, tuulunzuma twabantu nyika yoonse tuya kukambaukilwa mulumbe uuyandika kapati. Aabo baya kujanika ku Ciibalusyo baya kulimvwida luyando lupati ndwaakatondezya Jehova naakapa cinunuzyo kubantu. (Joh. 3:16) Baya kwiiya makani aamba Bwami alimwi mbwaya kububelesya Jehova kuzuzikizya makanze aakwe munyika yoonse. (Mt. 6:9, 10) Baya kulibonena luyando alukamantano ndobajisi bantu ba Leza.—Int. 133:1.
2. Ino mbuti mbotukonzya kubagwasya basikwiiya Bbaibbele bajanika ku Ciibalusyo?
2 Basikwiiya Bbaibbele: Akati kabaabo baya kujanika, bamwi banakuli baabo batalika lino kwiiya Bbaibbele andiswe. Amubazyibye kubakwesu abacizyi. Amubaambile miswaangano njotujisi ansondo akubeezyeezya a Ŋanda ya Bwami. Mwaambi uyakukulwaizya bantu bali boobo kutegwa bazumanane kuyaambele kumuuya. Mulakonzya kubelesya twaambo tumwi ntwaya kwaamba kukulwaizya mbomwiiya limwi Bbaibbele.
3. Ino mbuti mbotukonzya kubakulwaizya basikumwaya batacisungweede ibakajanika ku Ciibalusyo?
3 Batacisungweede: Ibamwi baya kujanika mbaasikumwaya batacisungweede. Amubaanzye. Mutani kubabuzyi mibuzyo naa kwaamba kaambo kakonzya kubatyompya. Caakwiinda Ciibalusyo, baalu beelede kubaswaya aabo batacisungweede ibakajanika ku Ciibalusyo akubalumbaizya akaambo kakujanika akubatamba kumiswaangano yambungano iitobela.
4. Mbuti toonse mbotukonzya kubagwasya beenzu?
4 Beenzu: Bamwi akati kabaabo baya kujanika mbeenzuma naa mbamukwasyi mbotwakatamba. Bamwi mbabaabo ibakatambula kapepa kakubatamba ku Ciibalusyo nokwakali kwaambilizya kwaalubazu. Ikuti naa mwabona bantu mbomwatazyiba kabotu, amukabaanzye akubaambila zyina lyanu. Ndiza tabanajanikide kumiswaangano yesu iili yoonse. mumubandi wenu mulakonzya kubabuzya nkobakkala. Kwiinda mukubaswaya naa kubatumina luwayile kwainda mazuba masyoonto kuzwa buzuba bwa Ciibalusyo, mulakonzya kubakulwaizya kwiinda mukutalisya ciiyo ca Bbaibbele.
5. Ino ncinzi ncotukonzya kwaamba kutegwa tutalisye ciiyo ca Bbaibbele?
5 Mwaakupilukila, mulakonzya kubelesya makani aa Ciibalusyo kutegwa mutondezye bbuku lya Bbaibbele Ncoliyiisya mboliyiigwa. Mucikozyanyo, mwaambi wamakani aa Ciibalusyo uyakubala lugwalo lwa Isaya 65:21-23. Mwaakupilukila, mulakonzya kwaamba ncaakali kwaamba makani akwaamba kuti, “Andimutondezye zyilongezyo zyimwi zyiboola akaambo kacinunuzyo.” Mpoonya amulange-lange mapeeji 4-5 mubbuku lya Bbaibbele Ncoliyiisya. Ambweni mulakonzya kwaamba kuti, “Banji tabazyi businsimi bwa Isaya nobuya kuzuzikizyigwa.” Mpoonya amulange-lange mincali 1-3 mucibalo 9. Nzila aimwi mbomukonzya kutalisya ciiyo ca Bbaibbele nkwaamba mwaambi ncaamba, mpoonya amumutondezye bbuku lya Bbaibbele Ncoliyiisya akumutondezya mboliyiigwa.
6. Ino ncoolwe nzi ncotujisi notutobela mulawo wa Jesu wakuyeeya lufwu lwakwe?
6 Toonse tweelede kucibona kuba coolwe kugwasya basikwiiya Bbaibbele, basikumwaya batacisungweede abeenzu baya kujanika. (Lk. 22:19) Kakunyina akudooneka, Jehova uyakuulongezya mulimo ngotucita wakukambauka Bwami.