Kuyoopegwa Bumboni Bubotu
1. Kunze aamakani ayoopegwa, ncinzi cimbi cikonzya kukkomanisya beenzu baboola ku Ciibalusyo? Amupandulule.
1 Lili? Mangolezya mubuzuba bwa Ciibalusyo. Twabeleka canguzu kutamba bantu kutegwa bakajanike. Beenzu tabakkomani buyo azyintu nzyobamvwa. Umwi mukaintu iwakajanika ku Ciibalusyo wakaamba zyintu nzyaakabona—mbobamvwana boonse alimwi aŋanda mbotu, iisalala, yakayakwa akubambwa abantu balisungwide. Aboobo, toonse buyo kutali mwaambi alikke, tulatola lubazu mukupa bumboni mubuzuba oobu nokucitwa cintu ciyandika kapati mumwaka.—Ef. 4:16.
2. Mbuti mbotukonzya kupa bumboni kubeenzu toonse?
2 Amubaanzye Beenzu: Kubaanzya beenzu akumweta-mweta kuyoopa bumboni. (Joh. 13:35) Nokuba kuti tiimwabandika abantu boonse, mulakonzya kulipandulula kuli baabo balaafwaafwi andinywe. (Heb. 13:1, 2) Amubikkile maanu kubeenzu balibonya kuti kunyina ngobazyi. Cilalangilwa kuti abalo bakatambwa buya ku Ciibalusyo. Mulakonzya kubabuzya kuti, “Sena eeci nceciindi cakusaanguna kuboola okuno? Amubalombe kuti mukkale ambabo, alimwi amubaambile kuti mulilibambilide kwiingula kufwumbwa mubuzyo ngobajisi. Ikuti naa mbungano yanu yeelede kuzwa cakufwaambana kutegwa mbungano iimbi ibelesye busena oobo, mulakonzya kubuzya kuti: “Ino pulogilamu yeenda buti? Mbuti mbondikonzya kumubona alimwi?”
3. Mbuti mbotukonzya kubatambula basikumwaya batacisungweede?
3 Amubatambule Batacisungweede: Cakutadooneka, basikumwaya batacisungweede banooliko, kubikkilizya abamwi bajanika buyo ku Ciibalusyo amwaka. Amubatambule, akubaambila kuti mulikkomene kapati kubabona. (Lom. 15:7) Baalu balakonzya kubaswaya kumaanda aabo kakutanainda ciindi kutegwa babakulwaizye kuzumanana kuyanzana ambungano. Tupaila kuti ibanji ibayoojanika bayoomulemeka Leza ikutali akaambo kazyintu nzyobamvwa zilikke pele alimwi akaambo kazyintu nzyobabona iciindi ‘nobalibonena milimo yesu mibotu.’—1 Pe. 2:12.