Amukabatambule Beenzu

Mubuzuba bwa March 23, beenzu ibali 12 miliyoni naa kwiinda aawo balalangilwa kujanika ku Ciibalusyo. Eelo kaka bayoopegwa bumboni ciindi mwaambi nayoopa makani aamba kujatikizya cipego ca Jehova cacinunuzyo alimwi azilongezyo zimwi nzyobayoojana bantu kumbele! (Is. 11:6-9; 35:5, 6; 65:21-23; Joh. 3:16) Pele tali buyo mwaambi alikke uuyakupa bumboni amuswaangano ooyu uulibedelede. Toonse tulakonzya kutola lubazu kwiinda mukubatambula beenzu amaanza obilo. (Rom. 15:7) Mboobu mbomukonzya kucita.

• Muciindi cakuunka kwaakukkala acuuno canu akulindila kuti pulogilamu italike, amukabatambule beenzu alimwi abaabo ibatacisungweede munzila iisangalizya

• Nokuba kuti muyakubikkila maano kubantu mbomwakatamba lwanu kumugama, amukababikkile maano abaabo bayooboola akaambo kakuti bakatambwa aciindi cakutamba bantu. Amukakkale ambabo, alimwi akubelesya antoomwe Bbaibbele lyanu abbuku lyanyimbo

• Makani aakumana, amukaingule mibuzyo njobanoojisi. Ikuti ciindi kacili cisyoonto akaambo kakuti kuli mbungano imwi yeelede kubelesya Ŋanda ya Bwami, amukabikke bubambe bwakumuswaya muntu ooyo kakutanainda mazuba manji. Ikuti kamutazyi mbomukonzya kubonana alimwi amuntu ooyo, amukaambe kuti: “Ndiyanda kuyoomvwa mbomwalimvwa kujanika amuswaangano ooyu. Ino inga twaakubonana buti?”