Amubatambule!
1. Ino ncinzi citupa coolwe cilibedelede cakupa bumboni, alimwi nkaambo nzi?
1 Ciindi ca Ciibalusyo nceciindi ciinda kubota ncotujisi cakupa bumboni. Amuciyeeyele buyo: Mwaka uno beenzu ibainda ku 10 miliyoni balalangilwa kuyoojanika ku Ciibalusyo akuswiilila makani aapandulula nzila zyobilo zipati zyaluyando zyalo izyakatondezyegwa kwiinda mucinunuzyo. (Joh. 3:16; 15:13) Bayooiya kujatikizya zilongezyo nzyayoobapa Jehova. (Is. 65:21-23) Nokuba boobo, mwaambi tali nguwe alikke uuyoopa bumboni buzuba oobu. Boonse ibayoojanika banoojisi coolwe cakupa bumboni kwiinda mukutambula beenzu camaanza obilo.—Lom. 15:7.
2. Mbuti mbotukonzya kutambula beenzu camaanza obilo?
2 Muciindi cakukkala buyo akulindila kuti muswaangano utalike, sena inga tiimwabweza ntaamu yakubajuzya aabo bakkede munsi lyanu? Beenzu balakonzya kuti kabayoowede alimwi kabatazyi ncobeelede kucita. Kumweta-mweta akubajuzya calumwemwe cilakonzya kubapa kulimvwa kwaanguluka alimwi akutambulwa. Kutegwa muzyibe naa muntu waboola akaambo kakuti wakapegwa kapepa kakutamba bantu, mulakonzya kumubuzya naa nceciindi cakusaanguna kujanika amiswaangano yesu akuti naa kuli ngwazyi mumbungano. Ambweni mulakonzya kumulomba kuti mukkale antoomwe akubelesya Bbaibbele lyanu alimwi abbuku lyanu lyanyimbo. Ikuti kamubelesya ŋanda ya Bwami, ambweni inga cakonzyeka kumweenzeenzya asyoonto. Yamana pulogilamu, amube afwaafwi anguwe kutegwa mwiingule mibuzyo njajisi. Ikuti mbungano yanu iyandika kufwambaana kuzwa kutegwa ipe ciindi kumbungano imbi, mulakonzya kwaamba kuti: “Inga ndayanda kuti ndizoomvwe mbomuyeeya kujatikizya muswaangano ooyu. Ino inga twabonana buti?” Mpoonya amupangane kuyoomuswaya bumwi buzuba. Kwaambisya baalu beelede kuyoobikkila maano kukulwaizya basikumwaya batacisungweede ibayoojanika ku Ciibalusyo.
3. Nkaambo nzi ncociyandika kusolekesya kuyoobatambula beenzu ibayoosika ku Ciibalusyo?
3 Kubeenzu banji, eeci ciyooba ciindi cakusaanguna kubona lukkomano, luumuno, alimwi alukamantano lwaparadaiso yakumuuya njobajisi bantu ba Jehova. (Int. 29:11; Is. 11:6-9; 65:13, 14) Ncinzi ncobanooyeeya beenzu baakujanika ku Ciibalusyo? Eeci cinooyeeme azyintu nzyotuyoobacitila iziyoobagwasya.